البارت الثالث 🖤 بقلمي إيمان شلبي 🖤
اوقات بنفضل نعافر بكل طاقتنا عشان موضوع معين يكمل لكنه بكل أسف مبيحصلش بل بالعكس ده كل الطرق بتتقفل في وشنا وكأن الدنيا عدونا اللدود اللي رافضه تخلينا نعيش اللي بنتمناه من غير تعب ومعافره ودموع!
بيجي علينا لحظه بنتعب فيها من كتر الجري ونقف في نص الطريق لا مننا قادرين نرجع ولا مننا قادرين نكمل
لحظه بنفقد فيها طاقتنا ،شغفنا ،احلامنا ،نفسنا
لكن للاسف مضطرين نكمل طريقنا
الشئ الوحيد اللي ممكن يهون علي البني آدم هو اليقين والثقه بالله
لما يبقي جواك يقين أن حتي لو كل الطرق اتقفلت اكيد ربنا هيفتح طريق مكنش علي البال ولا النيه
اكيد ربنا ليه حكمه في كل اللي بيحصل
حكمه في التعب
حكمه في الفشل
حكمه في النصيب
مش بنبقي قادرين نفهمها ولا نعرف اي هي إلا في النهايه
واكيد بعد كل التعب والمعافره والفشل والدموع وكسره النفس والقلب هيعوضنا بشئ مكانش متوقع
اما هنحصل علي اللي طول عمرنا بندور عليه
او هيحصل عكس ده وهنحصل علي اللي ربنا كاتبهولنا والاحسن وألطف بكتير من اختيارنا
-سرحان في ايه ياحبيبي؟!
لف وعلي ملامحه القلق :
-انتي ايه اللي قومك من علي السرير بس مش الدكتور قال نرتاح شويه
ردت بضيق طفولي :
-زهقت يانوح وبعدين انا الحمد لله بقيت كويسه
مدلها ايده بابتسامه:
-طب تعالي اقعدي علي الكرسي وانا هروح احضرلك حاجه تاكليها
مسكت أيده وهي بتهز رأسها بنفي :
-متتعبش نفسك ياحبيبي مش جعانه
رد بأصرار:
-كيان أنتي لازم تأكلي عشان اللي في بطنك وعشان صحتك
-بس…..
-مفيش بس هناكل سوا
-امممم إذا كان كده ماشي
اتنهد وباس راسها بحب وحنان :
– خمس دقائق والأكل يكون جاهز
بعد مرور ربع ساعه
كيان وهي بتبصله بحب وامتنان:
-ربنا يخليك ليا يانوح انا اسفه تعباك معايا اوي
مسك ايديها وباسها برقه :
-مستعد اتعب العمر كله في سبيل راحتك يا كيان
– انا بحبك اوي
-وانا بحبك اوي ومش قادر لحد اللحظه ديه اصدق انك معايا
عيونها لمعت بالدموع وهي بترد بنبره مهزوزه:
-كل ما افتكر الايام اللي عيشت فيها مع عثمان قلبي يتقبض وبخاف
ضغط علي ايديها بلهفه :
-اوعي اوعي تخافي طول مانا موجود
سندت رأسها علي صدره وهي بتاخد نفس عميق وبتقوله :
-ربنا يسامحه بابا هو السبب في كل اللي حصل ده