دخلت وانا عينى فى الارض….مكسوفة بقا… حطيت الصنية اللى عليها العصير ….وانا ايدى بترتجف….
ميجيش فىبالكم انى خايفه من العريس والمقابله ،لااااا خالص….
انا خايفه الكاسات تقع ويبقى شكلى وحش…..
والفستان لسه جديد….
ويمكن اغسل السجادفيها…
بلمح بطرف عينى ….شوفت يعنى لامؤاخذه حاجه سمراء وسودا وبتلمع…..دققت اوى….يانهارك اسود زى جزمتك….
يعنى طول النهار….اشيل وانفض سجاد وامسح….
واجهز واحطت زفت زيارات ….
واطلع كاسات من النيش ….
وفى الاخر سعادتك داخل بالجزمة…..
ايه التناكة دى…..
داانت يومك اسود بس بابا الراجل الكبارة دا يخرج…..عشان ميبقاش شكلى وحشى قدامه
كل دا ولسه مشفتش وشه ولا شكله….انا شفت الجزمة بس. لامواخذة يعنى ….بس بصراحة عليها لمعه…. مرايه….من المصنع على عندنا علطووول………تقولش لابسها قدام باب الشقة
بابا:دى بنتى الدكتوره هايدى يا حضرة الظابط
انا:ظابط…ظابط…الله كان نفسى اتجوز ظابط …..ظابط وجزمته بتلمع….حلو…..قلبى بيدق….عايزة اشوف وشه مش عارفه…..
يالا يا حج قوم الله يخليك….
عايز اخد فرصتى مش عارفه خالص
الظابط:تشرفنا يا دكتورة هايدى
انا:قال هايدى ….هايدى …..ياختااااى….صوته حلو
ايوة انا….هايدى فريد…..دكتورة صيدلانية…..عندى ٢٣سنه…..حلوة وزى القمر…..انا شايفه نفسى كده وعجبانى…..
آآآآآآه….ظابط وصوته حلو وجزمته بتلمع…..قلبى
بابا: هسيبكم شويه مع بعض…..بس خلى بالك يا حمزة يابنى ….ميغركش هدوء الدكتورة….صحيح يا هايدى …انتى كويسه مش عوايدك ساكته يعنى
انا ابتسمت وشى احمر من الكسوف….فضحتينى ياحااااج….
استنوا استنوا….قال اسمه حمزة….لا بقى دى علامه يا مارد
خرج بابا وسى حمزة قام من مكانه وقعد على الكرسى اللى جنبى….
مقلكمش دى قلبى هو اللى خرج من مكانه
مش عارفه …
كل دا ولسه مرفعتش عينى ولا شفته…
مش عارفه اللحظه دى هتيجى امته….
حمزة:ازيك يا دكتوره عامله ايه
ياختاااى على الدكتورة وسنينها….
دى عايزة دكتور قلب…واعصاب…دى عايزة كونسلتو… ورديت بخجل بس بجد المرة دى….الحمد لله بخير
حمزة بابتسامة:الشوز حلوة شايفك مرفعتيش عينك من عليها
انا
لا بقا انا لازم اشوف خلقتك…جزمة ايه يا جزمة انت …
رفعت حاجبى وعينى وبصتله…..
ويارتنى ما بصيت …..
لقيتنى بقول بصوت عالى ….يخربيت حلاوتك هو فيه كده….
كنت فاكراه الناس دى فى الروايات بس….دا فى الحقيقة كمان اهو
ضحك حمزة اوى اوى….بصوت عالى جدا
حمزة:انت بتعاكسينى لا خلى بالك انا بتكسف
انا بقى روحت فى خبر كاااان…وعقلى وقلبى بيتكلموا وبيتخانقوا سوا….
كان نفسى اقوم اجرى من قدامة….هو مش طلع حلو دا طلع مز اوى…مز السنييين
لا لا ابص للجزمة احسن…..
يارتنى كنت وقعت العصير احسن من اللى قلته
لا اجمدى كده يا هايدى ….انتى هتخافى ولا ايه….ميغركيش الحلاوة دى…. شفنا حلاوة كتير …مش بالحلاوة…
لا ياختى دا غير…مش حلاوة الموسم هى …دى حلاوة من عند العبد الكحك اللى سعر الكليو ٨٠٠ ج باااااس
حلو واسمه حمزة وظابط….جديدة دى
حمزة:سكتي ليه….اتكلمى…
انا خدت القرار وقررت انتقم للسجادة احسن
وحاولت اتخن صوتى….واتجاهل ان بابا عرفنى بيه…واعمل برستيج شويه…بس بعد ايه….
هو حضرتك اسمك ايه وتشتغل ايه…
حمزه:بدانا التجاهل….ماشى يا دكتورة هايدى….براحتك
وهو يقول هايدى من هنا وانا قلبى يقول عريس ياماااى من هناياختى ياختى
هتجوزه يابووووى
حمزة:زى ماسمعت والدك بيقول حضرت الظابط حمزة
اسمى حمزة محمد الحسينى….عندى ٢٩ سنه….رائد….عندى شقه وعربيه وعايز عروسه
انا تنحت… وقلت ها بعدين
حمزة….. لا دى مفيهاش بعدين ….لان بعدين فرحنا كمان ٦شهور والشبكه وكتب الكتاب يوم الجمعة
قلت لنفسى ايه دا…. دا واخد فى نفسه قلم جامد اوى
انا لبست الوش الخشب بقا….هو يعنى عشان حلو حبيتين اتهز….دا احنا جامدين اوى
هايدى:وانت بقا جاى عايزينى اشوفلك عروسه مناسبه ولا ايه
ضحك حمزة :لا متتعبيش نفسك انا شفت العروسه وعجبتني…انا جاى عشان هى تشوفنى بس وابلغها قرارى…ان الشبكه يوم الجمعة
هايدى:الف الف مبروك وربنا يتمم بخير….بس برده انا دورى ايه
حمزة:العروسه
هايدى:ياراجل قول كلام غير دا ….كلفت خاطرك اوى وقلتلى انى العروسه
حمزة:شفتى انا كريم ازاى….عايزه تعرفى حاجه تانيه…قول ماتتكسفيش…
انا اساسا بقيت بطلع نار من ودانى….
لقتنى بقوله….يعنى شفتنى عجبتك اتقدمت وحددت شبكه وفرح وكتب كتاب من اغير مااعرف ولا اقول راى
حمزة:ماانا بقولك اهو… لو عايزة تسالى على حاجه….او عايزة حاجه
هايدى:يعنى موافقتى تحصيل حاصل….
حمزة:اينعم سيدتى
هايدى:يعنى انتى مجهز كل حاجه حتى من قبل ماتيجى البيت
حمزة:ايوة….مامتك قالتلى ان انهارده اجازتك….واجيلكم على الساعة ٧
هايدى بصوت مسموع :ماشى يا تهانى والله لما اخرجلك…كنتى بتدبسينى فى السجاد
حمزة:افندم…بتقولى ايه
هايدى:اسكت وسيبنى فى حالى الله يكرمك ياخويا…
حمزة بيبصلها باستغراب ….وتكمل كلامها بطريقه كوميديه…. تهانى امى الله يسامحها…قالتلى العريس جاى ولازم ننضف ونمسح وشيل وحط وظهرى اتقطم ياخويا والله…
وفى الاخر حضرتك جاى وموافق….
