نعمة وجودك بقلم ايمان شلبي – الصفحة 5

اسكريبت 🖤 بقلمي إيمان شلبي 🖤 -انا اول مره اشوف بنت شغاله سواقه! غمضت عيني وانا بخرج نفس بكل بُطئ بعدها ابتسمت بهدوء ورديت علي الشاب اللي كان راكب جنبي : -اديك شوفت مط شفايفه ورد بحيره: -وايه اللي يخلي بنت زي القمر زيك تشتغل سواقه -الشغل مش عيب يافندم هز رأسه بتأكييد : -مش عيب طبعا بس انا شايف أن للبنات شغل معين يعني مش اي حاجه والسلام! ابتسمت بسخرية ورديت وانا بلف يمين : -وانا لاقيت شغل وقولت لا يا استاذ! -انتي خريجه ايه رديت بأحراج : -معايا ثانويه عامه -اممممم وعلي كده بقي مرتاحه في الشغلانه ديه اخدت نفس عميق ورديت برضا : -الحمد لله كل اللي يجي من عند ربنا رزق -انتي متجوزه هزيت راسي بنفي : -لا بس بصرف علي أمي وابويا -ربنا يخليهوملك -يارب سكتنا شويه وكملت الطريق لحد ما وصلنا نزل وشكرني وعطاني فلوس كانت زياده عن المبلغ المطلوب! حمدت ربنا وفضلت الف شويه بالعربيه كان فاضل ربع ساعه علي الشيفت بتاعي بصيت علي الفلوس اللي جمعتها النهارده ملقتهاش هتكفي علاج ماما اللي ب١٠٠٠ جنيه كان ناقص ٤٠٠ جنيه ركنت علي جنب وسندت راسي علي الدريكسيون بتعب وإرهاق،مكنتش عارفه هعمل ايه ،الظروف صعبه ،الشغل واقف ،المصاريف كتيره، علاج ماما وبابا لازم يتجاب ضروري! -يارب انت اللي عالم بحالي يارب ارزقني من حيث لا احتسب يارب مش علشاني علشان علاج امي وابويا اللي مليش غيرهم يارب انا عارفه انك سامعني وحاسس بيا ا..... مكملتش كلامي إلا ولقيت واحد بيقتحم العربيه وهو بينهج بتعب وملامحه باين عليها الخوف -اطلع ياسطا بسرعه بصيت جنبي بخضه وقلق لقيته بيبص ورا بتوتر ومن غير ما يبصلي زعق فيا : -ياسطا بقولك اطلع بسرعه هن*موت رديت بخوف وانا بلف المفتاح : -يالهوي ه*نموت ليه بصلي بصدمه واول ما عرف اني بنت لطم علي وشه: -نهار اسود انتي بنت اتحركت بالعربيه وانا برد بسخريه : -مالها يعني البنت! بص ورا كان في عربيه بتجري ورانا فصرخ بخ*وف : -زودي السرعه بلعت ريقي بخوف وزودت السرعه : -هو في ايه يخربيتك -مش وقته ارجوكي اعملي اي حاجه و...اااااه أتوجع بألم وهو بيحط ايده علي كتفه وانا ص*رخت بخوف اول ما العربيه قربت مننا وزنقت علينا اسكت؟! أبداً عملت فيها محمد رمضان قومت زنقت انا كمان عليها وياريتني ما عملت كده باب العربيه طار في الهواء وكان جو اكشن انما اورجانيك! -نهار اسووووود يالهوي يالهوووووي منك لله العربيه باظت ياختااااي روحت في داهيه روحت في داهيه خلاص -ياستي اتنيلي زودي السرعه هجبلك غيرها رديت بغيظ وانا بدوس بنزين: -ياخويا اتنيل انت شكلك كحيان اصلا -كحيان! كنت لسه هرد بس ضربوا علينا نار صرخت برعب وزودت السرعه اكتر ومن توتري فضلت ادخل في شوارع كتير معرفهاش لكن مش مهم المهم دلوقتي اني ابعد عن المجرمين دول! وأخيراً وبعد لف كتير وبعد ما العربيه اتدغدغت قدرت أهرب منهم بصيت جنبي ولسه هزعق لقيته ساند رأسه علي الكُرسي ومغمض عيونه وبينزف من كتفه -يالهوووي د ده ده شكله ما*ت ياليلتلك الهباب يا إيمان ي.... -انا مموتش بطلي ندب قالها بتعب وصوت ضعيف وهو بيفتح عينه ببطئ اخدت نفسي براحه : -الحمد لله انت كويس؟؟ هز رأسه وهو بيرد بتعب : -ش شكراً علي مساعدتك رديت بضيق : -انت اللي اقتحمت عربيتي وفجأه لقيت ناس بتجري ورايا فجريت من الخوف وعيشت جو فيلم اكشن من بتوع محمد رمضان وحاجه في قمه العبط وبيتي هيتخرب وصاحب العربيه هيرفع عليا قضيه وامي وابويا هيموتوا من قهرتهم عليا و....... -بس بس ايه بالعه راديو؟! هدفعلك تعويض -يابني تعويض ايه انت شكلك شحات اصلا انت هتحور عليا ؟! -شحات! -بقولك ايه انا هعمل بأصلي وهوديك مستشفي ونكلم حد من اهلك وهمشي وربنا يعوض عليا بقي هز رأسه بنفي وتعب: -لا لا مستشفي ايه ا انا هنزل هنا كفايه اللي حصلك بسببي عوجت شفايفي بسخرية: -حساس اوي ياخويا اتنيل خليك هوديك المستشفي -اتنيل! اتحركت بالعربيه وانا برد باستغراب : -هو انا ليه كل ما اقول كلمه تستغرب ما تعيش عيشه اهلك يابني كلنا ولاد خمسه -تسعه* رديت بأحراج : -خمسه ،تسعه ،واحد ، كلهم ارقام عديها هز رأسه بيأس وابتسامه بسيطه وسندها علي الكُرسي وهو بيغمض عيونه بتعب وصلنا المستشفي كان فقد الوعي من التعب مكانوش راضيين يدخلوني الا ما ادفع فلوس طلعت كل الفلوس اللي معايا ودفعتها!! من غير تفكير ،من غير زعل ،من غير خوف بالرغم احتياجي للفلوس لكن انا عارفه ان ربنا هيعوضني خير بابا دائماً بيقولي لو شوفتي اي حد محتاج مساعده متتردديش! ساعدي بمجهودك ،بوقتك ،بفلوسك حتي لو كان آخر مليم في جيبك واتأكدي أن ربنا هيعوضك خير وبالفعل مفيش مره ساعدت فيها شخص إلا وربنا عوضني وجبر قلبي شويه والدكتور خرج من أوضته طلعت اجري وانا بسأله بقلق : -طمني يادكتور هو بخير هز رأسه بهدوء : -الحمد لله خرجنا الر*صاصه ووقفنا النزيف رديت بحزن : -تمام ا انا هو يعني -انتي تعرفي ياسين بيه رديت بأستغراب : -ياسين مين رفع حاجبه بأبتسامه خبيثه: -معقوله جيباه لحد هنا ومتعرفيش اسمه! هزيت راسي بنفي : -والله العظيم ما اعرفه انا ا انا كنت بركن عربيتي لقيته بيقتحم العربيه وكان في ناس بتجري ورانا وض*ربوا نا*ر و قاطعني ببرود : -عموماً انا كلمت أهل ياسين بيه وهما جايين في السكه واحتمال ابلغ البوليس ابقي احكيلهم الكلام ده لطمت علي وشي والدموع بتلمع في عيني: -يالهووووي يالهووووي بوليس ايه الله يخليك انا معملتش حاجه اقسم بالله وحياه عيالك ياباشا بلاش البوليس وربنا ما عملت حاجه لياسين بيه ا..... "انتي اللي جيبتي ياسين علي هنا" لفيت بفزع اول ما سمعت صوت راجل كبير بيسألني بكل عجرفه! -ا انا ا انا و و الله العظيم ياسعاده البيه انا معملتش حاجه هو اللي اقتحم عربيتي وكان بيجري من ناس و و وقفت كلام وانف*جرت في العياط فجأه! الكلام كُله اللي كنت هدافع بيه عن نفسى اتبخر من الخوف ،لاول مره في حياتي اتحط في موقف زي ده مش عارفه اعمل ايه او اقول ايه خايفه محدش يصدقني والبس قضيه -اهدي يابنتي انا بسألك سؤال بس مش هأذيكي والله مسحت دموعي ورديت بحشرجه: -ا ايوه حضرتك انا اللي جبته هنا "المريض فاق" قالتها واحده من الممرضين بسعاده وهي بتخرج من اوضه "ياسين" ،وقتها اخدت نفسي ،ودموعي اتحولت بابتسامه عريضه وانا بسألها بلهفه -هو كويس؟! -الحمد لله بس محتاج يفضل معانا شويه لانه نزف كتير للاسف رد الراجل الكبير بهدوء : -ممكن ادخله الدكتور بلهفه : -طبعاً يا إبراهيم بيه اتفضل كان هيدخل بس لف وبصلي ،وقتها قلبي وقع! -شكراً انك انقذتي ابني ابتسمت ورديت بهدوء : -حمدلله علي سلامته دخل اوضته والكل مشي وراح علي شغله وفضلت انا لوحدي! قعدت علي الكُرسي وحطيت وشي بين كفوفي ،وقتها عيطت ،من قله حيلتي ،خوفي علي اهلي ،خوفي من صاحب العربيه اللي مبقتش عربيه من اساسه عارفين احساس انك تبقي خايف ومهموم ومش لاقي الايد اللي تتمدلك وتطبطب علي قلبك ،مش لاقي الشخص اللي يهون عليك محنتك ويطمنك انها هتعدي "يا أنسه" رفعت وشي ومسحت دموعي وانا بتنهد وبرد بتعب : -نعم مدتلي ايديها بورقه: -اتفضلي رديت بأستغراب : -ايه ده ؟ -شيك بمليون جنيه تقدري تصرفيه وقت ما تحبي في البدايه مستوعبتش اللي سمعته! تنحت لحظه وانا برمش بعيوني وفجأه جسمي كله اترعش -د ده ليا انا متأكده؟ هزت راسها بأبتسامه: -ايوه ليكي -ا ايوه ب بس ليه ايه المقابل يعني هزت أكتافها بجهل: -معرفش إبراهيم بيه هو اللي بلغني اوصلهولك مديت ايدي واخدته منها وبرعشه في صوتي ونبره كلها دموع قولتلها : -ش شكراً هزت راسها ومشت من قدامي وانا لحد اللحظه دي مش قادره استوعب أن في أيدي مبلغ بمليون جنيه اقدر اتصرف فيه وقت ما احب!!! قد ايه ربنا كريم قد ايه حنين قد ايه بيعوض لدرجه تنسيك انت كنت متضايق ليه ليه اصلا نتضايق واحنا عندنا رب بيرتب حياتنا للأحسن بياخد مننا شيئ غالي عشان يعوضنا بالافضل واللي هو شايفه خير لينا ************************************** بعد مرور سنه -كارما انا مُعجب بيكي وعايز اتقدملك كُنت قاعده في الكُليه كليه الهندسه اللي قدمت فيها فوراً وقت ما صرفت الشيك كان حلم حياتي ادخلها ،سهرت ليالي ،تعبت ،اجتهدت ،دخلت الامتحانات ،نجحت بتقدير ،كنت خلاص هلمس حلمي بأيدي! وفجأه وبدون اي مقدمات وقعت علي جدور رقبتي بابا فجأه تعب بعد ما كان كويس ماما تعبها زاد ومبقتش تقدر تتحرك من غير وجودي فجأه كل شئ اتبدل، كنت ما بين نارين حلمي أو اهلي! بابا وقتها حاول بكل ما يملك أنه يقنعني ادخل الكليه وهو هيشتغل ويجيب مصاريفي ومصاريف البيت وماما بالرغم من تعبه الشديد ،كان بأيدي اختار حلمي لكن اتخليت عنه في سبيل راحتهم اتخليت عن اكتر حلم كنت بتمني أوصله في يوم بس مكانش فارقلي ،ماما وبابا وصحتهم عندي بالدنيا كلها ،بالرغم من قهرتي وتعبي ودموعي كل ليله إلا أني كان عندي يقين أن ربنا هيعوضني في يوم "من ترك شيئاً لله عوضه الله بخيراً منه" وبالفعل ربنا عوضني احسن عوض ،في وقت ومكان وموقف مكانش لا علي البال ولا النيه! فوقت من شرودي علي صوت زميلي اخدت نفس عميق ورديت بهدوء : -بس انا مش حابه ارتبط انا اسفه -طب جربي! -للأسف واحده زي مينفعش تتجوز ولا ترتبط من اساسه -ليه أنتي مش بنت زي باقي البنات ابتسمت بحزن ورديت والدموع بتلمع في عيني : -وماما وبابا اسيبهم لمين -ي يعني هو ربنا يخليهوملك طبعاً بس دي سُنه الحياه اخدت نفس عميق وانا بقوم من مكاني: -في حاجات جوانا مينفعش نحكي لحد عنها يا معاذ ،انا اسفه اتمني تلاقي الاحسن مني عن اذنك سيبته وروحت قعدت في رُكن بعيد ،مقدرش أنكر أبداً اني اتضايقت ،مقدرش أنكر اني نفسي ارتبط واتجوز واكون اسره وبيت دافي وكله امان وحب لكن من أمتي الاحلام بتتحقق،دايماً في جزء ناقص في حياه كل شخص مش ممكن يكمل مهما حصل لأن مفيش حياه كامله علي الاطلاق بس تعرفوا ؟! لو حياه كل شخص فينا اكتملت هنتعلم الانانيه واللامبالاة ،هنبعد عن ربنا ،هنبطل ندعي ،هنبطل نطلع صدقه ،ذنوبنا هتزيد ،علشان كده ربنا دائماً بيقربنا منه بأنه بيخلي عند كل شخص شيئ مفقود لانه حابب قُربه وفي النهايه بيكتمل الجزء المفقود لانه رحيم بعباده! ************************************** -ياماما ياحبيبتي انتي ليه بتعيطي بس؟؟ ردت بصوت مقهور : -نفسي افرح بيكي اوي ياكارما نفسي اشوفك عروسه ليه يابنتي بترفضي كل عريس يتقدملك مسكت ايديها وبوستها بدموع : -عايزاني اتجوز واسيبك انتي وبابا لوحدك واروح اقعد مع واحد معرفهوش والبس روب بريش! ابتسمت من بين دموعي بمرح مصطنع : -عايزاني البس روب بريش ياست ماما ليه هو انا فرخه -كارما ليه بترفضي ياحبيبتي خايفه من ايه خايفه تسبيني انا وابوكي عشان تعبانين؟؟ انا بقيت كويسه ياحبيبتي والله وبقدر اتحرك دلوقتي وابوكي كمان كويس بقي احسن من الاول بكتير وبعدين الاعمار بأيد ربنا سواء قعدتي معانا أو حتي اتجوزتي مسيري هروح لرب كريم رديت بلهفه وانا بترمي في حُضنها: -متقوليش كده بعد الشر عنك انا مقدرش اعيش من غيرك خرجتني من حضنها بهدوء وهي بتمسح دموعي : - انا بقولك الحقيقه ياكارما انا سنه اتنين أو حتي عشره وهروح لربنا دي سُنه الحياه ومنقدرش نعترض، اسمعيني كويس اوي وحطي الكلام اللي هقوله ده حلقه في ودنك مفيش انسان يقدر يعيش لوحده هتفضلي ترفضي لحد امتي انتي خلاص كسرتي سن الثلاثين! رفضتي فُرص كتير كانت علي هواكي بس رفضتي عشان خاطرنا زي ما رفضتي وضحيتي زمان بحلمك برضو علشاني انا وابوكي ،لكن كفايه اوي لحد كده ،كفايه تضحيات ،اي بنت في سنك نفسها تعيش حياتها وتتجوز ويبقي عندها شخص بيحبها وبيت وأطفال ،علشان خاطري ياكارما كفاية ياحبيبتي كفايه تضحيات ومع اقرب فرصه افتحي قلبك وجربي احساس الحُب ،اخرجي من قوقعه الحزن والخوف والوحده رديت بنبره كلها عياط : -بس انا مش لوحدي أنتي وبابا عندي بكل الدنيا حاوطت وشي وهي بتبتسم بحزن : -مش للابد هنكون معاكي ،اوعديني يا حبيبتي اوعديني انك هتفتحي قلبك اخدت نفس عميق وانا بسند راسي علي رجلها : -اوعدك ياماما ************************************* وقابلتك انت لاقيتك بتغير كل حياتي معرفش ازاي انا حبيتك معرفش ازاي ياحياتي! كنت قاعده علي الترام ،في أيدي كوبايه قهوه تيك اوي ومحاوطاه بأيدي الاتنين وبترعش من البرد ،اما عن صوت الست فكان بيجوب المكان وبيدفي قلوب كل العُشاق،فضلت اراقب الطريق بفضول وانا في انتظار الترام اللي هركبه جنبي راجل وست عواجيز قاعدين وماسكين ايد بعض ،قدامي من النحيه التانيه شاب وبنوته واقفه حاطه ايديها في جيب الجاكيت بتاعه ،في مكان تاني تلت بنات أصحاب واقفين يتصوروا ومبسوطين ،في ركن بعيد بنت بتتكلم في الفون وعيونها بتلمع بخجل ،في كل رُكن كانوا اكتر من شخص ،ماعدا رُكني كنت وحيده زي العاده انا وقلبي! -لو سمحتي لفيت لمصدر الصوت واول ما شوفته شهقت بصدمه -ايه ده انت؟ رد بأستغراب: -انتي تعرفيني -انت مش فاكرني سكت لحظه بيحاول يفتكر لكن واضح أنه مقدرش يفتكرني! فركت صوابعي بأحراج: -ا احم ا انا اللي عربيتها اتدمرت بسببك رد بلهفه : -ايوه ايوه افتكرتك أنتي اللي انقذتيني -ايوه انا كارما رد بتوتر وإحراج : -ا احم انا اسف والله ا اصل شكلك متغير شويه رديت بابتسامه صغيره: -عادي ولا يهمك مدلي أيده بعفويه: -فرصه سعيده رديت بتوتر من غير ما أمد ايدي: -انا اسعد -ا احم صحيح كنت عايز أسأل علي حاجه -اتفضل -هما قالولي أن في حد هنا بتاع فضه وعنده حاجات شيك تعرفي مكانه هزيت راسي : -اه بس هو قفل للاسف رد بأحباط : -ياربي طب متعرفيش بيفتح امتي؟ -هو انت محتاجه ضروري اوي -بصراحه اه ،عيد ميلاد اختي النهارده وهي بتحب الفضه اوي ،احنا بنتعامل مع واحد بس للاسف هي ممكن تكون عنده دلوقتي عشان رايحه تجيب لصاحبتها هديه و انا حابب اعملها مفاجاه فقولت اروح مكان مجهول -امممممم طب تعالي ورايا رد بأستغراب: -هنروح فين -تعالي بس مشيت وهو جنبي كان بيبصلي بنظرات غريبه طول ماحنا في الطريق ،نظراته خلتني اتوتر ووشي يقلب زي الفراولايه وصلنا قدام المكان ،طلعت مفتاح من شنطتي ونزلت علي الارض فتحت القفل وهو واقف يبصلي باستغراب وتساؤل -طب ارفع معايا! اتوتر وقرب مني ساعدني ارفعه ،دخلت وفتحت الانوار وانا بشاورله يدخل -اتفضل -هو بتاعك؟! هزيت راسي بأبتسامه: - ايوه اتفضل رد بأمتنان: -والله بجد انا مش عارف اقولك ايه شكراً هتعبك معايا -تعبك راحه اتفضل شوف عايز ايه -طب ممكن توريني السلاسل -لحظه واحده طلعتله كل السلاسل الموجوده وحطيتها قدامه فضل مش عارف يختار كان واضح عليه الحيره والارتباك -تحب اساعدك؟؟ رد بأبتسامه واسعه: -ممكن؟؟ -ممكن طبعاً حك فروه راسه بأحراج : -بصي بصراحه كده انا مش بفهم في حوار الهدايا اوي فممكن تساعديني وتقوليلي اعمل ايه! وقفت حطيت ايدي تحت دقني بتفكير : -امممممم بص هو البنات بتحب الفضه جداً والاسكين كير والميك اب والشوكلت وكده فأحنا ممكن نعمل بوكس في الحاجات دي بس هيبقي غالي شويه -مش مهم المهم يفرحها بس هنجيب الحاجات دي منين! -هكتبلك ورقه بالهدايا والاماكن اللي ممكن تجيب منها -تمام بص علي السلاسل وهو بيسألني : -انهي واحده احلي مسكت واحده علي شكل فراشه شكلها يجنن،فردتها علي ايدي وبصيت في عيونه من غير ما انطق حرف -واو تحفه -جداً -تمام هاخدها دفع تمنها واخدها مني وفضل واقف شويه يبصلي اتوترت وانا ببص في كل مكان إلا عيونه : -ف في حاجه تانيه؟ -بصراحه ؟ -بصراحه -عايز اختار سلسله كمان -تمام حاضر ثانيه واحده ه.... -مش لازم تطلعيهم انا هدفع تمنها وانتي اختاري علي ذوقك رديت بأستغراب: -ايوه بس ممكن ذوقي ميعجبكش! -مش مهم يعجبني المهم يعجبك انتي -مش فاهمه -السلسله ديه هتكون ليكي رديت بصدمه وانا بشاور علي نفسي: -ليا انا طب بمناسبه ايه؟ -انك انقذتي حياتي مره وانك ساعديني دلوقتي -بس.... -بس ايه النبي قبل الهديه؟ رديت بجديه: -عليه افضل الصلاه والسلام بس اسفه انا مش هقدر اقبل هديتك متعودتش اخد حاجه من غير مناسبه! هز رأسه وهو بيتنهد بضيق : -تمام علي راحتك عن اذنك رديت بجديه وبرود: -نورت يافندم ************************************** -ياسين ياسين ياسين كنت قاعده في اوضتي بليل بعمل سيرش علي الاكونت بتاعه! مكنتش قادره افهم نفسي ليه بفكر فيه بالشكل ده؟! ليه عندي فضول اعرف عنه اكتر واكتر ليه قلبي لما شافه دق بالشكل المُريب ده طب ليه كنت متوتره وفي نفس الوقت مبسوطه ومش حابه أنه يمشي ليه اتمنيت لو يفضل واقف طول العمر هنا جنبي ومعايا وأخيراً وبعد لف كتير قدرت اجيب الاكونت اول ما دخلت شوفت صورته اتصدمت صدمه عمري متجوز طلع متجوز! بعد ما كنت متحمسه رميت الفون علي السرير وبعدها دفنت راسي في المخده وفضلت اعيط لحد ما روحت في النوم ************************************* بعد مرور يومين "مساء الخير يا انسه كارما" كنت قاعده في اوضتي وحيده كالعاده سمعت صوت ماسدج علي الواتساب فتحتها كان رقم غريب -مين ؟ -ياسين قلبي دق واتوترت لدرجه اني رميت الفون وفضلت الف شويه حوالين نفسي! "ا حم انا اسف اني بتكلم في وقت متأخر زي ده بس انا بصراحه كنت حابب اشكرك اختي عجبتها الهديه اوي وفرحت بيها " اخدت نفس عميق ومسكت الفون اول ما سمعت صوت الماسدج التانيه رديت بجديه: -طب الحمد لله بس هو انا ممكن اعرف جبت رقمي منين؟؟ -هتفرق؟ -اكيد طبعاً -بصي بصراحه مش هقدر اقولك بس انا كنت عايز اوصلك عشان اتكلم معاكي في موضوع مهم بلعت ريقي بتوتر: -موضوع ايه ؟ -انا مُعجب بيكي تنحت شويه في محاوله لاستيعاب كلامه لقيته typing.... -هو احنا ممكن نتقابل ونتكلم! رديت بتلقائية وعصبيه مفرطه: -لا مش ممكن -ليه - يا استاذ انت ناسي انك متجوز علي الاقل احترم الست اللي متجوزها -متجوز!!!! -ايه اتفاجئت ولا ايه -بس انا مش متجوز بعتله فويس وانا متعصبه وبزعق لدرجه وشي احمر: -بقولك ايه يا استاذ لو مفكرني عشان ساعدتك تلاقي هديه للهانم اختك ابقي بنت وحشه فأحب اقولك النمره غلط انا يا خويا لا بتاعه تعارف ولا مشي ولا الكلام ده انا سكتي باب بيتنا واكيد مش هيبقي مع واحد متجوز روح شوفلك غيري تتسلي معاها يومين ده اولاً ،ثانياً بقي لو اتكلمت كلمه زياده المحادثه دي هتوصل للمدام واستلقي وعدك بقي كتك القرف راجل عره وانا اللي فكرتك محترم وابن ناس بعتله الفويس ومستنتش يرد وعملتله بلوك فوراً هبدت الفون علي السرير وحطيت ايدي علي قلبي بحاول اتنفس مكنتش قادره افهم ليه بيحصل معايا كده ليه انا بالذات كل ما قلبي يتمني حاجه متجيش وكأن الدنيا بتعاندني وكأني مش من حقي افرح واعيش حلمي زي كل الناس حتي الشخص الوحيد اللي خلي قلبي لاول مره يدق مطلعش المناسب! انا راضيه طول الوقت بقضاء ربنا لكن حقيقي تعبت ونفسي ارتاح واعيش اللي بتمناه ولو مره واحده بس في حياتي *************************************** -كرمله حبيبه عمها عامله ايه ابتسمت بتوتر: -الحمد لله ياحبيبي وحشتني اوي ياعمو حاوط دراعي فأنمشكت في نفسي : -وانتي كمان اوي والله ردت ماما بهدوء: -كده الغيبه دي كلها -معلش والله غصب عني بس خلاص مش هسافر تاني هنستقر في مصر -ده احلي قرار اخدته والله -الا قولي يابابا هو ايه الحلاوه ديه! قالها ابن عمي وهو بيبصلي وبيغمزلي ف اتوترت وقومت من مكاني -ا انا هروح اعملك شاي -مظبوطه بصيتله ببلاهه فبصلي بأبتسامه سمجه: -قهوتي مظبوطه كنت لسه هدخل بس الباب خبط روحت افتح بس هو كان سبقني "احم مساء الخير" سند علي الباب ببرود : -مساء النور -ا احم هو ده بيت الانسه كارما؟؟ -ايوه خير حضرتك -ا انا "انت ايه اللي جابك هنا يابني ادم انت!" -كارما انا ا انا ابن عمي بضيق وملل: -انت ايه أنجز بصله بعدها بصلي بتساؤل: -مين الاخ! رد بابتسامه ساخره: -لا هو المفروض انا اللي أسألك انت مين؟؟ رد بثبات وهو بيحط ايده في جيبه : -انا جاي اطلب ايد الانسه كارما رد بابتسامه سمجه وهو علي وشك يقفل الباب في وشه : -لا معندناش بنات للجواز عن اذنك -محمود استني قولتها وانا بقرب منهم لحد ما وقفت قدامه ورفعت راسي بغيظ وعصبيه: -هو البعيد ايه معندوش دم و..... -انا فعلا كنت متجوز بس مراتي ماتت من سنتين... حطيت وشي في الأرض بأحراج ورديت بهمس: -الله يرحمها -ممكن اقابل والدك؟؟ -انت ليه مُصمم تتجوزني مع انك متعرفش عني حاجه "بقولك ايه يا استاذ البت مخطوبه لابن عمها اتفضل بقي من غير مطرود " بصيت لعمي بصدمه ومن بعدها لقيت "محمود" بيشدني وبيقفل الباب في وشه -ا انت ا انا انا مش فاهمه حاجه هو مين اللي مخطوبه -انتي مخطوبالي من واحنا صغيرين -بس انا معرفش عنك حاجه رد ببرود ولا مبالاه: -مش لازم لما نتجوز هنعرف عن بعض كل حاجه رديت بأعتراض وعصبيه: -وانا مش موافقه هز أكتافه بنفس اللامبالاه: -مش مهم توافقي أو لا -مفيش حد يقدر يجبرني علي حاجه انا مش عايزاها!! قرب مني وهمس جنب ودني بنبره خلتني اتنفض -انا هقدر وفي خلال شهر هتجوزك "بارك الله لكما وبارك عليكما وجمع بينكما في خير وعلي خير" -مبروك ياقمري اخدت نفس عميق وانا بلف راسي نحيته وجوايا براكين تكاد تحرق الاخضر واليابس مش قادره اتخيل حياتي مع شخص زي محمود مشاعره في قمه الق*سوه قلبه ميعرفش يعني ايه حب ابعد ما يكون عن الأنسانيه! مكنتش اتمني في نهايه المطاف ابقي مع شخص قاسي في مشاعره لكنه حُكم القدر -مالك ياعروسه مش فرحانه ليه؟! رديت من بين اسناني : -وهو اللي يشوف