اشرقت شمس يوم جديد يوم مش عادى يوم فرح وهنا وسرور مافيش مكان للحزن ولا الحقد ولا الكره صحيت مريم أول واحده وبروحها الحلوه وامها الخفيف قامت عملت حاله جميله وبدأت تخبط على غرف البنات وسيدات القصر كلهم قومت الكل من نومه واخدتهم ونزلت يحضروا الفطار الكل كان يستجيب لمريم حتى عايده حست انها قريبه منها
جهزت الفطار أثناء تجهيز الفطار كانت كلمت مالك وجسور ييجوا يفطروا معاهم
وصل العرسان وفطر الجميع فى جو مليان بهجه وسرور بفضل مريم
مريم:يلا انتوا مش اكلتوا اتفضلوا امشوا اجهزوا وانت ياكامل روح اطمن على كل حاجه بنفسك واحنا زمان البنات بتوع البيوت سنتر حيوصلوا حالا الساعه ٧ بالظبط تكونوا قدامى
الجد:وانا مش عوزانى اساعد بحاجه
مريم:حضرتك على راسنا ياباشا احنا كلنا نخدم حضرتك
الجد:مدام مريم انا مش لاقى كلام اعبر بيه عن شكرى ليكى انتى انسانه عظيمه ويابخت عيلتى بوجودك فيها
مريم:الشرف ليا انى اكون من عيله زى عيلة الشامى ربنا يبارك فى حضرتك
الجد:ربنا يخليكى ياهانم ويخليلك مالك وكامل
كامل:ربنا يديك الصحه ويخليك لينا كلنا وبعدين خلوا بالكم مريومه مش بتحب الكلام ده احسن حتعيط وتقلبها نكد ومافيش وقت النكد انهارده
قامت ميسون وسيلين يحضنوا مريم ويشكروها على كل حاجه عملتها علشان تفرحهم
مريم والدموع فى عيونها:يلا بقى احسن حعيط والله ورانا حاجات كتير
عدى الوقت ودقت الساعه السابعه مساءا وصل العرسان واول ماشافوا العرايس اتبهروا من جمالهم كانت سيلين لابسه الفستان الابيض المصنوع من التل والكبير المطرز على شكل قلب من عند الصدر وبأكمام من الفيليه بنفس لون الجسم ومطرز من الصدر للوسط وفى تطريزات على التل من الذيل وسايبه شعرها على جنب واحد كله اما ميسون كان فستانها بحمالتين ومطرز من الصدر ومن الوسط الذيل عباره عن طبقات من الاوراجانزا والتل البنات كانوا ملكات جمال بفساتينهم الهاديه ومكياجهم البسيط
والعرسان كانوا لابسين البدل السوداء تحتها القمصان البيضاء والكرافات
مشى الجميع من القصر متجهين للقاعه المجهزه للفرح وكان أضواء الاوتيل كلها مضاءه وكان سائد عليها الأضواء الزرقاء والبيضاء لتضفى سحر جذاب للمكان يزداد سحره بطلة عرايسنا وعرسانهم دخلوا على الموسيقى الهاديه وبعدها قاموا بالرقصه السلو
سيلين وميسون راحوا أخدوا المايك من الدى جى
سيلين:اولا انا برحب بكل الناس إللى حضرت الفرح لكن بعد اذنكم انا وميسون حابين نعمل حاجه خاصه
الكل كان قاعد مصدوم وعاوز يعرف فيه ايه
ميسون:طنط مريم لو سمحتى تعالى
مريم راحت على الاستيدج جنب البنات
سيلين:إحنا حابين نشكرك قدام الناس دى كلها انتى تعبتى معانا وجهزتى كل حاجه فى وقت قصير وفرحتينا من قلبنا
ميسون:ماما مريم انتى احلى حاجه حصلت فى حياتنا
مريم :انا مش عارفه اقول ايه طبعا على الكلام الكبير ده لكن بجد إللى يستاهل الشكر هما أمهاتكم إللى جابوكم ليا علشان تعوضونى ان ربنا مارزقنيش ببنت
