مالك :تعرفى معنى البوسه دى ايه
سيلين وهى بتلف وتسند براسها على صدره :معناها انك امتلكتنى وامتلكت قلبى ودى حقيقه
مالك:لا ياحبى الحقيقه ان انتى إللى ملكتى مالك العدوى وقلبه وحياته غيرتى عدو المرأة لاكتر واحد بيحبها
سيلين:ده على اساس انك بتحب أى مرأه
مالك:مافيش ست ممكن تملى عينى وقلبى غير سيلين واحده وبس
سيلين:حبيبى انا عمرى كله فداك انت وحدك
مالك:ربنا مايحرمنى منك
سيلين حبت تستغل حالة مالك الرومانسيه دى وتفرجه الفستان إللى اشترته للحفله
مالك:سرحتى فى ايه ياقلب مالك
سيلين:لا حبيبى افتكرت انى افرجك فستانى الجديد
مالك:يلا قومى قيسى وفرجينى
قامت سيلين لبست الفستان وياريتها مالبسته
مالك :جميل ياقلبى قميص النوم ده فين الفستان بقى
سيلين بحزن:قميص نوم ايه ياحبيبى ده الفستان
مالك:فستان ايه انتى عاوزه تروحى الحفله كده
سيلين:عادى يامالك وفيها ايه ماهو كويس اهو
مالك بغضب:سيلين انتى عارفه طبعى يبقى ماتصتعبطيش عليا
سيلين:كده برده انا كده
مالك:سيلييييين الفستان ده مش هيتلبس
سيلين:لا بقى يامالك هلبسه
مالك:مافيش حفله خالص على فكره
سيلين قعدت متغاظه من نفسها ان تسرعها خلاها خسرت لحظه رومانسيه جميله
مالك طفل النور وعطاها ضهره ونام وسيلين طول الليل مش طايقه نفسها ومش عارفه هتلحق تشترى فستان ولا لأ
مالك صحى من نومه الصبح اخد شاور ولبس ونزل من غير مايكلم سيلين ولا كلمه
مريم:صباح الخير ياحبيبى
مالك:صباح النور ياماما
مريم:خير يارب مادمت قلت ماما يبقى ناقوس الخطر دق
مالك:بالله يا أمى تسيبينى فى حالى وفهمى المجنونه دى مافيش حفلات بفستان الرقصات ده
مريم:ليه يامالك ده جميل
مالك بدهشه:لاااا والله شكلك ليكى يد فى الموضوع يامريومه
مريم:انا كنت معاها وهى بتشتريه وعجبنى
مالك بعصبيه:ومش عاجبنى انا انا ياماما جوزها
مريم :خلاص ياحبيبى مافيش وقت الحفله انهارده بالليل
مالك:انا ماشى قبل مااعصابى تخونى
خرج مالك وركب عربيته علشان يروح على جامعته لكن صعب عليه يكسر فرحتها ويقلل منها قدام اهلها وكمان مش هيقدر يسيبها تروح الحفله بالفستان ده
قرر يعتذر عن محاضراته ويروح يعملها مفاجأه
وفعلا راح مالك على أشيك اتيليهات الملابس السواريه فى باريس ونقى فستان اسود فى بيج طويل مطرز بفصوص من بدايه الكتف حتى منتصف الفستان
بكم من التل لون الجلد من جانب واحد والجانب الآخر بدون أكمام
اخد الفستان ورجع الفيلا كان الجميع على سفرة الفطار
سيلين أول ماشافته استأذنت منهم وقامت
مالك مسكها من ايديها وشدها ليه خبطت فى صدره العريض حضنها بأيد وايد ه التانيه شايله كيس كبير
