مالك:عمر امى مابتهتم بالكلام ده
مريم:عادى يامالك بعدين هتعرف
جسور:ايه ده يعنى ابنك عنده حق وفى سبب لاهتمامك ده اااااه وانا إللى اتغشيت فيكى ياميرو
مريم نكزته فى كتفه :وبعدين يا ولد انت ماتعرفش تكمل حاجه من غير هزار
جسور:اطلاقا ده معاكى انتى بس حتى اسألى ميسون
ميسون:ده جسور المرعب ده مش بيضحك غير معاكى يامريومه
مريم :ماشى ياحبايبى يلا متضيعوش وقت سيلين جهزتى إللى اتفقنا عليه
سيلين:هروح احضره حالا
كل واحد اخد طريق وبدأوا كلهم ينفذوا أوامر مريم وبيساعدهم فى كده العاملين فى المنتجع
………………. فى الاوتيل
آسر:حبيبى ايه رأيك نروح عزومة كامل العدوى
مياده:براحتك ياحبيبى إللى انت شايفه
آسر:حسيت انك اتضايقتى منهم امبارح
مياده:لا عادى قولى هو بوسى وجوزها رايحين
آسر:اعتقد أيوه
مياده:خلاص خلينا نروح
آسر:ليه يعنى ياقلبى
مياده:علشان مش حابه اسيب البنت الغلبانه دى لوحدها وسطهم
آسر:حبيبى انت ياحامى الضعفاء بس ماتخافيش ياحبيبتى جوزها يقدر يحميها سمير الكردى مش سهل زى ماانتى فاكره
مياده:تعرف انا حاسه انها ماقلتلوش إللى حصل
اسر:لو عاوزه تروحى قومى اجهزى بسرعه
مياده وهى بتنط من السرير:حالا هجهز
آسر:يا سلام للدرجه دى صعبانه عليكى
مياده بحزن:اكتر مماتتصور
بدأ آسر ومياده فى تجهيز نفسهم
……………….
فى جناح سمير وبوسى
بوسى كانت لسه نايمه سمير صحى قبلها على رسالة وصلته على تليفونه من كامل بيأكد عليه الدعوه بعد ماشاف الرساله عدل نفسه وحضن بوسى وباسها من شعرها
سمير:بسبوسه
بوسى وهى بتمسح فى عيونها بأيديها:هااااا صباح الخير يا حبيبى
سمير:صباح النور ياعيون وقلب وروح حبيبك
بوسى قامت قعدت نص قعده وسندت بضهرها على السرير
سمير:حبيبى عاوزك تفطرى وتجهزى علشان خارجين
بوسى:هنروح فين ياحبيبى بدرى كده
سمير:معزومين فى منتجع بتاع واحد صاحبى
بوسى وافقت وهى مش عارفه مين صاحب الدعوه اكيد لو كانت تعرف انها هتقابل سيلين وميسون تانى كانت هترفض قامت من سريرها ودخلت أخدت شاور وجهزت لبس للنهار وسمير كمان قام يجهز
بوسى:يلا حبيبى انا جاهزه
سمير:انا كمان جاهز فطرتى الأول
بوسى:لا ماليش نفس
سمير:انا مش عارف فيكى ايه من امبارح لكن مافيش خروج قبل ماتاكلى أى حاجه
بوسى:حاضر يا حبيبى هشرب نسكافيه
سمير:اظن كلامى واضح تاكلى مش تشربى
بوسى مسكت قطعة توست وقطعة جبن وبدأت تاكل ماهى عارفه ان سمير مش هيسيبها غير بعد ماتفطر
خلصت ونزلوا الاتنين
وفى بهو الاستقبال فى الاوتيل اتقابلوا مع آسر ومياده
سمير:صباح الخير
اسر:صباح النور
مياده:صباح الخير يابوسى عامله ايه
بوسى:صباح النور الحمد.لله انتى عامله ايه
مياده:الحمد لله ياقمر
آسر:نستأذن احنا
سمير:اااه اتفضلوا
خرج كل واحد منهم ومايعرفش ان التانى رايح على نفس المكان
سمير:عجباكى انتى مرات آسر
