البارت الثالث 🖤 بقلمي إيمان شلبي 🖤
“بارك الله لكما وبارك عليكما وجمع بينكما في خير وعلي خير”
تم الجواز وأصبحت مراته رسمي قدام كل العالم
كان جوايا مشاعر كتير متلغبطه في الوقت ده
الكل كان حوليا بيباركولي علي خطوه أخدتها في وقت قياسي!
مكنتش قادره احدد انا زعلانه ولا فرحانه ولا مش فارق معايا ولا انا عايزه ايه بالظبط؟
كان قرار متهور مني
عواقبه مش هتكون هينه بالمره
جايز اخسر حاجات كتير من وراه
جايز اخسر وقتي ،مشاعري ،قلبي،نفسي
وخاصه وانا جوايا من فتره مش بعيده مشاعر مدفونه ليونس
أمتي ،ازاي ،ليه؟!
كلها اسئله مكانش ليها اجابه واضحه
-مبروك
فوقت من شرودي علي صوته جنب ودني
لفيت راسي ورفعت عيوني في عيونه
الوقت كأنه وقف في اللحظه ديه
عيونه كأنها سحر بيجذب اللي قدامها
مكانتش ملونه ولا فيها أي شيئ يخليني انهار قدام حصونه لكن الدفا والحنان اللي شوفته فيها كانوا اكتر شيئ كفيل يخلي قلبي يدوب جوا قلبه
-انتي كويسه؟
حط أيده علي ايدي وهو بيهمس بصوت هادي ورقيق
هزيت راسي ورديت بنبره مهزوزه:
-كويسه
-بالمناسبه عايز اقولك علي حاجه
-اتفضل
-الفستان شكله يجنن عليكي
ابتسمت ابتسامه حزينه وانا ببص حوليا :
-مكانش ليه لازمه نعمل فرح في قاعه ونعزم الناس ديه كلها
رد باستغراب :
-ليه انتي مش زي البنات وحقك تفرحي وتلبسي فستان ويتعملك فرح في احسن قاعه!
بصيتله وسكتت لحظه وانا علي أخري والدموع بتلمع في عيني
جوايا كلام كتير محتاجه اقوله بس للاسف لا الوقت يسمح ولا حتي المكان