مالك:عارف انك زعلانه لكن انتى عارفه انى راجعى وديكتاتور وحبتينى على كده ومتأكدة من حبى ليكى وأنا يا ستى جيبتلك فستان علشان تروحى بيه يلا اتفضلى
سيلين عيونها دمعت علشان ظلمته
الكل كان ساكت وفرحان لفرحت سيلين وعلى حب مالك ليها
جسور حب يكسر حالة الهدوء
جسور:ماشى يا عم الديكتاتور انت بس تلاقيك خوفت تنام فى الليفنج واحنا موجودين
سيلين:لا يا جسور ده زعله صعب اوى ده نام ولا عبرنى
مريم:ربنا يهديكم ويفرح قلبكم
قامت مريم دخلت المطبخ وشويه ووصلت رساله لجسور وميسون كانت قاعده هتتجنن وتعرف فيها ايه
جسور:طيب انا هستأذن منكم
سيلين:أستنى ياابنى نروح الاجتماع مع بعض
جسور:لا معلش انا همشى وانتى تعالى براحتك وبعدين الراجل صارف ومكلف اطلعى ياماما فرجيه الفستان عليكى
مالك:مالكش دعوه انت مال الدنيا كله مايغلاش على روحى وام ولادى
سيلين :وبالعند فيك انا هطلع افرجهوله
جسور:ههههههه ربنا يهنيكم يا ستى….سلام ياصاحبى
مالك:مع السلامه ياقدرى
خرج جسور قصاد نظرات ميسون إللى بمجرد ماخرج راحت لمريم على المطبخ
ميسون:مريومه انا عاوزه عربيتك والسواق
مريم :اتفضلى ياحبيبتى رايحه فين هتاخدى ياسو معاكى
ميسون بأستعجال:لا لا خليه خليه معاكى
جريت ميسون ركبت مع سواق مريم وخلته يمشى ورا عربية جسور
مريم مسكت تليفونها واتصلت بجسور
مريم:الو ايوه ياحبيبى انتبه مراتك طلعت وراك
جسور:شايف العربيه بتاعتك
مريم:وهتعمل ايه
جسور:هتوها ماتقلقيش
مريم:طيب ياابنى خد بالك من طريقك
قفلت مريم مع جسور واتأكد ان خطتهم ماشيه صح ودعا ربنا ان مراته ترجع لعقلها وتبطل تعلقها المرضى بأبنها
………..نرجع بقى لسيلين ومالك
طلع مالك ورا سيلين أوضتهم وكانت لبست الفستان إللى هو اختاره واللى كان اجمل من فستانها
سيلين وهى بتلف بيه :وااو ده جميل رائع تسلم ايدك حبيبى
مالك:هو جميل علشان انتى لبساه بس
سيلين وهى بتحضنه:أسفه انى ضايقتك بالليل
مالك مسك ايدها واخدها وقعدوا على شيزلونج فى الاوضه
مالك :حبيبتى صحيح انا اتضايفت من الفستان لكن إللى زعلنى اكتر الوقت إللى اختارتيه علشان تفرجينى الفستان فيه انتى سرحتى وفكرتى ان ده الوقت المناسب وتخيلتى ان علشان انا هادى ورومانسى معاكى هوافق على حاجه غلط
سيلين:أنا أسفه حقيقى أسفه انت ازاى بتقدر تعرف انا فكرت فى ايه كده ازاى
مالك:علشان انا بحبك اوى بعشقك وبتفنن فى انى افهم كل حته فيكى
سيلين:أنا كمان بحبك اوى و بعشقك يمكن اكتر منك كمان لكن مش بقدر افهم دماغك دى أبدأ
مالك:انتى كل تفكيرى
مالك اخد سيلين فى حضنه وهى استسلمت تحت ضغط رومانسيته وحنانه
ولازم تسكت شهرزاد عن الكلام المباح
…………….. ………………
