حكمت..انا اسفه يا وهدان سامحنى احب على يدك
وهدان..هيا كلمه وجلتها روحى على بيت ابوكى بدل ما ارمى عليكى اليمين دلوجتى
حكمت..علشان خاطر العيال يا وهدان سبنى اهنه وانا مش هكررها تانى
وهدان..قلتلك روحى على بيت ابوكى وانا لما الاجيكى اتربيتى زين هاجى اخدك وتركها وذهب
ذهبت حكمت الى خالتها وهى تبكى
حكمت ..الحجينى يا خالتى وهدان جالى روحى على بيت ابوكى ولما تتربى هاجى اخدك
انعام…انا سمعت كل حاجه يا بتى والاحسن نفذى اللى جالك عليه ولدى راسه ناشفه زى ابوه وممكن يتحجج علشان يطلقك ويفضى لبت المصراويه
حكمت..ليه يا ربى بيحصل فيا اجده
انعام..معلش يا بتى فترة وهتعدى
حكمت ..حاضر يا خالتى هروح على بيت ابوى
فى منزل سليم
استيقظ سليم على اصوات ضحك عاليه
خرج سليم من الغرفه وجد امه ونوران يجلسون سويا ويضحكون بشده
نوران..انتى فظيعه يا ماما
منى..انتى مشفتهوش وهو صغير كان عليه خدود شبه المخدات كده كنت علطول امسكه منهم لما يعمل حاجه غلط
نوران…هههههه انتى عندك صور ليه وهو صغير
منى..استنى هجيبهالك
سليم..اوعى تعمليها يا ماما
نوران لا هاتيها يا ماما بالله عليكى عايزه اشوف الخدود اللى شبه المخدات
منى من عنيا يا حبيبتى سيبها تشوفهم يا سليم دى مراتك ومن حقها تشوف شكلك وانت صغير لما كنت شبه الكورة الكفر وخدودك شبه المخدات وتركتهم وذهبت لتحضر الصور
نوران…هههههههه حلوه الكورة الكفر والمخدات دى ماما زى العسل امال انت كنت جايب المخدات دى منين
سليم وهو ينظر لها بشر ويقترب منها ..حلوه يختى عجبتك اوى وجايه على هواكى
نوران وهى تبتعد..اعقل يا سليم مالك مامتك هى اللى قالتلى تعالى وانا احكيلك عن عاهات سليم وهو صغير
سليم ..عاهات يا مجنونه وجرى وراءها
جريت نوران منه وذهبت الى منى فى غرفتها
نوران ببراءه وهى تختبيء وراءها..الحقينى يا ماما ابنك عاوز يض-ربنى يرضيكى كده يعنى هو علشان يعنى اهلى ماتوا هو هيظلمنى ويفترى عليا
منى..واد يا سليم اعتذرلها حالا
سليم..واد ايه يا ماما ده انا الصياد الكل بيعملى الف حساب كبير وصغير
منى… صياد على نفسك يا روح امك اعتذرلها حالا ولا انت عارف شبشبي ممكن يعمل فيك ايه
سليم وهو يتوعد لنوران..انا اسف يا حبيبتى حقك عليا
منى..ايوه كده اتعدل واتفضل اطلع بره عايزه اوريها الصور
سليم..يا ماما بلاش
منى..اطلع من هنا يلا شوفلك حاجه اعملها يالا
خرج سليم وهو ينفخ من الغيظ
بعد اسبوع عاد احمد هاشم من السفر لان العمل فى الامارات لم يتناسب معه
فى منزل عثمان القناوى
وهدان..اجيب مرتى بجى يا بوى العيال بتسال عنيها
عثمان..لا سيبها تتادب شويه دى بت ناجصه ربايه ابوها معرفش يربيها
وهدان..امرك يا بوى انا اصلا ناوى اول منلاجى نوران هطلجها علشان اتجوز نوران
عثمان..نلاجيها بس يا ولدى وبعدين نعمل اللى احنا عاوزينه وبعدين مفيش اخبار عن الواد اللى هربت معاه
وهدان ..لا يا ابوى انا مستنيه يظهر علشان اجطعه بسنانى
عثمان..ده عجابه كبير اوى يا ولدى ده الق-تل جليل عليه
وهدان..عندك حج يا بوى
اتى احد رجال وهدان
الرجل..وهدان بيه الرجل اللى احنا رحناله شجته فى اسكندريه ظهر وهو دلوجتى فى شجته
وهدان ..انت متاكد من اللى انت بتجوله
الرجل..طبعا متاكد يا وهدان بيه
وهدان ..طيب ونوران معاه
الرجل ..لا يا بيه محدش من الرجاله شافها
وهدان ..طيب روح انت ونبه على الرجاله يفتحوا عنيهم كويس
الرجل ..امرك يا وهدان بيه وتركه وذهب
عثمان ..تاخد الرجاله وتروح ليه هو اكيد عارف نوران راحت وين
وهدان ..تحت امرك يا بوى
#الحلقه_الرابعة
عثمان ..تاخد الرجاله وتروح ليه هو اكيد عارف نوران وين
وهدان ..تحت امرك يا بوى
فى منزل سليم
