اسكريبت 🖤 بقلمي إيمان شلبي 🖤
-في عريس متقدملي يامهند
-مبروك ربنا يتمملك بخير
قالها بكل قسوه وبرود وهو بيسند ظهره علي الكرسي اللي وراه بيبصلي بملامح خاليه من اي تعبير
في الحقيقه وبدون مبالغه رد فعله كان بمثابه خنجر اترشق في قلبي
وقتها حسيت بوجع رهيب
مكنتش اتخيل انه ممكن يبيع بالسهوله ديه
هي فين الوعود ؟
فين المشاعر
لمعه العيون
رعشه القلب والايد
كل ده اتبخر في لمح البصر وكأنه لم يكن !!
وقتها كان جوايا كلام كتير واسئله اكتر لكن اكتفيت بالصمت
اكتفيت بالدموع اللي نزلت زي الشلال
اكتفيت باني اخدت شنطتي وانسحبت بهدوء من الكافيه وانا بجر خيبه املي ورايا
-يا انسه يا انسه الشنطه بتاعتك وقعت منك
لفيت بشرود واخدتها من الشخص اللي كان بيجري نحيتي وانا برد عليه بتعب
-شكرا
-انتي كويسه
ابتسمت بسخرية وانا بمشي من قدامه بنفس الشرود :
-اوي انا كويسه اوي ك كويسه جدا ك …عاااااا
صرخت فجأه لما لقيت نفسي بتسحب بسرعه لحضن شخص معرفش مين هو وقبل ما انطق اي حرف لقيت عربيه بتعدي من نفس المكان بسرعه الصاروخ
ياااااه هو انا للدرجادي مش حاسه
مش حاسه لدرجه اني مش مركزه في الطريق والعربيه اللي كانت ممكن في لمح البصر تطيرني لبعيد!
فتحت عيوني الي كنت مغمضاها جامد ورفعت راسي اشوف مين اللي انقذني لقيته نفس الشخص اللي لسه مديني الشنطه
-انتي كويسه
قالها بلهفه وقلق وكأني حد من قرايبه مش واحده لسه شايفها من دقائق
بعدت عنه وانا بهز راسي بهدوء :
-ش شكراً
-تحبي اوصلك
بلعت ريقي واخدت نفس عميق وانا بحاول استعيد ثباتي
-شكرا انا كويسه
رفع أكتافه بحيره :
-اتمني تكوني بخير عن اذنك
ـــــــــــــــــــــــــــــــــــــــــــــــــــــــــــــــــــــــــــــــــــــــــ
-ها عملتي ايه قالك ايه ؟
رديت بسخريه:
-مبروك ربنا يتمملك بخير
-انتي بتهزري؟!
اترميت في حضن صاحبتي وفضلت أعيط بحرقه وانا حاسه ان قلبي هيقف من كتر الحزن والوجع اللي جوايا
-خديجه عشان خاطري بلاش تعيطي ده كلب ولا يستاهل انك تزعلي عشانه
لكن وما حيله الحزين غير البكاء!
رفعت راسي وانا بسألها بكل وجع:
-ليه عمل فيا كده ،انا مأذتهوش في حاجه يا رحمه ا انا حبيته اكتر من نفسي ،ا انتي عارفه عارفه أن ده الشخص الوحيد اللي اتنازلت عن كل مبادئ عشان ارضيه !
ا أنا ا انا عارفه ومتأكده أنه غلط وحرام وأنه مفيش اي مبرر للي كنت بعمله ،ب بس بس غصب عني و والله غصب عني انا حبيته اوي يارحمه ،ليه باعني كده بكل سهوله ،انا وقفت معاه بقالي سنه واقفه معاه ومتحمله اي فعل منه ،متحمله قله اهتمامه ،عصبيته ، كلامه اللي اوقات بيوجعني ،كل ده بدافع الحب ،ر رفضت عرسان كتير اوي عشانه يارحمه ،اتحملت كلام من اللي يسوي واللي ميسواش بسبب رفضي اللي ملهوش اي مبرر ،م مكنتش بحمله اي حاجه فوق طاقته ،كنت بتحمل واشيل جوايا الوجع ومعاه بعمل نفسي كويسه عشان مبقاش بضغط عليه ،قولتله بدل المره الف انا معاك انا عمري ما هسيبك ،هستناك لو عشرين سنه هستناك ،بس بس مش بأيدي والله مش بأيدي بابا جابلي عريس ورأسه والف سيف اني أقابله ،وقتها مكنتش عارفه اعمل ايه ،كان لازم اقوله عشان يتصرف لو هو بيحبني
طلع مش بيحبني يارحمه ،طلع كل اللي فات حلم ،كل الكلام والمشاعر كل حاجه من البدايه كانت كذب في كذب ؟!
