-انتي كنتي فين ؟
رجعت خطوه لورا بفز*ع وهي بتبص لفارس اللي كان واضح القلق علي ملامحه
بلعت ريقها بتوتر:
-ك كُنت ك كُنت بتمشي شويه
صرخ في وشها فجأه:
-ومقولتيش ليه انك نازله
استغربت تحوله المفاجئ وردت بتوتر :
-ع عشان ع عشان الكل كان نايم محبتش أزعج حد
-والله وحضرتك يعني كده مأزعجتيش حد!
ردت بضيق :
-انا عملت ايه لكل ده
-لما حضرتك تحبي تنزلي تاني مره ياريت تعرفي اكياس الجوافه اللي انتي عايشه معاهم هي مش وكاله من غير بواب هي
اتضايقت من أسلوبه وبصيتله بغيظ من غير ما تنطق حرف واتخطته عشان تدخل البيت بس هو مسكها من دراعها وهو بيهمس بنبره حاده:
-انا لسه مخلصتش كلامي
رفعت عيونها وملامحها مكشره وبغيظ طفولي
-وهو لسه في كلام تاني؟!
بصلها ورد بقوه :
-اه في كنتي فين بالظبط
ردت بصوت مبحوح وهي بتغمض عينيها بألم بعد ما زاد وجع معدتها :
-ك كنت مخنوقه شويه نزلت اتمشي وفطرت
-وليه مقولتيش انك نازله
ردت بضيق :
-قولتلك عشان انتوا كنتوا نايمين ومازال الكل نايم محدش صاحي غيرك اصلاً!
رد بعصبيه وهو بيبص في عيونها :
-ايوه ولما صحيت لقيت باب اوضتك مفتوح وانتي مش جوا قلقت
اتوترت
قلبها دق بفرحه
العرق اتكون فوق جبينها
حست مشاعر لاول مره تحس بيها
اما عن فارس
مكانش فاهم هو بيعمل ايه ولا حتي فاهم مشاعره!
ازاي كان متوتر ،قلقان ،ملهوف بالشكل ده
مشاعر كتير متلغبطه جواه
بعد ما كان مقرر أنه عمره ما يسيب قلبه للحب مره تانيه
فجأه كل شئ اتغير في لمح البصر
فجأه قلبه اتحرر
فجأه قراره اتغير
هي حياتنا كده مفيش فيها قوانين أو حتي قرارت ثابته!
ناخد قرار وفجأه الحياه تفرض علينا اننا ناخد غيره
نتعلق بحد ونحب وجوده ونرسم معاه مستقبل وحياه كامله فجأه القدر يعلقنا بغيره !
مشاعرنا ،قلوبنا ،قرارتنا ،منطقنا
كلها اشياء بتتغير مع مرور الوقت
اخد نفس عميق وساب ايديها وهو بيقولها بجديه
-ادخلي
دخلت وهي حاطه ايديها علي بطنها وتعبيرات وشها بتقول انها بتتألم
فجأه وقفت في مكانها وهي بتغمض عينيها جامد :
-ااااه
فارس بقلق :
-ايه مالك في ايه
ردت بوجع وهي بتعيط :
-ااااه بطني بتوجعني اوي
“دُنيا مالك ”
قالتها جميله اللي خرجت من اوضتها وشافت اختها واقفه بتعيط
-ااااه جميله الحقيني بطني بتوجعني مش قادره
خرج آسر من اوضته في الوقت ده وهو بيفرك عيونه وبيتاوب بنعاس
اول ما شاف دُنيا بتعيط ضم حواجبه باستغراب
-في ايه تاني
قعدت علي الارض وهي بتتلوي من التعب وبتعيط جامد وجميله قاعده بتعيط جنبها
قرب من فارس اللي كان واقف زي الصنم ومش عارف يعمل ايه
-في ايه يابني؟
هز رأسه بحيره وقلق :
-مش عارف هي كانت برا ولسه راجعه وفجأه بطنها وجعتها
برق بصدمه :
-هي أكلت حاجه من برا !
-هي قالتلي انها فطرت برا
آسر وهو بيسألها بقلق :
-احيه فطرتي ايه؟
ردت بوجع ودموع :
-فول وفلافل وطعميه وبتنجان و…
لطم علي خده بطريقه مسرحيه :
-ياصباح التسمم شكلك اكلتي من عبده صواريخ
فارس بصدمه :
-احيييه هنعمل ايه
بص لفارس وهو بيصرخ فيه :
-انت بتسألني هو انا اللي دكتور ولا انت
-انا
رد بغيظ :
وواقف بتعمل ايه عندك ساعدني ندخلها اوضتها عشان تكشف عليها
يُتبع
#بنتين_من_امريكا
#إيمان_شلبي