اما ميسون بعد مالفت ورا جسور وتوهه السواق لحد ما اختفى أثره رجعت للبيت وهى متغاظه
مريم:ايه ياحبيبتى عرفتى حاجه
ميسون:لا يامريومه زاغ منى المهم انا عاوزه اروح بيوتى سنتر واشترى فستان جامد بسرعه
مريم :يلا بينا بسرعه طيب
ميسون:طيب وياسو هنسيبه لواحده
مريم:ماتخافيش مع ولاد سيلين والبيبى سيتر بتاعتهم وكامل موجود وسيلين ومالك
ميسون:قلبى مش مطاوعنى
مريم:طيب ياحبيبتى خلى قلبك مع ابنك وسيبى حبيبك مع واحده تانيه
ميسون:يلا يامريومه يلا
خرجت مريم مع ميسون وراحوا على بيت ازياء من إللى مريم بتتعامل معاهم وأشتروا فستان أسود برقبه صغيره وبدون أكمام مطرز بالفصوص الفضيه من الرقبه الى تحت الصدر مع حذائه الفضى
وراحت على البيوتى سنتر
فى الوقت ده كان معاد الاجتماع راحت سيلين واضطر كامل يروح معاها وفى مقر الاجتماع اتقابلوا مع آسر الطاروطى وسمير الكردى
كامل رحب بسمير جدا لان مجالهم فى الاستثمار السياحى واحد وعرفه بسيلين وانها القائمه بأعماله حاليا
واتقابل جسور ب آسر ودار بينهم حوارات شغل
عدى الاجتماع وكامل اخد وعد من سمير انه يقابله قبل مايرجع مصر فى المنتجع السياحى بتاعه
وصل كامل وسيلين وجسور الفيلا وكانت ميسون ومريم لسه ماوصلتش
سيلين نادت على الشغاله
سيلين:فيرا فيرا
فيرا:نعم مدام
سياين:فين مريومه وميسون
فيرا:لسه مش رجعوا مدام
سيلين:طيب شكرا
فيرا:عفوا مدام
جسور:جديده البنت دى معاكم صح
سيلين:ايوه طيبه وغلبانه جدا فليبينيه بتتكلم عربى
جسور:بس العربى بتاعها تحفه
سيلين بصت وراه وقالت:واو دى مراتك إللى بقت تحفه
جسور التفت يشوف سيلين تقصد ايه وشاف ميسون وهى راجعه من البيوتى سنتر
لف وشه وغمز بعينه لسيلين
جسور :ايه القمر ده
ميسون اتكسفت وحطت وشها فى الارض معقول هى كانت أهملت نفسها للدرجه دى
مريم حست بيها:طول عمر بناتى قمرات الرجاله هى إللى بتعرف تخلى الست يظهر جمالها او لأ
سيلين وهى بتحضن مريم:ايوه كده يامريومه اديهم على رأسهم
مالك كان نازل من فوق جه ومسكها من شعرها بهزر
مالك:مين يا حبيبتى إللى ياخد على راسه
سيلين رفعت ايدها باستسلام:انا بتكلم على جسور
جسور:اه يابنت اللذينه ناس ماتجيش غير ب……….
سيلين:خلاص بقى استر عليا ربنا يسترها معاك
ميسون:صحيح يا حبيبى استر عليها علشان انت بجد محتاج ربنا يسترها معاك
كلهم كانوا فاهمين قصد ميسون من كلامها
جسور:سيبك انتى انا مش هوديكى الحفله بعد اذنكم عاوز مراتى فى كلمه سر
مالك :هههههه ليه انت كمان صارف ومكلف
جسور:شوفت ياصاحبى الدنيا داين تدان
طلع جسور ومعاه ميسون على اوضتهم فى بيت كامل العدوى
وقعد كامل ومريم وسط احفادهم
وسيلين ومالك طلعوا اوضتهم يجهزوا
……………………….