لا وكمان داخل بالجزمة….
دا يرضيك يا حضرة الظابط
حمزة مقدرش نفسة من كثرة الضحك….رد وقال
عشان كده كنتى بتبصى على الشوز
هايدى:احنا فى شبرا يا خويا يعنى تقول جزمة….لما تبقى فى الزمالك ابقى قول شوز
زادت ابتسامه حمزة :ماشى يا هايدى المرة الجاية هبقى اخلع الش..الجزمة بره
هايدى:هو لسه فية مرة جايه…..لا انا مش موافقة
حمزة…قام وقف واخد نظارته لبسها ومسك مفتاح عربيته وموبايله…على رايك …المرة الجايه كتب الكتاب…فى المسجد وكده كده لازم كلنا نخلع
هايدى…بص يااخ ….مش عشان ظابط وحلو حبتين تلاته اربعة كده واسمك حمزة ….اقوم اوافق عليك عليك من غير تسمعنى وتسمع شروطى
قعد حمزة تانى…ورجع ظهره لورا….
وحط رجل على رجل…..
اتفضلى هاسمع شروطك كلهاوموافق عليها
هايدى:يخربيت حلاوتك دى ….بقولك ايه اتكل على الله كده….قوم خد حلاوتك دى ومشى….مش هتجوز واحد حلو انا….البنات تعاكس فيه وانا ماشيه معاه
حمزة:على كده بقى اما نتجوز…..هحبس نص رجالة البلد واقلع عنين النص التانى….
دكت حصونها دكا ….دكا
وكمل حمزة كلامه…..بصوت عذب
مفيهاش فصال….
هتجوز البنت اللى دخلت الصيدليه…مرفعتش عنيها فيا ولافي حد داخل ….ملهاش غير فى الروجيتات….خدت قلبى قبل ماتاخد الروجيته.
البنوته اللى خلصت شغلها ولقت ست بسيطه ….راحت اشترت اكل واديتهلها….
اللى لما واحد بس حاول يقولها كلمة يعاكسها كانت شنطتها فى وشه ….
وصلت شارعها الناس مبسوطه لما شافتها…بيقولوا يا زين ماربى الاستاذ فريد والست تهانى…
تفتكرى بعد دا كله انى ممكن حتى اسيبها…
دا لو مرضيتش نتجوز هلبسها كلابشات….واسجنها بس جوه قلبى وبيتى….
هو انت كنت بتراقينى….شفتنى امته ….فين وعرفتها…
حمزه….من يومين….بس مقدرتش استنى اكتر من كده…جتلكم امبارح وانتى بره….والنهارده جيتلك
هايدى…مكنتش قادرة اتكلم ولا ارد … لقتنى بقول….هو فيه قول بعد قولك يا سى حمزة….الى تشوفه يا خويا
حمزة مبطلش ضحك على كلامها
استنى …استنى..
حمزة قال نعم….فى ايه
هو انت مش هتقعد على ركبه واحدة وتطلع خاتم وتقولى تتجوزينى
لا انا بشوف المشهد دا كتير ….
قام وقف وقرب منى….لا دا خليه بعد الكتاب عشان برده بيحصل معاه حاجات تانيه استغفر الله العظيم كده ومش هتنفع النهارده…واحنا لازم نعمل المشهد كااامل…الشغل شغل….
انا مش هينفع اقعد اكتر من كده….انتى خطر والله….سلااااام معادنا يوم الجمعة أن شاءالله
هايدى….ولا انا عايزاك تقعد اكتر من كده….اتكل على قلت بحلاوتك دى من بدرى
وضحكت وقلت معادنا يوم الجمعة
مشى حمزة…..
عريس يامااااااى …..عريس يامااااااى
هتجوزه يا بوووووى
اسمه حمزة وظابط…..يا بوووووى يا مااااااى
مشى حمزة…..
عريس يامااااااى …..عريس يامااااااى
هتجوزه يا بوووووى
اسمه حمزة وظابط…..يا بوووووى يا مااااااى
تهانى:انت انجنتنى يا هايدى…..مالك اهدى كده….ولا انت اساسا مجنونه من يومك…..اشمعنا دا ياختى عريس يامااااااى…..ماطول العمر البيت رايح جاى عليه عرسان …..
تهااااانى……تعاليلي بقى يا مامتى يا ست الكل يا حلوة …
دا انا كنت مستنيه يمشى عشان اخرجلك
تهانى:واهو مشى واديكى خرجتى …..زى شريط الكاست اللى محتاج قلم بلبيسه عشان نلفه….بدل ما هو معلق
عريس ياماااى ….هتجوزه يابوووى
هايدى….اهدى كده يا خالتى ام هايدى
وواحده واحده عليا….
لما هو البيت طول عمره رايح جاى عليه عرسان…..
اشمعنا المرة دى اللى خليتنا انظف السجاد واشيل واحط وامسح….ضهرى اتقطم وفرهدتينى مبقتش مركزه بقول للراجل ايه….
ماكنتى خليتيها زى كل مرة….
ضحكت تهانى….اصل كنت حاسه المرة دى غير كل مرة
فكان لازم تتعبى شويه….
قبل كده انا اللى كنت بعمل …بس كان عادى….
انما سى حمزة بقا لازم نلمع البيت عشان خاطره ونخليه بيلمع كده وزى الفل
هايدى:ايوة يعنى زى جزمته كده……انا اللمع وانظف…..وهو بجزمته اللى بتلمع ….عكس على السجادة….آآآآآآه ياظهرى….مش هنسهالك يا تهانى
تهانى…..ههههههه.. لا ياحبيبة تهانى …..بكرة تجوزى حضرة الظابط وتنسى تهانى نفسها مش السجاد
هايدى….اللى الحاج فين
تهانى….نزل مع سى حمزه بتاعك….الل صحيح يا هايدى هو كان بيضحك قوى كده ليه…..
هايدى….اصل قولتله يخربيت حلاوتك دى….
برقت تهانى…..وقالت بجد يا هايدى قولتله كده
حركت هايدى راسها لفوق ولتحت بمعنى ايوه…
تهانى….يخربيت دماغك انتى ….انا قلت مجنونه وهتفضحينا….يعنى الراجل راح مش راجع….تستاهلى هدت حيلك فى السجاد
هايدى…..لااااا ماانا قولتله هو فيه قول بعد قولك يا سى حمزه
واهو سى حمزه مامته هتيجى بعد بكرة… بس هو يمكن يكون عنده شغل وميجيش…. قالهافريد وهو جاى عليهم
تهانى….بجد يا فريد هيرجع تانى…
هايدى…..ايه يا ماما ولا مرجعش عادى يعنى….يجى غيره
تهانى….وغيره يمشى زى اللى قبله….الى زيك بقى معاهم عيال
هايدى….ايوه اسطوانه كل عريس….الى زيك بقى معاهم عيال….عندك كام سنه….هتفضلى قاعده معايا علطول….سعاد اصغر منك ومش حلوة زيك…واتجوزت
تفيده….معاها…كليه….واتجوزت ومعاها ٣ عيال…
اللى صحيح يامامتى هو حمزه جاب حاجه حلوه وهو جاى جاتو ولا شيكولاته
اى حاجه من سى حمزة حلوة
اه ياااانى تعبت وعايزه احلى
تهانى…وهى ترفع يدها الى الاعلى.. صبرنى يارب
رجع حمزة بيته….
