اكيد انا فيا عيوب مع الوقت هتكتشفيها لكن هحاول بكل ما املك اغيرها علشانك وافقي أنتِ بس وانا اوعدك هنسيكي ‘معتز’ وهنسيكي أنه كان موجود في حياتك من الأساس
-اوافق علي ايه؟
-تتجوزيني؟
رديت برجفة في صوتي:
-بس ا انا خايفة!
-وانا عارف وهحاول كل ثانيه اطمنك
-خايفة من معتز
-معتز طلقك واتسجن واخد عقابه وبعدين طول مانا موجود هو ميقدرش يأذيكي لاني مش هسمحله بده
-وعد؟
-وعد
اتنهدت ورديت بأستسلام:
-اوعدني انك مش هتتغير انا مش حِمل خبطات تاني!
باس باطن ايدي برقه ورد بهدوء :
-اوعدك
رغم إن التجربة دي كسرتني وسحبت من روحي كتير، إلا إنها علمتني درس مكنتش هفهمه غير بالطريقة دي،بقيت عارفة إزاي أحافظ على اللي فاضل من قلبي، وإني مهدرش مشاعري مع أي حد ما يستاهلهاش.
بقيت أشوف الأمور بشكل أوضح، وأفهم إن اختياري لشريك الحياة مش لازم يكون مبني بس على المشاعر. الحب مهم، آه… لكن في حاجات تانية بتبني العلاقة:
– الأمان اللي يخليك مطمّن
– الحنية اللي تداوي الروح
– الراحة في الكلام من غير حذر
– الاكتفاء اللي يخليك مش محتاج حد غيره
– والصدق… اللي لو غاب، كل حاجة تتهد.
لما كل ده يبقى موجود، الحب مش هيبقى مجرد شعور… هيبقى أسلوب حياة.
-ها تتجوزيني؟
رديت بأبتسامة جميله ورقيقه:
-موافقة
لما توافقي
هيبيع جواهرجي ف يوم خاتم
هيجيب مأذون عشا لولاده
هيزيد مشروب وهيبقي اتنين
ونضيف للدنيا اتنين عشاق
وإن موافقتيش
فيه رزق هيبقي انتهي مقطوع
وانتي مترضيش تقطعي أرزاق♥️
#عوضي-من-الأيام
#إيمان-شلبي