اما سمير وهو راجع من اجتماعه راح اشترى لبوسى فستان غايه فى الجمال فستان أول ماشافه شاف شقاوة بوسى جواه الفستان كان من اللون الازرق وعلى شكل ذيل السمكه بحماله واحده عريضه ومطعم بالورود من الذيل مع درجات اللون البنفسجى اللامع
ان فى معاه اكسسوراته من فصوص الالماظ السماوى والحذاء بنفس اللون رجع الاوتيل واتقابل بأسر الطاروطى إللى هو كمان كان شايل كيس كبير يدل انه فستان لمراته
وصل كل واحد لجناحه
مياده جريت على آسر وحضنته وأسر ضمها ليه وباس رأسها
مياده:حبيبى اتأخرت وانا كنت زهقانه لوحدى
آسر:اسف ياقلبى كنت بجيب اجمل فستان لاجمل مياده فى الدنيا
خرج آسر الفستان من كيسه وكان لونه فضى طويل مبطن من الداخل باللون البيج لون الجلد لكن واحد من الفيليه ومعه حذاء فضى
مياده:ده جميل اوى ياحبيبى تسلم ايدك
اسر:هيكون اجمل علشان حبيبى هو إللى هيلبسه يلا اجهزى علشان نلحق نروح
…………………
اما سمير دخل جناحه لقى طفلته نايمه راح قعد جنبها على السرير وبمنتهى الحنان فضل يلمس شعرها
سمير:بوسى قومى يابيبى قومى
بوسى بصوت كله نوم :ااااااه سيبنى شويه كمان
سمير:يلا حبيبتى علشان الحفله وتلحقى تجهزى
بوسى وهى بتنط من السرير:هالات الحفله حاضر حاضر
سمير ضحك عليها بأعلى صوته :يا سلام كل ده علشان الحفله
بوسى:بس لسه ماجيبتش فستان الحفله
سمير طلع شنطه هدايا من ورا ضهره ومدهالها :اتفضلى ياقمرى انا برده اقدر انسى حاجه زى دى يلا اجهزى قوام وانا هاخد شاور واجهز
……….
الحلقه السادسه/
جهز جميع ابطالنا وكل وسيم اخد نصفه التانى وراح على الحفله وهناك
دخل آسر ومعاه مياده استقبلهم المنظمين للحفل وقعدوهم فى طرابيزه من المجموعه المخصصة لرجال الاعمال المصريين وكان فى الطرابيزه إللى جنبهم جسور وميسون معاهم سيلين ومالك إللى أول ماشافوهم قاموا يرحبوا بأسر الطاروطى
جسور:آسر باشا اهلا بحضرتك ومبروك الصفقه الجديده
آسر:حبيبى اهلا بيك والله يبارك فيك سمعت ان اتت كمان أخدت صفقه حلوه
جسور:الحمد لله رست علينا بعد عذاب ….عاوز اعرفك على مالك العدوى ومراته سيلين الشامى بنت عمى
آسر:اه اهلا وسهلا بيكم
مالك:اهلا بيك ومد ايده سلم عليه وسلم على مياده
سيلين كمان سلمت عليهم
ميسون:دى بقى مياده إللى حكيتلك عليها ياسيلى
سيلين:اهلا بيكى دى ميسون مالهاش سيره غيرك وغير بنوتك إللى ياسو بيحبها
ضحكوا كلهم على علاقه الطفلين المنتشره بين العيلتين
جسور:احنا هنفضل واقفين كده تعالوا اقعدوا معانا
آسر:لا خليكم براحتكم
مالك:لا والله اتفضلوا لازم نعرف حكايه ياسين الشامى مش يمكن نقرا فاتحه دلوقتى
آسر:ده انت بتدبسنى من دلوقتى فى ابن جسور
ضحك الكل وقعد آسر ومياده وكان فى جو من المرح فى القاعده سيلين وميسون ومياده انضموا لبعض وباقى الرجال طبعا تابعوا كلامهم وكالعادة اتحول الحوار لكلام عن الصفقات و البزنس
قطع كل الحوارات دخول سمير الكردى وبوسى وطبعا أول ماشافوه الكل قام سلم عليه وعلى مراته