مامته بتساله ….ايه الاخبار عملت ايه…
والعروسه اخبارها ايه…..حلوه ….طويله ….قصيره….اتكلم يابنى
حمزة ضحك….اى يا ماما كل دا ….بعد بكرة هتشوفيها…..وتعرفي بنفسك
نفين مامت حمزة….طيب طمنى بس
حمزة بضحك….هى لاطويله ولا قصيرة….ولا تخينه ولا رفيعة
نفين…..ووشها بشوش
حمزة ….وعرفتى منين يا ماما
نفين بغضب…..جرالك ايه حمزه هو انا بقولك اوصفلى عادل امام فى العراف
حمزه بيضحك بصوت عالى ….ماما هايدى مببتوصفش ….دى مفاجاة…بس يارب تعجبك…
لازم تقعدى معاها….وتتكلمى معاها…وربنا يستر
نفين….يعنى مش هتريحنى…
ملهاش صور طيب
حمزه….طيب اذاى ….اقولها عن اذنك اصورك ل ماما…
عن اذنك اريح شويه عشان عندى شغل
نفين….ظابط ومش هعرف اخد منه كلمه…..
ضحك حمزه ومشى…
مشى حمزة شويه ومامته نادت ….حمزة ….انت نسيت الشوز بتاعك هنا….انت ماشى على السجاد حافى….
رجع حمزه واخد الشوز….وبيبصلها اوى وبيضحك
نفين….لا حول ولا قوة الا بالله….البنت جننت الولد من اول يوم
حمزة….والله بكرة اعرف رايك فيها….انا مستنى رايك
واخد الشوز و داخل اوضه نومه ….مامته نادت عليه تانى.. حمزه …يابنى متلبس الجزمة ولا هتفضل شايلها فى ايدك..ولا حطها فى اى حته
حمزة… معلش ياماما انا عايزها
دخل حمزة اخيرا اوضته….وقعد يسترجع مقابلته مع هايدى….بيندم انه مقالش ل فريد انه يروح لهم بكره…
******
فضلت هايدى مع مامتهابيرتبوا هتلبس ايه ولما حماتها هتيجى…. هيقدموا ايه….
لحد يوم المقابله….
تهانى….هايدى خلى بالك من كلامك ….وتركزى وبلاش تفضحينيا الست اول مرة تزورنا….
هايدى ….هو انا اول مرة هقابل حد…فى اى ياما اطمنى خالص
تهانى حطت ايديها على قلبها….اه يا خوفي….
استر يارب….
******
قدام شقه هايدى….
حمزة واقف قبل مايرن الجرس….طيب يقول لمامته تخلع الشوز….ولا هو هيخلعها ولا هيعمل ايه….
نفين…..انت هتصور الجرس مترن يابنى ولا هنفضل واقفين كده….
حمزة…..ماما بصى انت يعنى…
نفين…..حمزة مالك مش على بعضك….وسع كده ورنت الجرس ….
فتح فريد الباب واستقبلهم….
دخلت نفين …وحمزة وقف ثوانى ….خلع الشوز ودخل….
نفين بتشوف حمزه اتأخر ليه ….لقته بيخلع الشوز
….والله الواد ماهو طبيعى….هنشوف
دخلوا الصالون….وقعدوا…
فى المطبخ….
تهانى….هتعرفى تشيلى الصنيه ولا اشيلها انا….ركزى كده ومش عايزه هبل واتكلمى بصوت واطى….وردى على قد السؤال
هايدى….ايه يا ماما الوصايا العشر دى….خلاص قلنا …
تهانى….والله عارفه كلامى دخل من هنا وطلع من الناحيه الثانيه….استر يارب…
هايدى….يلا ياتهانى ربنا يهديك ….ادخلى انتى وانا هاجى وراكى…
تهانى….انا لو جالى شلل انتى السبب….انت العروسه يا موكسه….المفروض تكوني مكسوفه….خايفه….لكن ازاى…
هايدى….سيبى الناس قاعدة بقا وخلينا هنا….هابهرك ماقلقيش يا تهانى….
تهانى….يارب ياهايدى ….مش هادعى احسن….
مشيت تهانى ودخلت ورحبت ب حمزة ومامته….شويه ووالد هايدى خرج….ودخلت المحروسه….اقصد هايدى
عريس_يامااااى وفاءالغرباوى
*****
دخلت هايدى شايله الصنيه بس المرة دى….مش قلقانه من السجاد ولا من حمزة ….
قلقانه من الست المفروض انها حماتها….فى مقام والدتها ياترى بقا عامله ازاى
هايدى….السلام عليكم
وحطت الصنيه ورفعت وشها بابتسامة هاديه ….
شافت واحده شكلها صغير …..لبسها شيك اوى….حاطه مكياج….يدوب مكملتش ٣٠ سنه
بصت شمال ويمين حواليها ….ملقتش حد ….
هى الست لحقت تهرب ….انا لسه معملتش حاجه
تهانى ….مالك يا هايدى بتبصى على ايه…تعالى سلمى على طنط
هايدى ….فين طنط…بدور عليها … انا مش شايفه غير المزة دى….
ضحك حمزة ومامته….بصوت عالى
تهانى بقت حاسه انها قاعدة في نص هدومها….
ووجهت هايدى كلامها ل حمزه
انت مش قلت انك ملكش اخوات….القمر تبقى مين….وفين مامتك بابا قال انها هتيجى معاك
شدتها تهانى بسرعة….دى طنط نفين يا هايدى…مامت حمزه
هايدى….طنط مين ….دا انا اللى طنط
حمزة ومامته بيضحكوا…..
حمزة….قلتلى اوصفلك هايدى يا ماما… قلتلك ماتتوصفش دى تقعدى معاها…
ضحكت نفين …معاك حق يابنى والله
هايدى بصوت واضح ومرح
طنط ازاى….وازاى بتقولها يا ماما….انا لو منك انا هتبرا منه
تهانى والله انا هتبرا منك ومن لسانك…صبرنى يارب
معلش يا مدام نفين…بس هايدى يعنى…
هايدى بسرعة….انا راضيه ذمتك يا تهانى….اقولها طنط ازاى ولا هو يقولها ماما ازاى…
نفين….تعالى جنبى يا هايدى…انت دمك خفيف اوى…شكلنا هنبقى اصحاب اوى
هايدى…اكيد طبعا اصحاب….الفرق بينا مش كبير انا عندى ٢٣ سنه وانتى يدوب لسه ٢٠ سنه
حمزه مش قادر يمسك نفسه من الضحك ولا مامته…
لكزتها تهانى فى كتفها….اخرصى بقا
هايدى….والله دى حاطه لون روج انا مش بحطه…بصى
دا كتير والله قال اقولها طنط ولا ماما…
دى كمان اسمها نفين…
قامت من مكانها وقعدت جنب نفين…طيب بصى كده يا نيفو….دى مامتى… شكلها ام….اسمها تهانى عادى…بس انتى ازاى…ام واسمك نفين ….ازاى…قوليلى طيب ….انت خلفتيه ازاى…
نفين مش قادرة تمسك نفسها من الضحك وحمزه كمان…بس تهانى قاعدة فى نص هدومها….بتقول يا ارض اتشقى وابلعينى….بنتى هتجيبلى جلطه
قعدوا شويه وسط مرح هايدى…..وحمزه اللى مبسوط ان مامته فرحانه ب هايدى…..