انهى سليم تناول افطاره
سليم..انا ماشي يا ماما عندى شغل عايزه حاجه يا نوران
كانت نوران شارده تريد اخبار والدته بالحقيقه لانها لم ترى منها الا الخير وضميرها يؤنبها انها تكذب عليها
سليم..ايه يا نوران رحتى فين
نوران..هاه لا مفيش
سليم ..طيب انا نازل عايزه حاجه
نوران..مع السلامه
خرج سليم وبقيت نوران مع منى فى المنزل
نوران فى نفسها..اقولها ولا مااقولهاش خايفه اخسرها واعمل مشكله مع سليم وهو انقذنى وانا حاسه بحاجه بتشدنى ليه مش عارفه ايه هيا بس الاكيد ان الاحساس ده مخلينى طايرة وفرحانه اوى
قاطع شرودها صوت منى
منى..مالك يا نوران سرحانه من الصبح كده ليه
نوران..مفيش يا ماما كنت عايزاكى فى حاجه مهمه
منى..فى ايه يا بنتى قلقتينى
نوران..قبل ما ابدا عايزاكى تسامحينى انا مكنتش اقصد اكذب عليكى بس الظروف اللى اضطرتنى لكده
منى..فى ايه يا نوران وكذبتى عليا فى ايه
نوران بتنهيده..انا مش مرات سليم احنا مش متجوزين اصلا
منى باستغراب..مش مراته ازاى وهو ليه كذب وقال انك مراته
نوران ..هحكيلك كل حاجه من البدايه
منى ..قولى وانا سامعاكى
نوران..قصت لها نوران ما حدث من البدايه وكيف قابلت سليم والظروف التى اضطرتهم للكذب عليها
نوران..هيا دى كل الحكايه يا ماما
منى..بغض النظر انى بكره الكذب اوى الا انى بصراحه بحييكى على صراحتك دى ولو انتى مكنتيش قلتيلى الحقيقه وانا عرفتها لوحدى مكنتش هخليكى فى بيتى ثانيه واحده
نوران..الظروف هيا اللى اضطرتنى لكده وخوفى من عمى وابنه هيا اللى خلتنى اقبل انى اقعد مع واحد عازب
منى..وانتى يا روح امك قاعده معاه ازاى فى اوضه واحده مش خايفه على نفسك هو صحيح ابنى وانا عارفه اخلاقه بس معنديش ثقه فى الشيطان
نوران..من الناحيه دى اطمنى ابن حضرتك عارف ربنا كويس وغير كده هو شايفنى جعفر
منى…يابن الهبله بقى القمر ده يتقال عليه جعفر
نوران….هههه قمر ايه بس ده انتى اللى قمر
منى..انتى بتحبيه
نوران بتوتر..ايه الكلام ده يا ماما
منى..طالما قلتى كده يبقى حبيتيه انا عارفه ابنى امور وحلو ويتحب بسرعه
نوران بتوتر..لا محبتهوش
منى..طيب عينى فى عينك كده
اخفضت نوران عينها
منى..يبقى حبيتيه مش قلتلك ابنى امور ويتحب بسرعه
نوران..هههه انتى عليكى كلام بس مش عارفه اذا كان حب ولا لا
منى..طيب حاسه بايه ناحيته
نوران..ببقى فرحانه لما بشوفه قدامى ولما بيتكلم معايا بيقى قلبي هيطلع من مكانه
منى..يبقى حبتيه يا هبله
نوران..طيب وهو ممكن يكون حبنى او عنده استعداد يحبنى
منى..سيبي عليا الموضوع ده بس اوعدك انك انتى اللى هتبقى مراته بس لازم نتاكد من شويه حاجات كده
نوران..حاجات ايه
منى..لا نفذى اللى هقوله بس ملكيش دعوه
نوران …حاضر
وصل وهدان ورجاله الى شقه احمد هاشم
احد الرجال المراقبين للشقه..يا بيه هو اخد شنطه سفر ومشي رحنا وراه فى نص الطريق اختفى ومنعرفش راح وين
وهدان وهو يضر-ب الرجل على وجهه..علشان مشغل شويه اغبيه عندى عامله زى المواشي تاكل بس ملهاش شغله تانيه
الرجل..انى اسف يا بيه غصب عنى والله
وهدان..تفضلوا مراجبين البيت لغايه ما الزفت ده يظهر
صعد وهدان يسال الجيران عن مكانه فاخبره احد الجيران انه سافر الى اهله وسوف يغيب اسبوع
اتصل وهدان بابيه يعلمه فاقترح ابيه ان يظل وهدان والرجال بالاسكندريه حتى يكونوا قريبين لبيت احمد هاشم ويذهبون اليه مباشرة عند وصوله
اما احمد هاشم كان سيتصل بسليم ويعلمه بوصوله حتى يبعث اليه سيارته ولكنه فضل الاتصال به بعد رجوعه من زيارة اهله لانه لا يحتاجها فى الوقت الحالى لانه سوف يسافر لاهله بالقطار
فى منزل سليم
رجع سليم من العمل وجد نوران وامه يتحدثان