ووسط دهشة ميسون وسيلين ان بوسى مرات سمير مش بنته كانت نظرات بوسى ليهم وهى حاسه بالسؤال الداير فى عقلهم إللى هو ازاى هى مراته
جسور:اتفضل معانا سمير باشا
سمير:لا معلش خلينا هنا خدوا راحتكم
استأذن سمير وقعد فى طرابيزه لوحده هو وبوسى
سمير ماكانش حابب بوسى تدخل معاهم فى حوارات
هما مهما كان شباب وسيم ورجال أعمال كبار
بوسى:احسن ياحبيبى انك ماوفقتش نقعد معاهم
سمير:ليه ياقلبى حد فيهم ضايقك
بوسى:لا أبدأ بس حاسه ان الستات بتوعهم باردين
سمير :ههههههه عرفتى مجرد ماسلمتى عليهم
بوسى:زى ماعرفت ان مرات آسر طيبه ومتواضعه مش مغروره زى دول
سمير وهو بيمسك ايدها:حبيبى ماحدش يقدر يتغر عليكى انتى الملكه
بوسى :حبيبى انا يا مدلعنى
سمير:بوسى عاوز أسألك سؤال لكن محتاج تجوبينى بصراحه
بوسى:أسأل ياحبيبى
سمير:وانتى شايفه شباب شيك ووسيم ويمكن اغنى منى عقلك مش بيقولك انك أتسرعتى واتجوزتينى
بوسى:تفتكر إللى تتجوز راجل زيك ويحبها حبك ليا ممكن عيونها تشوف راجل تانى مهما كان سنه او شياكته او ماله وبعدين بس كده على ستاتهم حتلاقيهم بيحسدونى عليك
سمير:أنا بحبك اوى
بوسى وهى بتشد على حضن ايده بأيديها: مش قدى انا بحبك اكتر
فى نفس الوقت كانت ميسون وسيلين عينيهم مش بتنزل من على سمير وبوسى
سيلين:شوفتى البت بتدلع على الراجل ازاى
ميسون:علشان تعرف تقلبه فى قرشين ولا ايه رأيك يا مياده ده الراجل من عمر باباها
مياده:لا على فكره هى طيبه جدا وتلقائية انا اتعرفت عليها أول ماوصلت الاوتيل
ميسون:والله انتى إللى طيبه دى شكلها بتستغله
سيلين:هو فى واحده ترضى تتجوز راجل من سنه غير علشان الفلوس
مياده:ممكن طبعا لو فى حب
سيلين:يعنى لو كان اتقدملك كنتى وافقتى
مياده:لو حبيته ايوه طبعا
ميسون:انا رايحه التواليت اظبط المكياج تيجوا معايا
سيلين:انا جايه معاكى
مياده:لا خلينى انا
راحت ميسون وسيلين وكانت سبقتهم بوسى وراحت التواليت تظبط مكياجها وفستانها
دخلت ميسون وسيلين وهما مش شايفين بوسى إللى كانت جوه كبينه من الموجوده فى التواليت
سيلين:هى صاحبتك دى بتدافع عن العيله دى كده ليه
ميسون:هى مياده طيبه وبسيطه وبتتعامل مع الناس بقلبها
سيلين:يعنى احنا اشرار
ميسون:لا مش اشرار بس بنفهم فى الناس والبنت واضح عليها جدا سنها وانها جوازة مصلحه
سيلين:ههههه لا وشوفتى ماسكه ايده ازاى دى المفروض تقوله يابابى
ميسون:يلا احنا مالنا خلينا فى الباشا بتاعى إللى شايفله شوفه تانيه
خرجت بوسى بعد ماسمعت كلامهم كله بصتلهم بعيون مكسوره وخرجت من التواليت كله
اما ميسون وسيلين ارتبكوا جدا لما شافوها
ميسون:ياخبر دى سمعتنا احسن تطلع تقوله
سيلين:وايه يعنى ده رأينا وهتقوله ايه الناس شايفين انى عيله وبستغلك
ميسون:بس شكلها زعلت من كلامنا
سيلين:عادى بقى واحنا كنا نعرف منين انها جوه وبعدين هى إللى اتصنطت علينا المفروض تتكسف من نفسها