بوسى:طيبه وتحس انها محترمه
سمير:اكيد طبعا آسر شخصية مرموقه واكيد مراته هتكون محترمه
بوسى:مش دايما
سمير:تقصدى ايه ياحبيبى
بوسى :لا عادى بس الوسط بتاع رجال الأعمال ده احيانا بيكون فيه ستات مش كويسه
سمير:اكيد ياحبيبتى كل وسط فيه الكويس وفى الوحش
طبعا بوسى كان قصدها على ميسون وسيلين وأنهم متكبرين وبيتكلموا على الناس لكن سمير ما فهمش كده
وصل آسر ومياده للمنتجع ورحب بيهم الجميع
كامل:اهلا اهلا نورت المنتجع
آسر:اهلا بحضرتك ياكامل بيه
كامل:اهلا يامدام اعرفك مريم مراتى ومالك ابنى ومراته
مريم مقاطعه:اهلا ياحبيبتى ماهما اتعرفوا فى الحفله ياكامل وكمان مدام مياده صاحبة ميسون جدا
مياده بابتسامه:ميرسى اهلا بيكم ااه طبعا اتعرفنا
سيلين وهى بتسلم على مياده :اتفضلى يامياده دى كمان بكره تبقى حماة ياسو
مريم:لا ده الموضوع كبير وانا لازم اعرف ده انا جدته برده
ضحك الجميع ومياده كانت حاسه ان مريم شخصيه مرحه وودوده
كامل وصلهم المكان إللى هيقعدوا فيه
آسر:جميل المنتجع انا أول مره اجى هنا
جسور:ايه ده فعلا مع ان زياراتك لباريس كتير
آسر:لكن بقضى شغلى ومش بخرج من الاوتيل غير للاجتماعات بس
مريم:بحب انا الراجل إللى مايتمتعش بالفسح غير مع مراته
مياده:آسر مابيخرجش من غيرى انا والولاد حتى شهر العسل بتاعنا كان فى باريس
كامل:علشان كده انا قررت انكم تقضوا معانا هنا فى المنتجع يومين قبل ماتسافروا ومجهز الغرف
آسر:لا حبيبى ربنا يخليك انا ورايا شغل
كامل:والله أبدأ انا عامل حسابى واحنا كمان انا وعيلتى ودلوقتي ينضم لينا سمير الكردى وحرمه
آسر:انا لسه مقابله فى الاوتيل لو اعرف كنا جينا مع بعض
كامل:ايوه سمير جاى هنا اسف دى غلطتى كان المفروض اعرفكم
آسر:لا حصل خير
جسور:اهو جاى هناك اهو
كامل:بعد اذنك استقبله
قام كامل ومعاه مريم وسيلين وراحوا يستقبلوا سمير وبوسى وكانت المفاجأه بالنسبه لبوسى
كامل:اهلا بالناس إللى مش بتسأل على صحابها
سمير وهو بيسلم عليه :لا أبدأ انا ماستغناش عنك ياحبيبى
كامل:اعرفك مريم مراتى
سمير:اهلا يامدام تشرفنا
مريم :الشرف لينا احنا
سمير:بسنت مراتى
كامل :اهلا بيكى يامدام بسنت
بوسى:اهلا بحضرتك
مريم وهى بتسلم عليها وتحضنها:اهلا اهلا تشرفنا يا حبيبتى تعالى اتفضلى
مريم أخدت بوسى من سمير ودخلت بيها للمكان إللى الكل قاعد فيه لانها حست ان بوسى مصدومه بعد ماشافت سيلين وفهمت انها ماكنتش تعرف انهم موجودين
مريم:تعالى يابوسى اقعدى جنبى
مياده:اااه بوسى تعالى اتفضلى
سمير:آسر كنت قول انكم جايين هنا كنا جينا مع بعض
آسر:والله لسه قايل نفس الكلام
كامل :يلا حصل الخير المهم ان كلنا مع بعض وهنقضى اجمل يومين مع بعضنا هنا فى المنتجع
بوسى اتضايقت هى هتستحمل تقعد معاهم كام ساعه بالعافيه وخافت ترفض سمير يفهم حاجه