وشك يجيله منين الفرح! رفع حاجبه الشمال بسخريه: -لا وانتي وجودك بيعمل بهجه يابت رديت بكُره والدموع بتلمع في عيني: -انا بكره*ك شبك ايده في ايدي بالعافيه وهو بيرد ببرود : -مش مهم المهم انا بحبك -مسيري هسدد تمن الوصل اللي مضيتني عليه من غير ما احس واتطلق منك وابقي حُره -هه هتسددي مليون جنيه! ده انتي محتاجه سنين رديت بضعف ونبره كلها عياط : -انت ليه بتعمل معايا كده انا بنت عمك من لحمك ودمك ليه تجبرني اتجوزك وانا مش بحبك هو مش المفروض اللي يتجوز حد يبقي بيبادله نفس الشعور؟؟ اخد نفس عميق ورد وهو بيبص في عيوني بقسوه: -مش عايز اسمع صوتك -بس... زعق فيا بصوت مكتوم: -اخرسي شويه والناس مشيت حتي بابا وماما اللي أصر عليهم عمي يتعشوا معاه في بيته! مبقاش غير انا وهو وقلبي اللي بيرتجف من الخ*وف طلع كيس من جيب الجاكيت بتاعه واضح أنه بودره فتحه ورش منه علي الطربيزه وبدأ يشم برقت وانكمشت في نفسي: -ا انت ا انت بتشرب مخ*درات؟ رفع رأسه وهو بيحك مناخيره بأبتسامه شي*طانيه -وبتاجر فيها كمان لطمت علي وشي وانا بقول بخوف : -يا*نهار اسود يانهار اس*وووود شد*ني من شعري وهمس في ودني بغيظ: -بطلي ندب ياروح خالتك واسمعيني كويس اوي جوازي منك مش عشان جمال عيونك لا ده عشان تساعديني في الشغل لأن خلاص جوزك حبيبك بقي سوابق واشهر من ال*نار علي العلم عند الحكومه حاولت افك شعري ورديت وانا بعيط بح*رقه : -علي جُثتي اشتغل معاك ساب شعري وفتح الفون بتاعه وحطه قدام عيوني حطيت ايدي علي بوقي وجس*مي كله اترعش : -م ماما ب بابا حرام عليك انت عامل فيهم كده ليه؟؟ هز أكتافه بلا مبالاة: -انا مجرد حابسهم في اوضه ومكتفهم بس لو اصريتي علي رأيك وقتها هيبقي حبس وتعذيب آخرهم انتقال إلي رب كريم -حرام عليك د ده عمك و ودي زي مامتك ضحك المره جامد ورد وهو بيقعد علي الكنبه: -ده إذا كان اخوه نفسه هو اللي عمل فيه كده المصلحه مفيهاش اخويا وابويا ياقلبي ها هتعملي اللي قولتلك عليه ولا تودعي ماما وبابا اترميت علي الكنبه بتوهان : -هعمله سند ظهره علي الكرسي وحط رجل فوق التانيه بغرور : -كده تعجبيني ************************************ بعد مرور شهر -اطلع بسرعه ارجوك قولتها وانا بنهج وبفتح باب اول عربيه قابلتني من غير تفكير -انتي ؟ رديت بخوف وانا برتجف وببص ورايا : -اطلع بسرعه يا ياسين الله يخليك هيقبضوا عليا واتحب*س وانا والله مليش ذنب و والله العظيم مليش ذنب -طب خلاص اهدي طيب محدش هيعملك حاجه متخافيش هزيت راسي اكتر من مره وانا بحاول اتنفس ساق بأقصي سرعه لحد ما قدرنا نبعد عن البوايس وقتها اخدت نفس طويل وانا بغمض عيوني وبسند راسي علي الكرسي بأرهاق -انتي كويسه؟ هزيت راسي بنفي وانفجرت في عياط هستيري كأني كنت منتظره حد يسألني عشان اقول كل اللي في قلبي بدأت احكيله كل حاجه ،جوازي من محمود ،تهد*يده ليا ،شغلي معاه اللي مبكر*هش في حياتي قده ،حياتي اللي اتدم*رت ،اهلي اللي م*ات*وا بسبب الحبسه الطويله حكيتله عن كل لحظه خوف وضعف مروا عليا وانا لوحدي -ا انا ا انا خايفه اوي و والله انا مش وحشه يا ياسين والله مليش ذنب ه هو هو اللي اجبرني اعمل كده وا الله هو اللي اجبرني ا انا عايزه اهرب ع عايزه استخبي م مش هقدر استحمل الحبس ا انا اهلي ماتوا يا ياسين م محمود الحق*ير عذب*هم لحد ما م*اتوا و والدور عليا ب بس بس انا مش عايزه اموت م مش عايزه ام*وت وانا مُذنبه و........ مسك ايدي وضغط عليها بهدوء ونبره دافيه: -هشششش اهدي اهدي خالص متخافيش مش هيحصلك اي حاجه انا معاكي وهساعدك -ا انا خايفه اوي والله يا ياسين انا مش وحشه و والله مستحقش اللي بيحصل فيا ده نفسي ارتاح نفسي اتطمن ولو مره واحده في حياتي -من النهارده مفيش خوف هفضل معاكي لحظه بلحظه مش هسيبك رديت وانا برفع عيوني اللي كلها دموع : -وعد؟! -وعد -هتقدر تحميني؟ رد بهزار: -يعني الناس بتقول اني ظابط وكده ابتسمت وانا باخد نفس عميق وبفتكر اول مره اتقابلنا من سنه معقوله ممكن صدفه واحده تغير حالنا للأفضل ظهور شخص واحد يعوضنا عن سنين التعب والخوف والوحده ظهور ياسين في حياتي كان بمثابه طوق النجاه لشخص بيغرق ومفيش ايد بتتمدله! بعد مرور سبع شهور -متخافيش طول ما انا معاكي اخدت نفس عميق وانا ببصله بأبتسامه صغيره: -عارفه ومش خايفه مسك ايدي وباسها برقه: -انا اسف علي كل لحظه مكنتش معاكي فيها -متتأسفش ده نصيب ربنا حطك في طريقي وحطني في طريقك عشان نبقي عوض لبعض انا عشان اعوضك عن مراتك الله يرحمها وانت عشان تعوضني الايام اللي كنت فيها لوحدي وخاصه بعد موت ماما وبابا -انا بحبك اوي -وانا بحبك اكتر سندت راسي علي صدره وغمضت عيوني براحه وأمان قبل ما اقابل ياسين كنت بسأل نفسي هو فعلا فيه حاجه اسمها حُب؟! انا لا عمري جربته ولا مشاعري اتحركت نحيه حد طول الوقت كنت قافله علي قلبي مليون ترباس طول الوقت خايفه احب وات*أذي اصل في الحقيقة أنا لما بحب حد ببقي مُخلصه في حُبي وبخاف علي قلبه يتجرح بكلمه لكن للاسف كل مره كنت بخاف علي مشاعر اللي حوليا وقلوبهم محدش كان بيتأذي غير قلبي! عشان كده قررت افضل قافله علي قلبي ومحاوطاه لاني لو وقعت مش هقف مره تانيه علي رجلي لحد ما ظهر ياسين وقتها كسرت كل الابواب وسمحت لمشاعري تخرج ليه هو بالذات مكانش عندي اجابه لكن اظن اني وصلتها دلوقتى الاجابه بكل اختصار أنه الشخص الوحيد اللي لاقيه علي مقاس قلبي تخيل حد بيحبك ،بيقدرك ،بيحترمك ،وبيحميك ،والاهم من كل ده احن عليك من نفسك ياسين الشخص الوحيد اللي يستحق اني احبه عمري كُله فوقت من شرودي علي صوت الفون بتاعه وقتها بلعت ريقي بتوتر وبصيتله اخد الفون ومسك ايدي وهو بيهزلي رأسه بيحاول يطمني -الو طمني يااستاذ خالد فضلت اراقب ملامح وشه اللي اتحولت لابتسامه عريضه وهو بيرد علي المُحامي: -طب تمام متشكر جدا جدا يا استاذ خالد قفل معاه وبصلي كانت عيوني بتلمع بالدموع قرب مني وضمني بهدوء وباس راسي: -مبروك علي محمود وعمك الحكم المؤبد مسكت في التيشيرت بتاعه وانفجرت في العياط وانا بردد بفرحه : -الحمد لله الحمد لله يارب بصيت علي الصوره بتاعه ماما وبابا اللي في الصالون حسيت كأنهم بيضحكولي اني جبت حقهم -شكراً يا ياسين ربنا يخليك ليا يارب مسح دموعي برقه ومسك ايدي الاتنين : -ممكن كفايه عياط ونكد بقي ده ايه الحزن اللي احنا فيه دييييه ضحكت وهو كمان ضحك بعدها سمعنا صوت الفون بتاعي رديت بسرعه اول ما شوفت الرقم -الو مدام كارما معايا -ايوه حضرتك اتفضلي -نتائج التحليل ظهرت مبروك حضرتك حامل اتنفضت من مكاني بسعاده : -الله يبارك فيكي شكراً قفلت معاها وبصيت لياسين اللي بصلي بتساؤل: -انا حامل يا ياسين -وحياه ابوكي؟؟ رديت بفرحه -اه والله انا حامل ضمني وهو بيتنهد وبيرفع رأسه للسقف: -الحمد لله يارب الحمد لله فاشكر ربنا اني لقيتك واني لـ حظّي جنايني ورودِك وان النعمه اللي كتيره عليا وعلى قلبي هي وجودِك❤️ تمت #نعمه_وجودك #إيمان_شلبي

مقالات ذات صلة

رواية كاملة

رواية ليلى الجزء الأول حصري ج1

كفا عذا,,با الجزء الاول

عشقك نار

اترك تعليقاً إلغاء الرد