حمزه غمز مامته انه يسبوه مع هايدى لوحدهم…..
فهمت نفين وطلبت من تهانى انهم يقعدوا سوا لوحدهم
يتفقوا بقا على الشبكه منين والفستان
وسابوا حمزه وهايدي لوحدهم
عريس_يامااااى…وفاءالغرباوى
######
يدوب تهانى ونفين خرجوا…..هايدى حست انه اكيد هيجى يقعد جنبها…..قامت وقفت بسرعه
حمزه….فى ايه ياهايدى….وقفتى ليه….وبدأ يتحرك من مكانه
هايدى…تانى هيقول هايدى…. ورفعت ايديها فى وشه…..اقف مكانك….
حمزه استغرب ….فى اي
هايدى….عشان نكون على نور من الاول كده….متقوليش ياهايدى
حمزه….نعم …اومال اقولك ايه يادكتورة
هايدى ….ولا حتى دى
حمزه خرج نفس طويل….الهانم بقا عايزانى اناديلها بايه
هايدى حست انها ضايقته….
اى حاجه…انت مش فاهم ياسى حمزة ….هايدى منك يعنى….
ابتسم حمزة….طيب لما انتى تقولى سى حمزه….انا اقول ايه ياست هايدى….ولا يا برنسس هايدى…مهو مش معقول اقولك يا بت يا هايدى
هايدى بسرعة….عشان افتح دماغك….الدكتوره هايدى ميتقلهاش يابت….
ضحك حمزة اوى وقرب منها اوى….ست البنات…..سكر نبات كمان
وشها احمر…واتكسفت…
حمزه….يا سكر نبات….
رفعت هايدى وشها ليه….نعم
حمزه….وحشتينى….مبطلتش تفكير فيكى من يوم ما شفتك
هايدى مش عارفه تقول ايه…ومينفعش ترد….قالتله
الا صحيح هى نفين امك ازاى
حمزه ضحك ….امك!!!
امى زى الناس
هايدى….هو انتوا حلوين كلكم كده
حمزه قرب منها اكتر…وحشتينى يا هايدى
هايدى وشها احمر ودقات قلبها زياده …..وباباك حلو كده
حمزه بيضحك وبيقرب اكتر ….وحشتينى يا هايدى
جريت بسرعه هايدى وبصوت عالى…..يانفيييييين….يا تهااااانى
عريس_يامااااى وفاءالغرباوى
######
وفاء الغرباوى
هايدى….هو انتوا حلوين كلكم كده
حمزه قرب منها اكتر…وحشتينى يا هايدى
هايدى وشها احمر ودقات قلبها زياده …..وباباك حلو كده
حمزه بيضحك وبيقرب اكتر ….وحشتينى يا هايدى
جريت بسرعه هايدى وبصوت عالى…..يانفيييييين….يا تهااااانى
#عريس_يامااااى #وفاءالغرباوى
صوت هايدى العالى ….خلى تهانى ونفين يتحركوا بسرعه اوى
نفين من الخضه….وقع منها كاس العصير على السجادة
(يارب هايدى ماتشوف اللى عملتيه)
تهانى بحرج….ولايهمك يا مدام نفين…هنضفه…ومكملتش كلام وكانت
وصلت هايدى…عندهم
تهانى….مالك يا بنتى سرعتينا ….فى ايه
هايدى….ها …لا مفيش بس انتوا اتاخرتوا…قلت انادى عليكم
رفعت تهانى حاجبها بغيظ من بنتها….دا الناس في الشارع اللى جنبنا هيجوا يسالوا فى ايه….بتنادي ولا بتطلبي استغاثة
هايدى…بطلب استغاثة والله….
وسكت وبعدين قالت عادى يا مامتى لما يجوا…
اهو يشوف القمر دى…صح يا نيفو….
ونفين مش قادرة تبطل ضحك …
والنعمه ماهيقتنعوا ان دى ممكن تكون ام….ولا حما
تهانى بغيظ منها…. هايدى…. مالك يابت فى اى
هايدى…. بالراحة يا ماما….اصل …اصل حمزه عايز مامته ومستعجل عشان يمشوا….
وانا اقوله ياسى حمزه لا مينفعش تمشوا دلوقت انتوا مشربتوش العصير….
واتحركت من مكانهاهايدى وقالت….نيفو مشربتش العصير ليه …
وبصت حواليها ملقتش عصير….
بس خايفه تدخل تانى لوحدها عند حمزه….
قررت انها تاخد نفين معاها….يلا يا نيفو
تهانى….عيب كده يا هايدى….قولى طنط او مامى
هايدى….خاليك فى حالك يا خالتى ام هايدى كده….
وبصت ل نفين….انتى معترضه يا نيفو
ضحكت نفين ….لا ياحبيبتى ….دمك زى السكر….والله القاعده معاكى ميتشبعش منها
فعلا دى تسلى احسن من ٥ج لب…..
قالها حمزة وهو واقف على باب الاوضه ومربع ايده الاتنين ….وبيبصلها بغيظ اوى….
جرت تلف عشان تقف على الناحيه التانيه من نفين…..حطت رجيلها فى الارض….حست بحاجه سقعة
بتبص تحت رجليها…..لقيت العصير على السجادة…..تهااااانى….انتى وقعت العصير…..
ايوه يااختى….ماهو مش انتى اللى هتغسلى السجاد…..وتقولى عشان كتب كتابك ياهايدىاغسلى يا هايدى اه ياظهرى
ياصغيري على الهم ياهايدى ….دا انا مصدقت حمزة دخل من غير الشوز…
نفين بضحك وهى بتكلم حمزه….عشان كدا حمزه كان خالع الشوز فى البيت….وعمال كل شويه يبصلها ويضحك…. دا خدها معاه اوضه النوم
الله يسامحك ياهايدى….ابنى كان بعقله وبتضحك اوى
على عروسه ابنها….الى هتخلى الفرحة تملى بيتهم
هايدى اتكسفت من نفسها واللى عملته……وقلبها بيدق ومش عارفه ترفع عنيها ناحيه حمزه……..
حمزة بحده وصوت عالى نوعا ما….يلا يا ماما عشان اتاخرنا
نفين…..استنا اخد رقم تليفون هايدى عشان هنتقابل بكره عشان نجيب الشبكه والفستان
حمزة اتحرك ناحيه الباب وماشى….براحتك يا ماما هستناكى تحت
هايدى حست انها زعلته اوى ومهناش عليهايمشى وهو زعلان دا سى حمزة برده…..بسرعه نادت عليه بس بصوت كله رقه ….حمزة
حمزة وقف مكانه بس لسه ظهره ليها…اول مرة يسمع صوتها بالرقة دى…
هايدى بصت ناحيه نفين وتهاني اللى حسوا ان فيه حاجه….وعملوا نفسهم مشغولين بالكلام…..