طلع على الاستيدج عايده وابتسام وسميه ومشيره ونزل جسور ومالك والكل رقص وكانت عايده وابتسام يحضنوا سيلين وسميه بتحضن فى ميسون وفى الاخر استلم الجد ايدين البنات وسلمهم لعرسانهم
انتهى الفرح وكان كامل حاجز جناحين فى الاوتيل طلع عليهم العرسان اما باقى العيله رجعوا على القصر ومعاهم كامل ومريم
الحلقه الاخيره ..الجزء الثانى
بعد ماطلع العرسان كل واحد لجناحه
مالك:حبيبى ايه الجمال والحلاوه دى بقى
سيلين بخجل:بجد عجبتك
مالك:أنتى عندك شك انتى عجبانى من زمان يلا حبيبتى ادخلى غيرى لبسك وتعالى علشان نصلى
دخلت سيلين تغير لبسها لكن وقفت ماكنتش عارفه حتصلى ازاى وهى معهاش لبس الصلاه لكن لقت مريم محضرالها اسدال ابيض مكتوب عليه حروف عربيه لبست قميص نومها وعليه الاسدال
مالك أول ماشافها :لا ده انا حخليكى تتحجبى ده انتى شبه الملايكه بالأبيض ده
سيلين:…………
مالك:ايه بقى تعالى نصلى علشان كده مش هينفع
صلوا الاتنين ومالك طبعا كان أمام
وبعدها سكتت شهرزاد عن الكلام المباح
اما عند جسور وميسون أول مادخلوا الجناح جسور حضنها ورفعها من الأرض وبقى عمال يدور بيها فى مكانه
ميسون:حبيبى انا فرحانه اوى اخيرا بقيت جوزى
جسور:يابت انقلب شويه
ميسون وهى بتض*ربه فى كتفه :كده برده تكسفنى
جسور:بم*وت فيكى وانتى مكسوفه طيب ايه
مبسون:ايه ايه
جسور:حتنامى بالفستان
ميسون:لأ حغيره طبعا
جسور :ادخلى بسرعه طيب
غيرت ميسون لبسها وخرجت كان جسور فى انتظارها وطبعا حتسكت شهرزاد عن الكلام المباح
..
اما فى القصر الكل رجعوا فرحانين جدا وبيشكروا مريم على تعبها لكن الجد حب يقوى العلاقه وطلب من كامل الشراكه
الجد:احنا دلوقتى ياكامل بقينا عيله واحده وانا عارف انك عاوز ميسون تشتغل معاك لكن انا حابب اعوضها وبترجاك تدخلها شريكه معاك بنصيبها من ورثها
كامل:موسى باشا حضرتك عارف انى الحمد لله مش محتاج شراكه ده غير ان سيلين خلاص بقت مرات مالك ابنى الوحيد ووريثى وتقريبا ده كله مالها هى وجوزها
الجد:كلامك ده بيطمنى اكتر عليها وان ربنا عوضها من عنده بعيله تحبها وتديها إللى انا حرمتها منه طول عمرها لكن ريحنى زى ماامنت مستقبل ميسون عاوز اامن مستقبل سيلين
كامل:زى ماتحب حنفذلك رغبتك لكن بطريقتى
الجد:طريقتك ازاى
كامل:حضرتك حتشوف نصيب سيلين كام وانا حخلى المحامى يكتب عقد شراكه بالنسبه إللى حضرتك حتحددها لكن مش حاخد الفلوس الفلوس حتوضعها فى أى بنك بأسم سيلين واعتبر ده مهرها من مالك
الجد:ايه ده إللى انت بتقوله حتكتب جزء من مشاريعك باسمها من غير مقابل
كامل:المقابل أكبر من الفلوس بكتير كفايه ان هى بنتنا ومرات ابننا وان شاء الله ام احفادنا
الجد:انا مش مصدق ان لسه فى ناس زيك انا ومدام مريم حقيقى انتوا بتخلونى احس انى صغير جدا
لما خوفت على الثروه لكن كان خوفى ان العيله تنقسم
مريم:متزعلش منى ياباشا الفلوس عمرها ماتجمع الفلوس تفرق وحضرتك مش غلطان لوحدك الكل غلط لكن ان الأوان كل واحد يصلح غلطه وده كله قدر ربنا كاتبه وكان لازم يحصل