منى..معلش يا حبيبتى انا اسفه على اللى حصل
نوران باستغراب ..هو ايه اللى حصل بس
لكزتها منى بقدمها بمعنى اسكتى
منى..ان الواد عاكسك لما كنتى ماشيه معايا فى الشارع
سليم..مين ده اللى عاكسها تعرفوه
منى..واد كان فى الشارع عاكسها لما كنا رايحين عند واحده صحبتى
سليم..انتى ازاى يا هانم تخرجى من غير اذنى انتى مش خايفه لحد يشوفك
منى..اهدى يا سليم ومين اللى يشوفها ده
سليم..مفيش يا ماما ممكن تجبيلى مايه لو سمحتى
عرفت منى انه يريدها ان تذهب حتى يتحدث مع نوران فذهبت الى المطبخ ولكنها وقفت بمكان كى ترى رده فعل ابنها
سليم امسك نور من ذراعها وضغط عليها حتى المها
نوران..سيب ايدى يا سليم
سليم..مين اللى عاكسك ده
نوران ..معرفش انا ممكن اروح اساله لو عايز
سليم..اتعدلى فى الكلام
نوران..انت مالك هو انت كنت جوزى ولا قريبى علشان تسالنى
سليم..ايه اللى وداكى مش خايفه لحد يشوفك
نوران ..انا زهقت من الحبسه دى وكنت عايزه اخرج ولو كان حد شافنى مكنتش هتفرق انا هسافر لعمى اقوله انى موافقه على اللى هو عاوزه وانى موافقه اتجوز وهدان علشان انا زهقت من اللى انا فيه
احس سليم بالغضب منها عندما ذكرت انها ستتزوج
سليم بهدوء عكس النار التى بداخله ..وموافقتيش ليه من الاول ليه هربتى وتعبتينى معاكى
نوران ..علشان كنت غبيه وهدان بيحبنى وانا مش عايزه حاجه غير انى اتجوز واحد بيحبنى
كان سليم يشعر باحاسيس غريبه لم يشعر بها من قبل يود قت-لها على ما تفوهت به انها نادمه على عدم الزواج من وهدان وشعور يقول له اجعلها ملكك حتى لاتتزوج باخر فقرر سليم الاستسلام لذلك الشعور
سليم..ولو قلتلك انك مش هتتحركى من هنا
نوران..انت ملكش حكم عيا يبقى ملكش فيه ادخل ولا اخرج انا حرة
سليم..هيبقى ليا يا نوران متقلقيش
نوران..عن اذنك انا لازم امشي دلوقتى علشان الحق اوصل البلد قبل ما الليل يدخل
ضغط سليم على ذراعها بشده ولم يهتم بالمها لان المه اكبر حيت تيقن من شعوره ناحيتها انه بدا يحبها لانه لا يوجد تفسير اخر لما يشعر به تجاهها
سليم..لو قلتى كده تانى هكسر عضمك يا نوران ومش هخليكى تقدرى ترفعى لا ايد ولا رجل
نوران استفزها كلامه..انت ملكش فيه واذا كان على حمايتك ليا انا اقدر ادفعلك اللى انت عاوزه ها تطلب كام يا سياده المقدم
لم يجيب عليها سليم الا بصفعه مدويه نزلت على وجهها جعلتها تشهق هى ومنى من الصدمه
سليم..ده ردى على كلامك اما الرد التانى انا دلوقتى هاخدك ونروح لماذون علشان اكتب كتابى عليكى ولو رفضتى والله لاندمك على اليوم اللى شفتينى فيه
نوران..لا يا سليم انا مش موافقه
سليم ..رايك ميهمنيش انا نازل دلوقتى وهرجع بعد ساعه على ما اشوف اتنين صحابى يبقوا شهود لان فهد مسافر ارجع تكونى جهزتى علشان نروح للماذون سلام يا قطه وتركها وخرج
جاءت منى وهى مندهشه من رد فعل ابنها
منى..هو ده ابنى هو ماله قلب طور كده وراح يشوف شهود هو بيتكلم جد ولا بيهزر
نوران..يا ريت يكون بيهظر لان ايده تقيله اوى وانا مش هعرف اعيش معاه ده طلع مفترى
منى..انتى اللى مستفزه حد يقول كده
نوران..كنت عايزاه ينفعل بصراحه ببقى مبسوطه لما بعصبه بس انفعل زياده عن اللازم
منى.. وربنا انتى هبله يالا قومى اجهزى علشان تروحى معاه للماذون
نوران..لا اما ييجى ليقول عليا مدلوقه ووافقت بسهوله
منى..لا ده انتى طلعتى ذكيه لحماتك المستقبليه اللى هو انا
بعد ساعه عاد سليم
سليم..ايه يا هانم مجهزتيش ليه
نوران..مش هروح
منى..انت عايزها تروح فين
سليم..تروح مشوار معايا يا ماما
منى ..مشوار ايه وبعدين انت قلتلى هاتى ميه ارجع الاقيك خرجت
سليم..مفيش يا ماما وانتى يالا قومى جهزى نفسك
نوران ..قلت لا