واتحركت ناحيته…..حمزة
طريقه هايدى ونعومتها فعليا خلت حمزه مش قادر حتى يرد
رفع عينه ليها….وشاف ملامحها لاقها كلها رقه…ضعف…حب يمكن….اول مره يشوف حتى عنيها كده…فيها كلام كتير….مقدرش يتكلم….فضل انه يستمتع بكل لحظه الصمت دى
“فإذا وقفت أمام حسنك صامتا
فالصمت في حرم الجمال جمال
كلماتنا في الحب حبنا
إن الحروف تم*وت حين تقال
حسبي وحسبك أن تظلي دائما
سرا يمزقني وليس يقال”
نزار قباني
وبهمس طاغى ….انا أسفه….
حمزة فضل واقف قدامها بيتمنى كتير حاجات عشان شافها بالضعف دا والرقه دى….بس حتى التمنى غير مباح….غمض عينه وكانه بيحقق امنيه اتمناها….صعب انها تتحق
سمع هايدى بتكمل كلامها
بنفس الهمس ….انا مش هقدر ارد على كلامك اللى قولته واحنا جوه….على الاقل دلوقت….
ممكن ابان لك جريئة وبتضحك وبهزر….بس مش يمكن بدارى خجلى او حاجه تانيه….انا اسفه ياحمزة ولسه القرار فى ايديك…خلاص هايدى كانت دموعها هتنزل…لانها شافت وجه جديد ل حمزة….لابيضحك ولابيتكلم….ملامحه حاده….
كلمتها الاخيرة فاجت حمزه…حس انها صعبت عليه اوى…لا مش صعبت عليه…قلبه اتالم عليها…..
برق عنيه وقال….قرار ايه يا هايدى….هى لسه فيها قرارات….
وكان لازم يخرجها من المود دا …عشان ترجع ل مرحها وضحكها اللى بيخلوه فى دنيا تانيه
ابتسم حمزة وبرقه تناسب حضرة الظابط حمزةولبس النظارة(اتفرجى وانتى بعيد يامنه….انتى عارفه نفسك) وقال….تمام يا هايدى…
ابتسامة حمزه جننت هايدى…
هايدى بمرح….مش قلنا بلاش هايدى
حمزة اتعمد انه يقرب منهااوى ….انا اقول اللى انا عايزه….
زى مايوم الجمعه هعمل اللى انا عايزه برضو…ومد ايده وحطها على ارنبه انفها
هايدى…اااا
حمزه بصوت عالى ومخللهاش فرصة تتكلم…..يلا ياماما
سابها ونزل بسرعة….
لقت نفين فى وشها بتسلم عليها….مبروك يا حبيبتى
مكنتش اتمنى عروسه ل حمزه احسن من كده.
ونزلت نفين وفضلت هايدى واقفه مكانها….ماسكه انفها وبتضحك
تهانى….هاااااايدى
هايدى بخضه….عاااا…انا مش هخلف بسبك يا تهانى
تهانى….بقالى ساعة بنادي عليكى…وانت واقفة مسهمه
هايدى بطريقه جاده اوى….هو انا واقفه بقالى ساعة والله…وقالت وهى رافعة ايديها لفوق بضحك
منك لله يابن نفين….طيرت البرج اللى فاضل في راسى….
إلا قوليلى يا ماما …الناس لو سألتني حماتك اسمها ايه اقولهم نفين عادى كده
تهانى بتبص لها اوى ….مش فاهمه برضو
هايدى حطت ايديها على كتف مامتها وخدتها تمشى معاها…..يعنى حماة سناء جارتنا اسمها فتحيه…..وحماه امل بنتى عمى اسمها عنايات….اقولهم حماتى اسمها نفين….
تهانى طلعت نفس طويل وكزت على شفايفها….بصى ياهايدى….عشان نشوف انا هشيل المرارة الاول ولا هتشل …
هايدى ….بعيد الشر عنك يا ماما…بصى جوزينى حمزة…واختارى اللى يعجبك
تهااااانى….الحقوووووونى
#####
هايدى طول الليل فى اوضتها بتفكر فى حمزه….شكله لبسه….كلامه…هيئتة اللى جننتها ونظارته….
جه فى بالها انها مقالتش لأصحابها….ولاحد من اهلها
مامتها دخلت عندها
هايدى ….ماما احنا اكيد مش هنعرم حد
تهانى….لا باباكى عزم الناس كلها
هايدى….طيب انا هاخبى الواد وامه فين
تهانى…واد مين …وامه مين…
هايدى وهى بتحاول تركز….حمزة ونفين
تهانى….هتخبيهم ليه هما فيهم عيب لاسمح الله
هايدى بندب ….ياريت كان فيهم عيب ياتهانى ياامى….دول بينورا والله…وهيتحسدوا
تهانى….بصى يا هايدى ….انا مش هخليه كتب كتاب يوم الجمعه
هايدي ….اومال ايه يا ماما
تهانى….دخله علطول يا قلب ماما…عشان ربنا يقويه على مابلاه
#####
تانى يوم….راح حمزة ومامته واخدوا هايدى ومامتها من البيت….
ركبت هايدى مع مامتها فى الكرسى اللى وراء
كل شويه حمزة يبصلها…وهى تبتسم
ويلاحظ انها تحط ايديها على انفها….يغمز لها….لغايه ماوصلوا المحل ….
قى محل الدهب
دخل حمزه ووراه هايدى ومامتها ومامته
صاحب المحل …بدا يخليهم يشوفوا الحاجات
بدات تشوف الحاجه…. وهى محتارة….
كانت عجباها حاجات كتير….
وكعادة الستات المصريه….بينقوا الحاجات الكبيرة اللى تملى العين….ولونها اصفر اوى….
بس هايدى كانت بتشوف حاجات صغيرة رقيقه….ومكنتش بتعجب مامتها….
هايدى…..شوفى كده يا ماما
تهانى….مش حلوه دى صغيرة اوى….نقى اكبر
هايدى….تهانى انا مش هخلى حد يشوف الشبكه….ريحي دماغك من الحاجات الكبيرة دى
نفين….زوقك حلو يا هايدى
تهانى….اسمعى كلامى يابنتى….دى حلوه
عشان متزعلش امها ولا حماتها….اختارت حاجات على زوقهم الاتنين….بس كان فيه سلسله عجبتها صغيرة اوى ….لاحظ حمزة انها اكتفت باللى اختاروه
شاور لصاحب المحل ….يخليها لوحدها
هايدى شافت الراجل وهو بيحطها فى علبه صغيرة شيك….زعلت وملامحها اتغيرت
حمزة ابتسم….انه كده هتكون مفاجته ليها حلوه
الراجل….بس انتى مختارتيش الدبله يا انسه
هايدى بصت ل حمزه كتير….كان نفسها تقوله انه هو يختارها…عايزاها تكون منه هو… على زوقه…مكتوب عليها اسمه
نفين….دا احنا نسينا ازاى كده…هاتلينا احسن حاجه عندك
حمزة….لا بلاش …خليها انا هاجيبها بعدين
هايدى ابتسمت اوى….وفرحت انه فهمها من غير ماتتكلم….
وابتسم ليها بحب….وتمنى يقولها كلمه
فى اتليه حلو اوى وراقى….نفين اخدتهم عليه…وحمزة وهايدي ماشين مع بعض بس ساكتين ….
دخلوا يجبوا الفستان
بيلفوا يتفرجوا على فساتين وعجبهم فستان حلو اوى …لونه بينك وهادى….
البنت بتسالهم مقاس مين
هايدى شاورت على امها تهانى
دى العروسه….
