حطت وشها في الأرض وهي بتفرك في ايديها بتوتر والدموع بتلمع في عينيها :
-ف في رقم بعتلي م ماسدج قالي أن “عاصم” بيخوني ومتجوز واحده صاحبتي
رد بذهول :
-نعم وانتي تعرفي الشخص اللي بعتلك ده
هزت راسها بنفي :
-لا ولما رنيت علي الرقم رد واحد معرفش صوته قالي انا فاعل خير و ولو عايزه تتأكدي أن كلامي صح هبعتلك لوكيشن تروحي تتأكدي
سأل بهدوء:
-وبعتلك؟
هزت راسها بنعم وهي بتضغط علي شفايفها علشان متنفجرش في العياط
سأل وهو بيقفل عيونه نص قفله :
-وانتي مصدقه !
ضغطت اكتر علي شفايفها وهزت رأسها بنفي
-اومال ايه سبب الدموع ديه
رفعت عيونها وردت بنبره كلها عياط:
-المفروض لما اشوف ماسدج زي دي ابقي عادي
هز أكتافه بحيره :
-معرفش بس لو انتي بتحبي “عاصم” وواثقه أنه عمره ما يخونك اعتقد انك هتكبري دماغك
-اي ست لو شافت حاجه زي كده طبيعي حتي لو بتحب جوزها وواثقه فيه هتقلق
رد بلا مبالاه:
-وليه تفضلي قلقانه وانتي في أيدك تتأكدي
-يعني ايه!
-يعني مش اللوكيشن معاكي
-ايوه
-روحي اتأكدي بنفسك
بلعت ريقها وسكتت لحظه تفكر في كلامها بعدها ردت بتوتر :
-ب بس بس افرض طلع فخ أو حد مش كويس و….
قاطعها بثقه :
-وانتي فاكره اني هسيبك تروحي لوحدك
سألت ببراءه:
-هتيجي معايا
-طبعاً مش انا اخوكي الكبير زي ما بتقولي
ردت بابتسامه مهزوزه:
-ط طبعاً ا انت اكتر من أخ انا لو كان عندي اخ اعتقد مكانش هيقف معايا ويبقي في ظهري زيك
ابتسم ابتسامه حزينه وهز رأسه بحسره :
-طب يلا حضري نفسك وانزلي وانا هروح استأذن من المُدير وهحصلك علي العربيه
-ت تمام
*****★*******★****★*****★
بعد شويه كانت قاعده جنبه في العربيه بتبص للطريق بشرود وفي أكثر من سيناريو جه في بالها في الثانيه الواحده
-خايفه؟
سألها من غير ما يبصلها وهو بيسوق وجواه بيتمني لو الكلام حقيقي!
ردت ودمعه شارده نازله علي عيونها :
-ابقي بكدب لو قولتلك لا مش خايفه
انا مرعوبه وفي جوايا الف سيناريو كلهم اسوء من بعض
-وليه خايفه انتي مش واثقه في جوزك!
-واثقه لكن الشيطان شاطر
وفي نفس الوقت بقول لنفسي جايز يكون الكلام حقيقي
جايز اكون آثرت معاه في يوم ومقومتش بدوري كزوجه ف اضطر يدور علي الاهتمام في حد تاني
ابتسم بسخرية وذهول:
-انتي بتبرري خيانته ليكي لو كانت حقيقه يا رنا!
ردت بحزن :
-معرفش انا جوايا صراع
قلبي بيقولي لا هو بيحبك وعمره ما يخونك
وعقلي بيقولي جايز يكون خانك وان كل اللي فات كان كذب!
رد بهدوء:
-لو بيحبك بجد عمره ما يخونك ولا يفكر في واحده غيرك من اساسه وبعدين يا رنا انتي مش بتشوفي نفسك في المرايه!
فعلا عاصم لو كان بيخونك يبقي اعمي ومش عارف قيمتك ولا قادر يحس أن معاه كنز غيره أتمناه
سألت بصوت مهزوز وملامح كلها قلق:
-تفتكر متجوز فعلا
اتنهد تنهيده طويله وهو بيركن العربيه وبيبص علي العماره اللي المفروض “عاصم” فيها
-دلوقتي نعرف كل حاجه
*****★*****★******★******★
-انا عايز افهم حاجه هو احنا ليه بنعمل كل ده!
ردت بنت ببرود :
-لا بقولك ايه احنا لما اتفقنا معاك تمثل دور جوزها افتكر وقتها أننا قولنالك متسألش كتير
انت جاي تنفذ عمليه وتقبض تمنها مش عايزين كلام كتير بقي يا حيلتها
رد بضيق :
-طب خلاص انتي دخلتي فيا شمال كده ليه
بصيتلها بقرف من فوق لتحت وهي بتحط رجل فوق التانيه وبتاكل لبان بطريقه مستفزه
همس بضيق :
-ياستار شكلك زي القرود
انا لولا الحوجه مكنتش وافقت علي العمليه الهباب ديه بس هنقول ايه الفقر بيذل البني آدم
اتنهد وهو بيسند ظهره علي الكنبه اللي وراه :
-انا اسف يا مدام رنا اني هوهمك بشكلي اللي شبه جوزك أنه بيخونك ومتجوز صاحبتك
ثواني والباب خبط
اتنفضت البنت من مكانها وفضلت تعدل في هدومها وشعرها وهي بتبصله
-مُستعد؟
هز رأسه ببرود :
-ايوه