سمير:لا احنا مش عاملين حسابنا
اسر::قولتله كده والله قبلك
مريم:انتوا مش هتحتاجوا أى حاجه لاحضراتكم ولا المدامات بتوعكم انا مجهزه كل حاجه
سمير مسك ايد بوسى :حبيبى ايه رأيك نقعد نغير جو
بوسى :براحتك حبيبى
مريم شافت همسهم
مريم:احنا نستأذن الرجاله بقى وانا هاخد البنات ونقعد براحتنا سيلين مجهزالنا قاعده حلوه
آسر هز راسه لمياده انه موافق وسمير طبطب على ايد بوسى تروح معاهم لكن بوسى كان جواها خوف ليضايقوها لكن مياده مسكتها من ايدها وحست ان مياده بتطمنها
مشى البنات مع مريم سيلين وميسون ومياده وبوسى
وراحوا قعدوا فى كوخ من الخشب على النجيله الخضراء ومفروش بكنبه وكراسى مصنوعه من البامبو ومغطاه بقماش منقوش لونه احمر وملقى على الارضيه المفروشه بالسجاده الحمراء خوداديات محشوه بالفايبر
مريم:بقولكم ايه بقى انا عاوزاكم تعتبرونى امكم هنا زى سيلين وميسون
بوسى كانت قاعده والدموع فى عينيها هى مخنوقه منهم ومش عاوزه تقعد معاهم
مريم :انا عارفه يابوسى انك متضايقه ومش عاوزه تقعدى معانا
بوسى بكدب:لا أبدأ ليه حضرتك بتقولى كده
مريم:اولا انا مش حضرتك خالص انا تقولولى مريومه زى ولادى دول كلهم
ثانيا :انا عارفه انك زعلانه مت سيلين وميسون وعندك حق هما غلطوا فى حقك
بوسى بعد ماسمعت كلام مريم انفجرت فى البكاء وزى ماتكون كانت حابسه دموعها
مريم قامت أخدتها فى حضنها :اهدى حبيبتى والله هما اتضايقوا من نفسهم جدا علشان كده أول مارجعوا حكولى وهما عاوزين يعتذرولك وبصت لسيلين وميسون
سيلين قامت باست بوسى :انا بجد اسفه ماكنتش اعرف انك سمعانى
ميسون:حقك علينا احنا حكمنا من بعيد مانعرفكيش
مريم:خلاص بقى ياقلبى قبلتى اسفهم ولا تحبى اعاقبهم علشان تسامحيهم
مياده:خلاص يابوسى انا عارفه انك زعلانه لكن علشان خاطر مريم هانم
مريم وهى بتض*رب مياده على ايدها بهزار:انتى كمان هتقولى مريم هانم عاوزين تكبرونى ده انا أصغر منكم
ضحكوا كلهم وضحكت بوسى من وسط دموعها
مريم:ايوه كده اضحكى ده انتى قمر وانتى بتضحكى
سيلين:ايوه يا ستى يابخت إللى مريومه ترضى عنه
مربم:بس يابنت ده انتى حسابك معايا انا حعمل فيكى شغل الحموات
ميسون:ماتعرفيش يامريومه تبقى حماة
مريم:والله يابنات الحموات دول مظلومين لو مرات ابنها عاملتها كويس عمرها ماترد الخير بالشر لكن هو انطباع ورثناه من الافلام إللى ظهرت الحماه بشكل سئ
سيلين:انتى ماعندكيش حماه يامياده صح
مياده:لأ متوفيه
مريم :ولا انتى طبعا يابوسى
بوسى:لا ماعنديش
مريم :يلا بقى خلينا نتصافى وقولى ايه إللى زعلك منهم
بوسى ببكاء:زعلت انهم اتهمونى انى بستغل سمير انا عارفه انه أكبر منى بكتير لكن احنا حبينا بعض وعيشنا مشاكل كتير جدا بسبب فرق السن ده
مريم:اكيد اهلك ماكانوش موافقين
أترك تعليق