مامتها اتكسفت ….
ردت هايدى وقالت….
يانفين قلتلك بلاش تيجى….اهم تاهين مش عارفين مين العروسه
ومن الآخر يا نفيو لاهقول ماما ولا طنط….
وانت يا تهانى….مش عايزانى اخبيهم….اهم بيسالوا فستان العروسه مقاس مين
حمزه لاحظ ان واحدالمحل بيضحك ومركز معاهم اوى
اتكلم وبصوت عالى اوى….هايدى….خلصى بقى ويلا
هايدى زعلت انه شخطت فيها….
اخدت الفستان وراحت تقيسه….معجبهاش….عشان زعق لها
خرجت شايله الفستان على ايديها…وقالت مش حلو
حمزة….طيب مش كنت تخليني اشوفه
مامتها….يابنتى كنا شفناه احنا كمان…
هايدى بصوت حزين وادب على غير العادة…لو سمحتى يا ماما قلتلك مش حلو ….خلاص بقا
نفين ….مالك يا هايدى….مش مشكله….فيه الف غيره…بس اضحكى ياقمر….
هايدى ابتسمت مجامله….وبصت ل حمزة اللى اتاكد انها زعلت….بس هو بيغير عليها….لازم تفرق بين بره البيت وجوه البيت
وكل مايختار حاجه مش حلو
حمزه فهم انها مضايقه اوى….
قرر انه يضايقها عشان تضحك…او حتى تكلمه
سال العامله …بزمتك مش دا يا انسه….قوليلى كده رايك ايه…
هايدى بغيظ…
انت تسالها ليه انا اللى هلبس مش هيا
حمزه باستفزاز ليها ….والله انا اللى هالبس فيكى….
وكمل كلامه بصوت هامس….بس ياريت يكون علطول عشان مستعجل
بعتله ومردتش…..فكر ايه الحاجه اللى تخليها ترد
حمزه نادى باسمها بصوت حلواوى …..هايدى
هايدى…..مردتش
نادى تانى وقال…..دكتورة
هايدى….بردومرتش
حمزه فهم ايه ياللى يخليها ترد….بت ياهايدى
ردت هايدى بغضب….حمزه
حمزه ….عيون حمزه وقلب حمزه…وعروسه سى حمزه
اللى جننت سى حمزة
هايدى سرحانه فى كلامه…..فاقت على صوت مامته ومامتها
نفين ….شوفى كده يا هايدى
بتبص لقت نفين
شايله على ايديها فستان حلو ورقيق ولونه اوفيت….وفيه ريش باستراسات على جزء من جنب الوسط….
وتهاني فى ايديها شابو على نفس زينه الفستان الريش والاستراس
هايدى….فين العشه
كللك بصوا لبعض باستغراب ….
هايدى….ماانا لما البس الريش دا….هبقى شبه الحمامه البيضا واقعد جنب حمزه….هيبقى فين….اكيد فى العشه ….
الفصل الرابع
عش الحب
وفاء الغرباوى
هايدى سرحانه فى كلامه…..فاقت على صوت مامته ومامتها
نفين ….شوفى كده يا هايدى
بتبص لقت نفين
شايله على ايديها فستان حلو ورقيق ولونه اوفيت….وفيه ريش باستراسات على جزء من جنب الوسط….
وتهاني فى ايديها شابو على نفس زينه الفستان الريش والاستراس
هايدى….فين العشه
كللك بصوا لبعض باستغراب ….
هايدى….ماانا لما البس الريش دا….هبقى شبه الحمامه البيضا واقعد جنب حمزه….هيبقى فين….اكيد فى العشه ….
وفجأة سقفت بايديها الاثنين وقالت….هو ممكن اقضى يوم فى العشه…..الله دى هتبقى حاجه حلوة اوى…
تهانى بغضب…هايدى مش معقول كده مفيش حاجه عجباكى….بطلى شغل الدلع دا…
نيفين….هايدى انتى فيه حاجه معينه نفسك فيها…
هايدى حست انها محور تركيزهم….وان مامتهم اهانتها
حست انها زهقانه جدا فى حصار من الكل …
الكل بيبصلها مامتها بغضب…
نفين يعنى شكلها مضايق…
البنات فى المحل زهقوا….
الا نظرة واحده كانت محتاجه تشوفها تحسسها انها صح مش دى الحاجه إللى شايفه نفسها فيها ….
خلاص بقا املها الأخير حمزه….
بصت له ونست الدنيا واللى فيها….ابتسامته منوره وشه…
محستش انه مضايق منها…كان دعم ليها…
وفجاه وقف قدامها….. ماما… طنط تهانى … معلش سيبوها تختار إللى هى عايزها.. ..
والتفت ليها….هايدى….براحتك ولو مش عجبك حاجه هنا….قولى
تهانى بحده ….ازاى يعنى بعد دا كله ميعجبهاش حاجه
…هو فيه احسن من كده
هايدى تقريبا استخبت فى حمزة
بس سمعت نفين بتقولها
نفين….قوليلى عايزه ايه….براحتك يا عروسه…بس نفهم …عشان نساعدك
اتحرك حمزه ووقف جنبها….طبعا احلى عروسه …واللى هى عايزاها وبس
وقرب راسه منها….عروسة سى حمزة
هايدى اتكسفت جدا….ومحاولتش تبص ناحيته
بس هما ليه مش شايفين انها من حقها يكون ليها حاجه مميزه ليها
هايدى….انا مش محتاجه حاجه اوفر….كل إللى عايزاه انه يكون بسيط اوى….احنا هنكتب الكتاب فى المسجد ومفيش اى نوع من مظاهر الصخب….
مش شايفه نفسى فى حاجه منهم…
حمزة….خلاص يلا بينا ….شكرا يا بنات
وفى ثوانى ومد ايده وخد ايد هايدى وخرج من الاتليه
هايدى …مكنتش مركزه فى حاجه ولا حتى قادره انها تشد اديها
.. وقفوا بره المحل….وهى لسه ايديها فى ايده….استوعبت الموقف لما لقت مامتها بتقول
مينفعش كده يا حمزه مش كل حاجه تطاوعها.. ..
وبصت هايدى….هتفضلى طول عمرك عيله.. … مش هتكبرى ابدا
سحبت هايدى ايديها …..رسمى دموعها نزلت
نفين…. اهدى يا تهانى….هى اكيد ليها وجهه نظر…نفسها فى حاجه معينه…
حمزة بحده ….من فضلكم انتهى…احنا هنمشى…اتفضلوا….
مشيت تهانى ونفين….
ولسه هايدى مكانها….اتكلم حمزة وهو بيمد ايده بمنديل ورق
طيب قوليلى اعملك ايه ….لا اقدر امسح الدموع دىولااااا….وشاور على انفها
ضحكت وعيطت فى نفس الوقت…..ممكن تسيب ليا موضوع الفستان ….وصدقينى فستانك هيكون مميز بانك انتى اللى هتلبستيه….
ابتسمت هايدى برقه اوى ….شكرا انك فاهمنى
حمزه بيص يمين وشمال حواليه….
هايدى….مالك بتدور على حاجه…..
