اسكريبت 🖤 بقلمي إيمان شلبي 🖤
“شكلك حلو اوي بشعرك”
كنت قاعده في اوضتي بقلب في الواتساب بملل وفجأه جاتلي ماسدج غريبه من شخص عمري ما اتكلمت معاه غير في حدود الشغل وبس!
فتحتها لقيته عامل ريبلاي علي الاستوري بتاعتي
حطيت ايدي علي بوقي بصدمه :
-يالهوي يالهوووي انا ازاي نسيت اعمله Hide
دخلت فوراً علي الاستوري ومسحتها
في الحقيقه انا كنت منزله صوره ليا بشعري بس عملت Hide لكل الولاد اللي عندي معرفش ده بالذات ليه نسيت اعمله
ضربت علي راسي بضيق :
-غبيه غبييييه
“مش بتردي ليه”
بلعت ريقي وكتبت وانا ايدي بتترعش
-ديه مش انا
شافها ورد في نفس الثانيه
-لا انتي نفس العيون ونفس الضحكه ونفس الملامح!
رديت بضيق :
-من فضلك ميصحش كده
بعتلي ايموشن رافع حاجبه :
-مالك زعلانه ليه انا مقولتش حاجه انا بقولك شكلك حلو
اخدت نفس عميق وغمضت عيوني ورديت بهدوء عكس البراكين اللي كانت جوايا
-بص يا استاذ يونس انا نزلت الاستوري ونسيت اعملك Hide فمن فضلك بلاش كلام كتير في الموضوع ده وبلاش اسلوب الغزل الغير مقبول علي الاطلاق لو سمحت
شافها ورد ببرود :
-ياسلام يعني أنتي عملتي لكل الولاد Hide ونسيتي تعمليلي ؟!
رديت بعصبية :
-وانا هكذب عليك ليه
رد بأيموشن بيغمز :
-يمكن معجبه بيا وعايزه توقعيني في شباكك
برقت بصدمه وفضلت اجز علي اسناني واهز في رجلي بغيظ وانا برد بكل عصبيه
-انت بني آدم مش محترم
قولت كلامي وعملت بلوك فوراً
اول ما عملت بلوك حسيت اني عايزه اعيط من الموقف اللي اتحطيت فيه
انا اول مره يحصل معايا حاجه زي كده في الحقيقه
انا اصلا اول مره انزل استوري بشعري!
دايماً ماما تقولي اوعي تنزلي استوري ليكي بشعرك حتي لو بنات بس اللي هتشوفها
كنت بفضل اتناقش معاها وأحاول أقنعها أنه مفيش مشكله وكل البنات بتنزل بس هي كانت بترفض رفض قاطع وتقولي جمله عمري ما انساها أبداً
“وانتي ايش ضمنك أن البنات ديه متاخدش صورك توريها لحد متأمنيش لاي بني آدم أياً كان مين هو عشان مفيش حد هيحبلك الخير ”
بالرغم من اني كنت بقتنع بكلامها لكن كنت ببقي حابه اعمل زي البنات
ببقي حابه أوري البنات اني جميله زيهم
ببقي نفسي اسمع كلمه حلوه من حد يغيرلي مودي
كان بيبقي في صراع جوايا بين كلام ماما المنطقي وقلبي
وفي النهايه فاز قلبي بجداره شديده وياريته ما فاز وياريتني ما نزلت الصوره!
“بتعمليلي بلوك ليه ”
جاتلي ماسدج من رقم غريب مش متسجل عندي
قدرت استنتج أن هو مفيش غيره
اول ما شوفتها قلبي اتنفض وجسمي كله كان بيترعش وكأني مُقبله علي الموت
فتحتها ورديت المره ديه وانا عيوني بتلمع بالدموع
-انت عايز مني ايه
-عايز اعرف ليه عملتي بلوك
-عشان انت مش محترم
-بس انا مقولتش اي كلمه مش محترمه!