-لا عارف بس بيستعبط
-تسمحيلي أسألك ايه السبب؟؟
-السبب أن مش هو ده اللي هيسندني لما اقع مره تانيه
رفع حاجبه باستغراب :
-مش فاهم
اخدت نفس عميق وبصيت قدامي وانا بحكي كل اللي حاسه بيه من غير خوف أو كسوف
-ببساطه عرفت ان مش محسن الشخص اللي هجري عليه وقت احتياجي وهلاقي أيده ممدوده!
بابا مات من حوالي أربع شهور ودخلت في حاله اكتئاب ولا مره لقيته جنبي علي الاقل بيحاول يهون عليا
كل مره كان يجي يشوفني تقضيه واجب ، خمس دقائق ويمشي لانه زهق مني ومن شكلي وعياطي المتواصل
بصيتله بتساؤل:
-مش المفروض اللي بيحب حد بيفضل معاه في كل حالاته
هز رأسه بهدوء :
-اكيد
-كنت متوقعه أن كل الناس هتتخلي عني إلا هو لكن خيب كل املي وبقيت لوحدي
هل ده مش سبب كافي عشان اسيبه؟!
-لا سبب كافي ومحدش يقدر يلومك
البنت بتختار الشخص اللي هتكمل معاه حياتها لما تحس معاه بأمان وتبقي واثقه ومتأكده انها لو وقعت في يوم هتلاقيه في ظهرها بيسندها ويدعمها عشان تقوم من تاني
-وانا ملقتش ده في محسن واكتشفت أنه سطحي وعمره ما حبني زي ما بيقول تعرف ؟!
انا وزني زاد لما تعبت وهو مش قادر يتقبل شكلي وبيجبرني اخس عشان شكلنا قدام الناس يوم الفرح ومش فارق معاه حتي نفسيتي اللي تعبانه
كنت متوقعه يرجعلي ثقتي في نفسي اللي اتهزت لكن للاسف حصل اسوء مما اتخيل
ابتسم وبصلي بحزن:
-كنت جاي اقنعك ترجعي عن قرارك لانه شكله بيحبك بس بعد اللي سمعته منك انا اللي بقولك اوعي تفكري تكملي مع شخص زي ده
هزيت راسي وانا بتنهد تنهيده طويله وقومت من مكاني وبصيتله بأمتنان:
-شكراً انك سمعتني واكدتلي أن قراري صح
هز رأسه بابتسامه لطيفه برزت الغمازه اللي علي خده اليمين ورد :
-ربنا يوفقك ويريح قلبك
-عن اذنك
-تقييي
وقفت مكاني اول ما سمعت صوت “مُحسن” وفجأه حسيت رجلي بتتهز وقلبي بيدق بخوف مش طبيعي وكأني سمعت صوت شبح!
شدني من دراعي وبصلي بعيون بتلمع بالشر :
-لو فاكره انك هتقدري تلغي الفرح تبقي بتحلمي ولو….
“لو فاكر انت انك تقدر تجبرها انها تتجوزك تبقي بتحلم يا استاذ مُحسن”
بصله مُحسن وهو بيبتسم بسخريه :
-ايه ياكابتن حبيت خطيبتي اللي كنت جاي تصلح ما بيني انا وهي ولا ايه!!
بص في عيونه ورد بهدوء مُريب:
-وعرضت عليها الجواز كمان وهي موافقه مش كده يا تقي؟
#إيمان_شلبي
#ملجأي