حمزة….ايوة استنى بس….هايدى كانت هنا ….مش عارف راحت فين…
هايدى ضيقت عنيها…حمزه….مالك
حمزة بابتسامة جميله….اصل لما هايدى تقول شكرا…تبقى مش هايدى
نزلت وجهها لتحت بابتسامه وصوت رقيق….لا اكيد بقول شكرا…ومنحرمش منك…وربنا يخليك ليا…وفى لحظه قلبت وجهها طخنت فى صوتها…وهات ياد…وبض*رب بالبو*كس كمان…
ضحك حمزه….طبعا والا متكونيش هايدى….بالضبط زى الناس اللى بقبض عليهم واحطهم فى التخشيبه
قلبت هايدى فى ثوانى
هايدى بنعومه….سى حمزة هو انت ممكن تدخلني التخشيبه
ضغط حمزه على ايده الاتنين جامد…مش وقتك خالص ولاهنا كمان….اهمدى يا هايدى ل بكره بس…
حمزه عارف انها بتدلع عليه….
وبعدين ضحك وقال بصوت رخيم ….دكتورة هايدى
هايدى تاهت من صوته ومسكت نفسها …..ها….هايدى مين
حمزة…..يارب عدى النهارده على خير…..اتفضلى يا …يا…يالايابنتى.
#عريس_يامااااى #وفاءالغرباوى
…..
حمزة وصل هايدى ومامتها البيت…..وقرر انه يشترى هو الفستان ويهديها بيه على زوقه….وتكون حاجه تفرح هايدى
كمان يشترى دبله مميزه ليها….
وصل مامته البيت…انزلى يا ماما….
بس نفين فضلت شويه مكانها وحمزة حس انها عايزة تقول حاجه واكيد عن هايدى….واخيرا رفعت راسها وقالت….حمزه ….انت مبسوط
ابتسم حمزة ….يعنى مش عارفه….واتنهد وخرج نفس وغمض عينه بس بابتسامه ….ياامى هقولك حاجه واحده….القدر اللى يخلينى فجاة وانا سايق فى طريق …اغيره واروح مكان تانى خالص ومنطقه تانيه خالص….ومن غير مااحس انزل صيدليه….وابقى واقف مش عارف اطلب ايه….واقف وخلاص بشوف واحده ملامحها مش غريبه عليا….دقات قلبى زادت لدرجه توصلها ….مش عارف ايه بيحركنى غير قلبى وعينى…
القدر جمعنا بيها عشان تكملنى….اشوف روحى فيها
مبسوط اوى يا ماما
نفين….ربنا يتمم بخير…بسالك لانها غيرك….انا حبيبت هايدى ومرحها…..بس دى غيرك خالص…..
حمزة….مش يمكن دى اللى تكملنى….اعوض بيها سنين الحزن والالم….مش من حقى افرح يا ماما
ضحكت نفين وقالت….سى حمزة متقولش يا ماما
حمزه بضحك….هى بتقولها احسن
ضحكت نفين….دى ملهاش منافس اجرى يا خويا شوف الفستان ….كتب الكتاب بكرة ….ومفيش فستان
حمزه….متقلقيش ….كله هيبقى تمام
نزلت نفين وهو اتحرك….عشان يجهز ليوم عمره وفرحة عمره
#######
هايدى فى البيت….مامتها من الاخر منكده عليها….وكل شويه تهانى تقول ….مفيش فستان….مفيش فستان….
ارتاحي يا هايدى….البنات بتجهز قبلها بشهر….بس انتى
مينفعش تعملى حاجه كامله….
هايدى ساكته تماما الغريبه انها مش قلقانه خالص…كل اللى هى عارفاه انها مبسوطه….وقلبها بيدق….حمزة…حمزة ومبتسمه وخلاص
تهانى….هايدى
هايدى مسمعتش
تهانى علت صوتها…..هايدى
هايدى بصلتلها بسرعة….حمزه….وبعدين ضحكت بكسوف
ضحكت تهانى….هو اللى هينادى عليكى هتقولى حمزة…مش كانت بتبقى نعم
هايدى بتبص ل مامتها بعتاب ومتكلمتكش
تهانى راحت عليها حضنتها….يابنتى انا مش عايزه حد يتكلم عليكى….دلعك هنا فى البيت حاجه…ومع حماتك حاجه…احنا بابا وماما نستحمل دلعك وعايزاكى تكون اخلى عروسه بكره…انتى نور عينى دا اليوم اللى بنتمناه من زمان
هايدى….انا مش هتغير ….هو انا كده يا ماما…
اللى عايزنى يحبنى كلى على بعضى….جنونى قبل عقلى….جوهرى قبل شكلى….يحب عيوبى قبل مميزاتى
اتنهدت تهانى ربنا يتمم بخير…..يارب
خرجت تهانى….وهايدي مكانها بتفكر فى حمزه بس
فجاة سمعت صوت موبايلها ….صوت رساله
فتحت الرساله
“الساعة ١٢
افتحى باب الشقة”
“سى حمزه”
ابتسمت وبصت فى الساعه وقالت باقى ربع ساعة
بسرعة قامت لبست هدومها والطرحه….ولقت الساعة ١٢
جرت عشان تفتح الباب
عريس_يامااااى وفاءالغرباوى
########
فتحت الباب ومن صدمتها حطت ايديها على بقها…..وابتسمت ودموعها نزلت …..كانت مبسوطه اوى
لقت بوكس ابيض كبير عليه شريط لونه جولد وجنبه بوكس صغير عليه شريط سليفر وواحد اصغر عليه شريط ازرق….تلاته جنب بعض بالتدريج وبوكيه ورد احمر…بصت حواليها ملقيتش حد ….عرفت ان حمزه ساب الحاجه ومشى ….قعدت على الارض جنبهم…
لقت رساله وصلتها
“مكنش ينفع اشوف فرحتك اللى حاسسها دلوقت ومعملش حاجه نفسى اعملها….خلينى اشوفك بكره ”
ابتسمت بدموعها وشالت الحاجه ودخلت لقت باباها وومامتها فى طريقها…اتكسفت واتحرجت
باباها….كلمنى واستأذن انه هيسيب الحاجه ويمشى بس انتى تفتحى الباب
مامتها…الف مبروك يابنتى… ربنا يسعدك….واتحركت تشيل معاها….
هايدى….خليكى انتى
تهانى….عايزه اشوف
هايدى بطريقه جد…ممكن حضرتك تسيبنى لوحدى
تهانى جت تتكلم….لقت فريد بيقولها….من حقها يا تهانى….سيبيها
دخلت اوضتها…..وقفلت البات….حطت الحاجه على السرير….فرحانه مش قادره تفتح الحاجه….وبقت بتتكلم بصوت مسموع…بقا معقوله..انا من حقى الفرحه دى كلها…يااااه
الحمد لله يارب….حضنت الورد….
وفتحت اول بوكس…..الكبير….لقت فستان لون اوفوايت….سيمبل جدا…ضيق وكب من عند الصدر ونازل بحزام على الوسط….الحزام عبارة استراسات بشكل حروف اسم HAMZA&HAIDY
حمزة &هايدى
وكان ليه سلسله حرف Hثابت على منتصف صدر الفستان وناحية باقى اسم حمزه والناحيه التانيه باقى اسم هايدى ….