وفي النهايه
“اللي انت في يوم حبيته وقدّرته
هو اللي اذاك.!”
ـــــــــــــــــــــــــــــــــــــــــــــــــــــــــــــــــــــــــــــــــــــــــ
رجعت البيت بعد نص الليل
بعد لف في كل الشوارع بقلب مكسور
بعد كم اسئله سألتها لنفسي في الثانيه الواحده
كنت ماشيه بعقل مش واعي
كل اللي بفتكره التفاصيل
ادق التفاصيل كانت بتيجي علي بالي
شريط من الذكريات المؤلمه بيمر قدام عيوني
كم مشاعر حاسه بيهم
كلهم اسوء من بعض!!
فتحت الباب واول ما دخلت لقيت ماما بتجري نحيتي بلهفه وهي بتاخدني في حضنها
-خديجه الحمد لله الحمد لله يارب
بصيتلها بملامح خاليه من أي تعبير من غير ما انطق حرف
-انتي كويسه يابنتي
فيكي ايه مكنتيش بتردي علي الفون ليه ياخديجه ردي يابنتي طمني قلبي انا قلبي بيتقطع عليكي
بلعت ريقي وانا برد بتعب :
-انا كويسه ياماما عايزه ارتاح شويه بس
وقتها بابا اتنفض من مكانه وهو بيقرب مني وبيشدني من دراعي بعصبيه
-ليه انتي مفكره انها سايبه ولا ايه ،ترجعيلنا نص الليل ومحدش يعرف عنك حاجه طول النهار وراجعه عايزه تتخمدي !!
انطقي يابت قولي كنتي في انهي مصيبه
رديت بوجع ودموع :
-ك كنت مخنوقه يابابا وبتمشي شويه
رد بسخريه :
-وايه اللي خانقك ياسنيوريتا؟؟
هزيت راسي بهدوء :
-م مفيش يابابا مفيش حاجه
وفجأة مسكني من شعري وهو بيجز علي أسنانه بعنف :
-كنتي بتقابلي الواد إياه مش كده
بلعت ريقي بصعوبه وانا بهز راسي بهستريه:
-لا لا يابابا محصلش لا
ضربني قلم علي وشي لدرجه راسي لفت النحيه التانيه:
-وكمان بتكذبي عليا وانا شايفك بعيني الاتنين وانتي قاعده معاه في الكافيه يازباااااله يارخصيه
وقتها القلم موجعنيش قد ما وجعتني كلمته “يارخيصه”
طلعت اجري علي الاوضه وانا حاطه ايدي علي خدي وبعيط بحرقه
قفلت باب اوضتي وقعدت علي الارض وانا بضم رُكبي الاتنين في بعض وكلمه بابا بتتردد في ودني
-يارخيصه ،يارخيصه ،يارخيييصه
حطيت ايدي علي ودني وانا بهز راسي بهستريه :
-بسسس خلاص خلااااااااااص
بالرغم من وجعي إلا أني فعلا مينطبقش عليا غير الوصف ده
انا فعلا رخيصه ،انا رخصت نفسي لدرجه محدش يتخيلها
رخصت نفسي لما وافقت اكمل في علاقه مُحرمه ،رخصت نفسي لما اتحملت حاجات فوق طاقتي بدافع الحب ،رخصت نفسي لما وقفت جنب شخص مقدمليش اي حاجه حرفيا ،رخصت نفسي لما قدمت كل حاجه ،حب ،اهتمام ،مشاعر ،وفي المقابل مكنتش بلاقي ربع اللي بقدمه ،رخصت نفسي لما قدمت قلبي علي طبق من دهب ل”مهند”
فوقت من شرودي علي صوت المفتاح في الباب وبابا بيقول لماما بغضب
-البت دي مش هتخرج من الاوضه ولا تروح شغل ولا كليه ولا اي مكان ،الحاله الوحيده اللي هتخرج فيها من الاوضه علي بيت جوزها اللي انا اخترتهولها واللي هتتجوزه برضاها أو غصب عنها انتوا سامعين ؟!
