البارت الثاني 🖤بقلمي إيمان شلبي
“بداخل احدي الكافيهات”
-كنت عارف اني هلاقيكي هنا
-سامر!
-كلمتك كتير جدا تليفونك كان مقفول كلمت ماما قالتلي انك مخنوقه شويه ونزلتي بس متعرفش انتي روحتي فين
رفعت حاجبي بذهول :
-وانت عرفت اني هنا ازاي ؟
-عشان انتي مره قولتيلي انك لما بتبقي مخنوقه اوي بتيجي هنا
اتنهدت بحزن وانا ببص للبحر وبهز راسي من غير ما انطق حرف زياده
قعد علي الكرسي اللي قدامي ومسك ايدي وهو بيبصلي بحنان وبيقولي :
-وجودي هنا مش تطفل عليكي ،ولا حابب اعرف السبب إلا لو انتي بنفسك جيتي وقولتيلي انا بس محبتش اسيبك لدماغك تسوحك حتي لو مش هنتكلم حتي لو مش هعرف السبب بس عايزك تعرفي اني جنبك دائماً
قال جملته الاخيره وهو بيبوس ايدي برقه وحنان العالم
ياااه قد ايه هو جميل وقلبه جميل
لو بس كنت قابلته في ظروف تانيه
لو بس قلبي مكانش متعلق ب”ايهم”
لو بس كان يبقي هو اول حب وتكمل قصتنا للنهايه بدون جروح!
لو بس كل حاجه حصلت زي ما اتمنيت من صُغري
مكانش ده بقي حالي
مكنتش هفضل عايشه في حيره وصراعات مبتنتهيش بين قلبي وعقلي
مكنتش هظلم طرف تالت في الموضوع
كل ذنبه أنه حبني واشتراني من بين مليون بنت وقدرني واحتوي حزني ووجع قلبي
كل ذنبه أنه قدملي قلبه علي طبق من دهب وهو واثق اني مش هأذيه وفي النهايه أذيته وحطمته بحُبي لشخص تاني من وراه!
وكأن عمرو حسن بيوجهله الكلام بقصيده حبيتك ليه؟!
من بين اربعه مليار واحدة اخترتك
حبّيتك وكمان قدّرتك
والكلمه اللي بتخرج منك
اجمل من أي كلام مسموع
اشبع لو شفتك يوم صدفه
وان غبتي ليالي بم*وت م الجوع
قصر الموضوع انك لعنه
وان انا ملعون
وان وجودك على قد ما طيّب مش مضمون
ــــــــــــــــــــــــــــــــــــــــــــــــــــــــــــــــــــــــــــــــــــــــــ
-احسن دلوقتي ؟
سألني بهدوء وهو بيضغط علي ايدي اللي كان ماسكها
فوقت من شرودي وبصيتله وانا ببتسم ببهوت:
-الحمد لله
-تحبي نقوم نتمشي شويه
سكت لحظه بفكر في عرضه
بعدها ابتسمت وانا بهز راسي بموافقه
-تمام
بعد شويه
كُنا بنتمشي علي البحر
شابكين ايدينا في ايدين بعض
مازالت الصراعات جوايا مش راضيه ترحمني
مازال شعوري من نحيته مبيتغيرش
مازال الحب مدقش علي قلبي
وازاي يدق و”ايهم” مستوطن جواه!
مازال في صوت جوايا بيقولي
“ابعدي ياثراء متظلميش سامر معاكي طالما مش بتحبيه
سيبيه لحد يستاهله ويقدره مادام انتي مش هتقدريه”
وقفت فجأه وسحبت ايدي من أيده وانا بقف قدامه وبقول بسرعه ولهفه
-سامر انا عايزه اقولك علي حاجه
-قولي ياحبيبتي سامعك
بلعت ريقي بصعوبه وانا بفرك في ايدي بتوتر :
-سامر ا انا ا انا…..
قطعت جملتي لما هو شاورلي بأيده بلهفه
-ثانيه واحده
طلع يجري علي واحد بتاع غزل بنات وجابلي منه حوالي خمسه عشان مره قولتله اني بحبه
من وقتها وهو كل ما يشوف الراجل يجبلي من غير حتي ما اطلب منه!
مسحت علي وشي وعيوني بتلمع بالدموع :
-ياربييي عمايلك ديه بتصعب الأمور عليا اكتر ماهي صعبه
قرب مني ومدلي أيده بالكيسه وهو بيبتسم بهدوء
-ها ياقلبي كنتي عايزه تقولي ايه؟