غمضت عيوني جامد وانا بحاول اكتم العياط اللي كان جوايا بس مقدرتش وفجأه انفجرت في العياط
سامر بلهفه:
-ثراء ثراء في ايه مالك مين زعلك طيب حد زعلك ط طب أنا زعلتك طيب ا انا عملت حاجه زعلتك من غير ما احس؟؟
هزيت راسي وانا بشهق بعنف :
-لا
-اومال ايه طيب في ايه ياحبيبتي مالك أن…
قاطعته بعياط:
-انا مش عايزه اكمل ياسامر
ـــــــــــــــــــــــــــــــــــــــــــــــــــــــــــــــــــــــــــــــــــــــــ
-يامصيبتي السودا سيبتي خطيبك ؟!
قالتها ماما وهي بتصرخ في وشي وبتضر*ب علي صدرها بصدمه وذهول
بلعت ريقي بتوتر وانا ببعد خطوه لورا:
-ا انا ا انا قولتله مش عايزه اكمل وهو كأنه ما صدق قالي يلا نمشي ووصلني لحد هنا ومشي من غير ما ينطق ولا حرف
قربت مني وهي بتشدني من دراعي وبتغرز صوابعها في لحمي
-وانتي مش عايزه تكملي ليه ياهانم ها أنا اقولك ليه مش عايزه تكملي عشان حضرتك لسه واهمه نفسك أن “ايهم ” باشا هيحبك وهيرجعلك وتكتمل قصه حب اسطوريه مش كده وانتي اصلا ولا في باله
اسمعي يابت انتي قسماً عظماً لو ما اتصلتي دلوقتي بسامر واعتذرتي عن اللي حصل لهكون منزله الشبشب علي نفوخك وهطين عيشتك
عيطت جامد وانا بحاول ابعد عنها :
-ياستي انا مش بحبه مش عايزاه هو الجواز بالعافيه يانااااس
جزت علي أسنانها بغيظ :
-اه بالعافيه
-ياماما عشان خاطري افهميني انا مش عايزه اظلمه معايا انا لو اتجوزت سامر لا انا هكون مبسوطه ولا هو كمان هيتبسط لاني مش هعرف اديله مشاعر ،ارجوكي عشان خاطري متغصبنيش علي حاجه انا مش عايزاها!
ضحكت بسخرية :
-لا والله وانتي فاكره اني ممكن اصدق الكلمتين الحمضانين دول لا ياحبيبتي فوووقي انتي الكلمتين دول تضحكي بيهم علي ابوكي ولا اخوكي لكن انا عارفه اللي فيها ،عارفه انك اول ما سي زفت طلق علياء بنت خالتك وانتي دماغك شغاله وبتفكري تسيبي سامر ،اه مانتي
هتلاقي فرصه احسن من كده فين عشان تتقربي من ايهم
-ياماما بقي حرام عليكي متظلمنيش انا….
قطعت كلامي لما الباب اتفتح ودخل بابا و وراه محمد اخويا
-السلام عليكم
محمد باستغراب :
-ايه ده في ايه ياماما
لوت بوقها بسخريه :
-تعالي شوف الخيبه اللي احنا فيها الهانم اختك سابت خطيبها
بابا بذهول :
-نعم سابته ازاي يعني؟!
-هو ايه اللي سابته ازاي سابته زي الناس راحت قالتله كده سامر انا مش عايزه اكمل
-ياماما ازاي بس ده سامر لسه مكلم بابا
ردت بعيون بتلمع بالدموع :
-طبعا تلاقيه كان عايز يقولك اللي بنتك هببته
وكأنها معندهاش رجاله تاخد رأيهم وتتكلم معاهم
الهانم بتتصرف من دماغها
محمد بضيق :
-ياستي اسمعي بقي سامر كلم بابا قاله انا عايز اقابلك بس مقالهوش اي حاجه اصلا
-ماهو هيبقي عايز يقابله ليه يا اذكي اخواتك اكيد جاي ياخد شبكته
بابا بجمود وهو بيبصلي :
-وحضرتك مش عايزه تكملي ليه يا استاذه ثراء؟؟
بلعت ريقي وانا بترعش وبصوت مهزوز :
-ع عشان ع عشان ا انا ا انا يابابا
ماما بزعيق :
-انا اقولك يا حج بنتك عايزه تسيب خطيبها عشان مش بتحبه خايفه تظلمه معاها ياحرام
بابا باستغراب:
-نعم جايه بعد سنه خطوبه تقوليلي مش بتحبه؟؟
انتي جرا في عقلك حاجه يابت انتي
-يابابا افهمني ا….
قاطعني بحده وحزم:
-افهم ايه ياهانم ولما حضرتك مش بتحبيه كملتي معاه ليه وافقتي من البدايه انك تتخطبيله ليه؟!
حطيت وشي في الأرض وانا بفرك ايدي بتوتر وبهمس بخوف:
-قولت اديله فرصه
-فرصه!
محمد بسخريه:
-طب اللي بيدي حد فرصه بتبقي شهر اتنين تلاته إنما مش بعد ما كملتي سنه جايه تقولي والله انا مش عايزه اكمل
أصل متقنعنيش أنك لو مش بتحبيه هتكملي معاه سنه
بابا وهو بيبصلي بجمود :
-سامر جاي يحدد معاد كتب الكتاب
-نعم!!!
-زي ما سمعتي جاي يحدد المعاد
وانا هوافق علي اي معاد يحدده وانتي كمان هتوافقي برضاكي أو غصب عنك خلص الكلام..
يُتبع
#صراع_القلب_والعقل
#إيمان_شلبي