ميسون:ايه يابنتى هى فرنسا علمتك البرود واللا مبالاه
سيلين:الناس هنا ماعندهاش مشاعرنا فى مصر عندهم واحد وواحد يساوى اتنين
اما بوسى بعد ماخرجت وقفت بره تبكى وكانت حاسه انها مخنوقه ومش قادره تتنفس حاولت تهدى نفسها وبعدها رجعت لطرابيزة سمير
سمير:اتأخرتى اوى ياقلبى
بوسى:لا عادى على ماظبط الفستان
سمير:براحتك حبيبتى مبسوطه هنا ولا تحبى نخرج أى مكان تانى وانتى قمر كده
بوسى:هو ينفع نمشى من هنا
سمير:مالك حبيبى انتى كنتى فرحانه بالحفله اوى
بوسى:الجو خنقه اوى هنا حساه رسمى زياده عن اللزوم
سمير:يلا ياروحى من هنا
سمير اخدها وسلم على جسور وأسر ومالك وكانت ميسون وسيلين لسه مارجعوش ومياده سلمت على بوسى بحب وموده ويمكن طريقة مياده خلت بوسى تهدى شويه
ميسون وسيلين رجعوا لطرابيزتهم واول حاجه عملوها انهم يشوفوا رد فعل سمير وبوسى لكن اكتشفوا انهم مش موجودين
ميسون:مياده هو الراجل إللى كان هنا هو ومراته مشيوا
مياده:ايوه سلموا علينا ومشيوا
ميسون:قالوا حاجه لجسور
مياده:لا خالص سلموا عادى جدا
ميسون:أصلها سمعتنا فى التواليت واحنا بنتكلم عنها
مياده رفعت ايدها على فمها بصدمه :هااا
وطبعا عيون آسر إللى متبعاها شافت حركتها التلقائيه
أسر بصوت خافت:حبيبتى فيكى حاجه
مياده:لا أبدأ تمام
آسر:تحبى نمشى
مياده:ياريت
آسر حس بضيقة مياده من الحفله وهو أهم شئ عنده راحتها
آسر:احنا كمان نستأذن
جسور:لسه بدرى
آسر:لا خلو اوى كده احنا عندنا خطط تانيه
جسور:اووووه ماشى ياباشا لكن هنستناك بكره فى المنتجع واعتبره ياسيدى من ضمن الخطط هيعجبك جدا غير أن عمى كامل مأكد عليا دعوتك انت والمدام
آسر:ان شاء الله هكلمك الصبح قبل مااتحرك
خرج آسر ومياده من الحفله
اسر:حبيبى مالك ايه إللى ضايقك وخلاكى تتصدمى اوى كده
مياده:وعرفت منين انت كنت بتتكلم مع اصحابك
آسر:ا انا بشوف حبيبى بقلبى ولو كنت مشغول مع الدنيا كلها عمرى ماانشغل عنك أبدأ
مياده:ربنا يخليك ليا
آسر:قوليلى بقى كان مالك
مياده:تعرف يااسر اكتشفت ان ميسون دى بتقيم الناس بالفلوس
آسر:قالتلك حاجه تضايقك
مياده:لا مش انا لكن اتكلموا كتير جدا على بوسى مرات الراجل ده إللى قابلنا فى الاوتيل
آسر:ايوه سمير الكردى
مياده:ايوه هو ده بيقولوا انها صغيره وهو كبير وانها بتستغلوا
آسر:لا طبعا اولا سمير ده راجل كان له علاقات كتير جدا ومش أى واحده تقدر تضحك عليه ثانيا دول عندهم اولاد وبيحبوا بعض جدا
مياده:يعنى ظلموها وجرحوها كمان
آسر:وهى هتعرف منين انهم بيتكلموا عليها
مياده:سمعتهم فى التواليت
آسر:ياااه عيب جدا إللى حصل ده المهم ياقلبى انتى ماتضيقيش نفسك احنا جينا هنا نتبسط
مياده:هى صعبت عليا وشوفت فى عيونها نظرة انكسار وجعتنى اوى
آسر:يسلملى حبيبى الحنين ده
مياده:تسلم ياحبيبى
آسر:تعالى بقى هسهرك فى مكان ينسيكى الزعل ده
آسر اخد بوسى على رستوران من أكبر الاماكن فى باريس وطلبوا العشا
………………….