الجميع :ونعمه بالله
عايده:بعد اذنك ياعمى بما انك حتدى سيلين حقها فأنا عوزاك تشوف نصيبى وتضيفه لسيلين كفايه انى ماكنتش الام الصح ليها
الجد:لو دى رغبتك اما معنديش مانع لكن انتى حتعيشى ازاى انا عندى إللى يكفينى
اتفق الجميع واطمن الجد على سيلين وكلم عادل المحامى يجهز الأوراق قبل سفر سيلين ومالك
لكن مفاجأت مريم مابتنتهيش حجزت للعرسان شهر العسل فى جزر المالديف وطبعا علشان شغل مالك وجسور ودراسة البنات كان اسبوع بس
سافر العرسان على الجزيره الخاصه وعاشوا اجمل اسبوع عسل فى حياتهم كان كله مرح وشقاوه من سيلين وميسون عدى الاسبوع ورجع مالك وسيلين على باريس وقابلهم مريم وكامل هناك
اما ميسون وجسور رجعوا على مصر واستقبلهم مشيره وسميه
سيلين مارست شغلها مع كامل وكان ممسكها كل الشغل وكمان كانت بتدرس لكن بعد شهرين من الجواز حست سيلين بتعب وارهاق وهى فى المنتجع
كامل:سيلين فيكى ايه ياحبيبتى مالك شكلك تعبان
سيلين:مش عارفه يابابا حاسه انى دايخه شويه وبردانه
كامل:استنى حكلم مريم تيجى ترجعك البيت
سيلين لسه حتتكلم اغمى عليها
كامل بخوف:سيلين سيلين
مسك تليفونه وكلم مريم وكلم دكتور المنتجع وصل الدكتور ومريم وصلت بعديه بدقائق
بعد ماكشف الدكتور على سيلين وماكنش فى حاجه ظاهره طلب اختبار حمل لان الأعراض كلها كانت بتظهر كده وبعد الاختبار طلع النتيجه ايجابيه وسيلين كانت حامل طبعا الدكتور طلب منهم انها تتابع مع طبيب متخصص للنساء والتوليد
مريم:مبروك ياحبيبتى الف مبروك اسمعى انتى من انهارده اجازه من الشغل كامل يمسك هو الشغل انتى حتقعدى فى البيت وانا حخدمك
سيلين:حبيبتى يامريومه ربنا يخليكى ليا
كامل:انا حكلم مالك ييجى على هنا
مريم:لا خليه يروح على البيت وانا حاخد سيلين ونرجع أوعى تقوله ياكامل خليها مفاجأه
رجعت مريم وسيلين على البيت مالك رجع بعدهم بساعتين
مالك:السلام عليكم ايه ده سيلين موجوده فى البيت هو كامل استغنى عنك ولا ايه
مريم:هو يقدر يستغنى عنها هى بس تعبت شويه وانا جيبتها
مالك بخوف:حبيبتى مالك قومى نروح لدكتور ولا لأ خليكى انا حجيبه
سيلين:خلاص حبيبى شوية ارهاق بس
مالك بعصبيه:قولتلك انتى بتتعبى نفسك مافيش شغل انا مش مستغنى عنك
مريم:حبيبى اهدى مالك ياابنى الموضوع مش صعب اوى كده
مالك:مش صعب ايه ياماما انتى مش شايفه وشها اصفر ازاى انا قولت مافيش شغل خلاص خلصنا
مريم:هى مش حتشتغل تانى غير بعد تسع شهور
مالك:اشمعنا تسع شهور خلاص مافيش شغل خالص
مريم:ويقولولى عليك دكتور فى الجامعه ياابنى افهم
بقولك تسع شهور افهم
مالك بذهول وابتسامه:يعنى سيلين حامل
سيلين:أيوه شوفت بقى زعقتلى على طول بس
مالك:بجد ياحبيبى يعنى انا حبقى بابى
مريم بفرحه:وانا حبقى تيتا ياواد
مالك وهو بيبوس ايد سيلين :مبروك ياقلبى ربنا يقومك بالسلامه
سيلين:مبروك لينا كلنا ياحبيبى ربنا يخليك ليا