عجبها الفستان جدا جدا ولقت جنبه حجاب بنفس اللون وبادى وتاج سلسال للحجاب بأسمائهم HAMZA&HAIDY
بسرعة فتحت البوكس التانى ….لقت شوز نفس لون الفستان ولمعته….بس معاها ورقة
“كان نفسى البسها ل سندريلا سى حمزة”
من كتر فرحتها ودموعها مش عارفه غير تقول الحمد لله يارب
مسكت البوكس الصغير …كده مبقيش حاجه للفستان
ياترى فيك ايه….جه على بالها حاجه
برقت عينيها … يانهار اسود….لالا اكيد مش كده …دا مودب
فتحت الصندوق بايد وخايفه يكون اللى فى بالها….
فتحته….لقت أنواع شيكولاته كتير….فرحت جدا…بس جالها احساس الصدمه….جايز كان نفسها تشوفه جرئ ان ممكن يجيب ليها حاجات خاصه…اتكسفت من نفسها انها تفكر كده…
بدات تاكل اول واحده الشيكولاته وهى مبسوطه ….وبتطلع كل اللى فى الصندوق…..لقت حاجه مش طبيعةفى اخر الصندوق….بصت جامد…وشافت حاجةخليتها رمت الشيكولاته ومسكتها وقعدت تبصلها كتير وهى مسكاها فى ايديها
سمعت صوت رساله….فتحتها
“كان لازم يكون حاجه….باسم حمزة ولسى حمزه فى يوم”
هايدى… دا طلع قليل الادب ياامى
وضحكت وحضنت الحاجة….احلى هديه منك يارب
انا عايزة حمزه بس والله مش عايزة حاجه تانيه
عريس_يامااااى وفاءالغرباوى
#####
هايدى قررت انها تجهز نفسها بنفسها…وباباها ومامتها فى البيت ومعازيمهم جاهزين وخلاص المفروض يمشوا عشان يلحقوا يوصلوا….
خرجت هايدى والصدمة حلت على الكل من شكلها
محدش قدر يتكلم…..
هايدى لابسه عبايه سمرا وطرحه سمرا ووشوز سمرا
هايدى…..يلا يا جماعه….هنتاخر
فريد…..خير ياهايدى مين مات
هايدى…..مفيش يابابا
تهانى….انت ملبستيش الفستان ليه….ايه اللى انت عملاه دا….مش قلتى الفستان حلو
هايدى….مين قال ملبستوش…..انا لبسته….
تهانى….وايه العبايه دى
هايدى….انا عايزه حمزه يشوفه الاول ….بس فيه حاجه دى
تهانى…..هتشلينى….فيه واحده تلبس عبايه سودا فى كتب كتابها….الناس هتشوفك ازاى…ولا هتقول ايه
هايدى بضحك……الغراب جوزه احلى يمامه….يلا ياتهانى….يلا يابابا
تهانى….مش هتنزلى يا هايدى كده….لومش هنروح خالص….عايزه تفضحيني
هايدى…. هو انا لابسه مقطع ولا كاشفه شعرى….فى اى ياماما….انا لابسه لجوزى ….وعايزاه اول حد يشوفني جوزى….مليش دعوة بحد
فريد…..خلاص يا تهانى….سيبها براحتها….
تهانى بصت لبنتها بغيظ ونزلت
هايدى….بابا متزعلش منى
فريد بابتسامه وخدها فى حضنه…. لا يابنتى….مش زعلان….ربنا يسعدك
هايدى اتجرات وطلبت…
بابا….ممكن لما نوصل القاعه ونكتب الكتاب تخلى حمزة يدخل لوحده عند قاعة الستات….بس ابقى مشيهم
فريد شاور على عنيه….من عنيا يا حبيبه بابا….فرحان يا هايدى….انك مبسوطه…كنت بتمنى اشوفك فى ايد جوزك….بس يبقى حبيبك مش زوج وخلاص
اتكسفت هايدى….
######
وصلوا القاعة فى المسجد…..نفين اول ما شافت هايدى …اتخرصت….وبقت مضايقه جدا وتبص على الناس والمعازيم….للحظه ندمت انها وافقت على واحده مجنونه زى هايدى…..تكسفهم قدام اهلهم…..
هايدى لاحظت ان نفين مقالتش حتى مبروك ….وتهانى مش بتكلمها…والناس بيضحكوا وسامعه غمزهم عليها…بس كل اللى كان فارق معاها….ان اول حد يشوفها هو حمزة….كانت بتبتسم كانها بتغيظهم…..
وجت اللحظه الفاصله….وكتبوا الكتاب والماذون قال كلمته الشهيرة
“بارك الله لكما وبارك عليكماوجمع بينكمافي خير”…..
وفجاة طلب فريد من كل الستات الخروج ….حتى نفين وتهانى….الى تقريبا مش طايقين بعض ولا هايدى…..خرجوا كلهم…..وفضلت هايدى
وبسرعه خلعت العبايه والطرحة وظهر الفستان اللى فعلا كان مميز زى ماكان نفسها….على اسمها واسم جوزها
اخيرا حمزة جه….اللى كان لابس بدله سمرا وقميص ابيض وبيبون اسود…وعلى جيب جاكت البدله مكان منديل البدله دبوس عليه
HAMZA&HAIDY
وكانت ذقنه خفيفه شويه….
كان نجم ….بس من حق هايدى وليها وبس
دخل لوحده فريد مرضيش يدخل
وقف مكانه….صدمة ربطت رجله مكانها
حوريه من الجنة قدامه ….فستان عليه اسماهم
HAMZA&HAIDY
الطرحة عليه سلسال التاج بأسمائهم…..
HAMZA&HAIDY
للحظه دمعة نزلت منه ومنها….
لانها شافت حمزة بشكل ولا اروع من نجوم السينما
ونزل على ركبه واحدة وطلع من جيبه علبه فيها دبله وفتحها….تتجوزيني يا دكتورة هايدى
هايدى…هزت راسها وهى مكانها
وقف حمزه على اعصابه
طلع الدبله اللى شكلها اسمهHAMZA….ومدت ايدها الشمال ….لبسها حمزة الدبله وباسها فى ايدها
ومسك ايدها….وباس جبنيها….وحضنها ولف بيها
هايدى اتكلمت….مبروك يا حبيبى
زاد حمزه من ضمه ليها….وبعدين نزلها وقال حبيبك….
هايدى هزت راسها ….
حمزة…..بحبك
هايدى….قربت منه….بحبك
حمزة حضنها تانى بسرعة….ونزلها….لازم نمشى من هنا
ضحكت هايدى….يلا بينا
وقف حمزة ….سمعت الناس وانا داخل بيتكلموا بيقولو العروسه مسوداها وماما شكلها زعلان ومامتك كمان
مفيش غير باباكى اللى بيضحك….
ضحكت هايدى….كنت لابسه العبايه السمرا والطرحة السمرا والشوز السمرا بس
ضحك حمزة بصوته…..بس ….انتى مفتريه والله
هايدى برقه…كان نفسى تكون اول واحد يشوفني….ميهمنيش حد
حمزة….بحبك يا اجمل عروسه فى الدنيا….ولعملك هتخرجى بيهم ….مش هخلى حد يشوفك
هايدى بنفس رقتها…حمزه والله نفسى بس على الاقل عشان ماما ومامتك….خايفين من كلام الناس
استنى استنى يا خويا….انت موز وحلو كده وعايزين اخرج بالاسود انسى….
وبعدين مش قلت عايز تلبس سندريلا الشوز ولا ايه