-انا نزلت من البيت الساعه ١٠ الصبح
السواق وصلني علي الشركه ١٠:٣٠
خلصت شغل حوالي الساعه ٥
بعدها السواق وصلني شركه واحد صاحبي
وفي الطريق حاولت اوصل لرنا كان بيديني مغلق كل مره
قولت يمكن عندها شغل كتير و مش فاضيه تكلمني
بعد ما نزلت من شركه صاحبي روحت البيت ملقتش رنا
شويه والباب خبط فتحت لقيت ناس غريبه فضلوا يضربوا فيا ومن بعدها محستش بنفسي غير وانا هنا
فريد وهو بيهز رأسه بسخرية:
-لا برافو برافو تأليف هايل تنفع سيناريست يا عاصم بجد
عاصم بغضب:
-انا بقول الحقيقه مش بكذب عليك
فريد وهو بيجز علي أسنانه بعنف :
-اومال اللي شوفته انا ورنا ده يبقي مين عفريتك
-معرفش صدقني معرفش اكيد في حاجه غلط في الموضوع والله انا بحب رنا ومستعد اسيب الدنيا كلها علشان راحتها
فريد ارجوك صدقني وقولي رنا فين وايه اللي حصل ومين الحقير اللي لعب لعبه زي ديه علشان يبعدنا عن بعض ،لو سمحت ساعدني انا فعلاً مليش اي علاقه بالموضوع ده
كان باين في عينه صدق غريب!
نبره صوته المهزوزه ،دموعه اللي من النادر جداً تظهر في عيون راجل ، ملامحه الملهوفه واللي كلها خوف كلها كانت اشياء تؤكد فعلياً أن في شئ غلط شئ مش مفهوم ولازم يبقاله توضيح
اتنهد فريد وغمض عيونه لمده ثواني بعدها فتحها وبص لعاصم بتحذير وتهديد صريح
-هساعدك بس قسماً بالله لو طلعت بتكذب عليا ما هيكفيني فيك عمرك ياعاصم
***************************************
-احكيلي مالك بس يابنتي متفضليش ساكته كده!
كانت “رنا” سانده رأسها علي رجل الهام مامتها وبتبص قدامها بشرود ودموع رافضه ترحم ضعفها
فعلاً شعور صعب ان بعد ثقتك في شخص يخون ثقتك ويدوس علي قلبك بكل القسوه اللي في العالم
انك تهدر مشاعرك وتوهب روحك وقلبك ونفسك لشخص واثق ومتأكد أنه عمره ما يرجعك مخذول وفي الاخر تجيلك الضربه منه من اقرب الناس لقلبك الشخص اللي راهنت عليه بحياتك!
وبمجرد موقف سخيف بكل الاسف اللي في العالم يخسرك الرهان
وكانت من اصدق الجمل اللي وصف بيها محمود درويش خيبه أمله وأمل كُل العشاق
“كنتُ أود إخبَارك بأن الجَميع قد خَذلني إلا أنت ، لكنَك خَذلتنِي قبل أن أُخبرك”
صوت جرس الباب خرجها من شرودها
فتحت اختها الصغيره ووقتها اندفع “عاصم” وهو بيدور عليها زي المجنون
-رنا رنا انا معملتش حاجه صدقيني
اول ما لمحت طيفه اتنفضت من مكانها وهي بتهز رأسها بهستريه ودموع
قرب منها خطوه ومع كل خطوه كانت بتهز رأسها بجنون اكبر وبترجع لورا لدرجه رجلها لزقت في الرُكنه ومفيش غير بكلمه واحده بس علي لسانها
-لأ لأ لأ
فريد بلهفه :
-رنا اسمعيني ياحبيبتي والله العظيم الشخص ده مكانش انا و…..
قاطعته وهي بتسد ودنها وبتصرخ بوجع:
-اطلع برااااا اطلع براااا مش عايزه اشوف وشك
دخل “فريد” وقرب منها وهي واقفه بتتنفض وبتبصله بأستغاثه ودموع وخوف وقهر!
وقف قدامها وشال ايديها من علي ودنها بهدوء :
-رنا ممكن تهدي وتسمعي عاصم هو…..
قاطعته وهي بتهز رأسها برفض وبنبره مهزوزه:
-ل لا ل لا يافريد ا انا مش عايزه اسمعه ا ارجوك ع علشان خاطري خليه يمشي من هنا ا ارجوك يافريد
بصلها واتكلم بحده بسيطه:
-رنا اهدي واسمعيني الواضح أن في شئ غلط في الموضوع ،عاصم ميعرفش اي حاجه عن اللي حصلت
ردت بذهول وهي بتهز رأسها بعدم تصديق:
-انت مصدقه يافريد م مصددق عاصم حتي بعد ما شوفته بعيونك وهو قاعد علي الكنبه في شقتها بكل البجاحه اللي في العالم
معقوله قدر بالبساطه ديه يفهمك أن اللي حصل مكانش حقيقي وأنه انسان مُخلص للست اللي بيحبها
-رنا انا فعلاً من وقت ما دخلتي حياتي وانا واخد عهد علي نفسي مفكرش ولا اعرف ست غيرك
وفعلاً انا بحبك وبحترمك وعمري ما افكر اخونك لاني مقدر وقفتك جنبي في أيام تعبي وفشلي وفقري!
انا مُكتفي بيكي انتي بمليون ست يا رنا
عمري ما حسيت من نحيتك بأي تأثير
دائماً قادره توزني بين حياتك وبيتك
اللي بيخون مراته بيخونها علشان عنده نقص وانا في وجودك مش حاسس بأي نقص علشان ادور عليه مع حد تاني بلاقي معاكي الحب والاهتمام والتقدير والحنيه والأمان هحتاج ايه تاني!!
وقفت تسقفله بأنبهار وسخريه:
-كااااات هايل يافنان بجد بجد تنفع مُمثل
صرخ بعنف وهو بيكسر الفازه اللي كانت جنبه:
-رنا كفايه بقي كفاااااايه انا مخونتكيش
قربت منه خطوه وهي بتبصله بكره:
-طلقني
هز رأسه بنفي :
-لا مش هطلقك
ردت بتحدي ودموعها بتلمع بالدموع :
-لا هتطلقني
اخد نفس عميق وغمض عيونه بتعب وإرهاق
-انا هسيبك تريحي دماغك شويه في بيت أهلك بس كلامنا لسه مخلصش
قال جملته ولف وكان لسه هيخرج بس سمع صوتها وهي بتصرخ بعصبيه
-لو مطلقتنيش دلوقتي انا هموت نفسي!
-رنا سيبي السكينه اللي في ايدك ديه أعقلي وبلاش جنان
قالها “فريد” وهو بيحاول يقرب منها بس هي رجعت خطوه لورا وهي بتصرخ بهستريه
-محدش يقرب مني هموت نفسي
بلع “عاصم ” ريقه ودقات قلبه في صراع
-ط طب اهدي يارنا ا اهدي وانا هعملك اللي انتي عايزاه
ردت بنبره مهزوزه:
-طلقني
-حاضر هطلقك بس…
قاطعته وهي بتضغط اكتر علي ايديها :
-متقربش وطلقنيي
-اهون عليكي؟!