اما بوسى كانت شايله فى قلبها وموجوعه من إللى سمعته قضت الليل وسمير بيحاول يسعدها ويخرجها من الحاله إللى مش فاهم سببها
سمير:قمرى مكشر وزعلان وانا عاوز اعرف ماله
بوسى:مافيش ياحبيبى انا بس تعبانه شويه
سمير وهو بيحضنها :حبيبتى انتى مخبيه عنى ايه
بوسى:بجد مافيش غير انى تعبانه جدا
سمير احتار فى حالتها وبدأ يخاف لتكون ندمت على جوازها منه بعد ماشافت الشباب فى الحفله وده كان أول سبب بيجى فى بال سمير دايما
سمير:حبيبى قومى نامى
بوسى:ايوه انا فعلا عاوزه انام لكن محتاجه انام فى حضنك
سمير شد بوسى من ايدها بحنيه واخدها فى حضنه وراح بيها على السرير فضل واخدها فى حضنه وبيهدهدها زى البيبى الصغير لحد.مابوسى نامت لكن لاحظ دموعها على خدها
سمير لنفسه:ياترى يابوسى ايه إللى مخبياه عليا
……………
خلصت الحفله ورجع مالك وسيلين وجسور وميسون
مريم كانت فى انتظارهم
مريم:حمد الله على سلامتكم اتبسطوا
جسور:ايوه كانت حفله جميله
سيلين وميسون كانوا ساكتين ومريم انتبهت لده
جسور:انا مش قادر انا هطلع انام علشان بكره فى ناس عازمين ناس فى المنتجع
مريم:اطلع حبيبى أرتاح وانت يامالك انا هتكلم مع البنات ويحصلوكم
مالك:اوك انا كمان فاصل همو*ت وانام ماتتأخريش ياروحى
سيلين:حاضر ياحبيبى
جسور:يلا وانا طالع بسرعه بقى يا مريومه علشان ميسون تلحق ترتاح شويه
مريم:امشى ياواد انت وهو قال ترتاح قال
ضحك جسور ومالك وطلعوا
مريم:مالكم شكلكم فى حاجه
سيلين:بصراحه يامريومه احنا عملنا مصيبه
مريم:خير عملتوا ايه
ميسون وسيلين حكوا لمريم إللى حصل مع بوسى
مريم:انتوا غلطانيين وبتحكموا على الناس بالمظاهر
سيلين:المشكله بقى ان بابا كامل عازم الراجل ده ومراته بكره وانا لازم اكون موجوده لان فى شغل مع شركته
مريم:كويس جدا دى فرصه تصلحوا غلطكم وتعتذروا ليها بشكل غير مباشر
ميسون:ازاى
مريم :اولا تعاملوها كويس لانها هتكون ضيفتنا
سيلين:وثانيا
مريم:تجهزى مكان خرافى تقضى فيه وقت خاص هى وجوزها
سيلين:دى سهله
مريم :وتانى مره حافظوا على مشاعر الناس وعموما انا بكره هكون موجوده
سيلين:طيب تصبحوا على خير اطلع احصل مالوكى
مريم :وانتى ياحبيبتى اطلعى حصلى جسورك
ميسون:حاضر تصبحوا على خير
مريم وسيلين :وانتى من أهل الخير
طلع البنات اوضهم
مريم لنفسها:ربنا يهديكم ويصلح أحوالكم يلا لما اطلع أشوف كامولى انا كمان هى جت عليا
………
الحلقه السابعه/
بدأ نهار يوم جديد فى مدينه العشق والجمال باريس
الكل فى فيلا كامل العدوى كانوا بيجهزوا نفسهم علشان يروحوا المنتجع السياحى بتاع كامل يستقبلوا ضيوفهم
مريم :صباح الخير يابنات جاهزين
سيلين :صباح النور يامريومه ايوه حبيبتى انا ومالك والولاد جاهزين