ماما بعياط :
-طب علي الاقل تشوفه يا كمال وتتكلم معاه حرام عليك هتجوزها واحد متعرفهوش ولا هو يعرفها
زعق فيها جامد وهو بيهبد علي باب الأوضه:
-انا قولت كلمه ومش عايز حد يناقشني فيها اعملي حسابك ياهانم كتب كتابك يوم الاتنين اللي جاي
قال كلامه ومشي من قدام الأوضه وانا قاعده ببص قدامي بشرود وفي الف سيناريو في دماغي كلهم ابشع من بعض
ـــــــــــــــــــــــــــــــــــــــــــــــــــــــــــــــــــــــــــــــــــــــــ
-يابنتي عشان خاطري كلي لقمه انتي بقالك يومين علي لحم بطنك !
كنت قاعده علي السرير وضامه رُكبي في بعض وانا ببص قدامي بشرود والدموع متجمعه في عيني
بقالي يومين علي الحال ده
لا باكل ولا بشرب ولا حتي بتكلم مع حد
كل اللي بعمله هو العياط والشرود
وأوقات لما الدنيا بتضيق بيا بتوضي واصلي وأفضل اتكلم مع ربنا واشكيله همي
ماما وهي بتتنهد وبتحط الصينيه علي الكمود :
-وبعدين ياخديجه هتفضلي علي الحال ده لحد امتي
بصيتلها ومردتش عليها كالعاده …
-طب اتكلمي معايا يابنتي ،قوليلي اللي جواكي فضفضي متفضليش كاتمه في نفسك كده
اخدت نفس عميق وانا برد عليها بصوت واطي :
-هتكلم اقول ايه
-قولي اللي في قلبك ياضنايا احكيلي ايه اللي مزعلك ؟!
-الدنيا كلها مزعلاني
مسكت ايدي وهي تبتسم ابتسامه حنينه زي قلبها
-بتحبيه؟
-هو مين؟!
-اللي بتعملي كل ده عشانه” مهند” بتحبيه
-ا انتوا عرفتوا منين اصلا
-ابوكي شافك مره وانتي معاه
-وبعدين
-وبعدين جه وحكالي وانا حاولت اقنعه انك اكيد مش هتعملي حاجه غلط وانك من حقك تحبي و….
-انا حصل فيا كل ده عشان انا كنت بدي لغلطي مبرر ياماما ،علاقتي انا ومهند كانت كلها من البدايه غلط وحرام والعلاقات المحرمه ربنا بيكسر بقلب صاحبها
-الاهم من كل ده انك فوقتي وعرفتي انك كنتي غلطانه
-وعرفت قد ايه انا رخيصه كمان
ردت بلهفه وهي بتحط ايديها علي بوقي :
-اوعي اوعي اسمعك بتقولي كده علي نفسك مره تانيه انتي ست البنات انتي تاج رأسه يا خديجه هو الخسران مش انتي ياحبيبتي
اترميت في حضنها وانا بعيط بوجع:
-بس انا بحبه اوي ياماما بحبه وعمري ما هقدر احب حد تاني غيره
-قولتيله انك جالك عريس ؟
-للاسف
-وقالك ايه
-مبروك ربنا يتمملك بخير
-يبقي ده شخص يستحق الحب ياخديجه
-غصب عني ياماما والله غصب عني قلبي مش بأيدي ياريتني اقدر أشيل حبه من قلبي ياريتني عندي زرار ادوس عليه عشان امحي الفتره اللي عرفته فيها ياريتني امـ,ـوت وارتاح من الوجع اللي في قلبي ياريتني معرفته ابدا ياماما ياريتني ما حبيته اهئ
شدتني لحضنها وفضلنا نعيط احنا الاتنين علي الحال اللي انا فيه لحد ما نمت في حضنها
ـــــــــــــــــــــــــــــــــــــــــــــــــــــــــــــــــــــــــــــــــــــــــ
احنا بنكمل حياتنا بناس أساساً حلم غيرنا
غيرنا بيكمل حياته بناس أساساً حلمنا 💔
كنت قاعده في اوضتي علي طرف السرير وباصه في الأرض بشرود تام
في انتظار العريس اللي قدرت ماما تقنع بابا اني أقابله واتكلم معاه قبل اي خطوه
في الحقيقه مكانش عندي اي شغف اني اشوفه ولا اتكلم معاه
دخلت ماما الأوضه وعلي وشها ابتسامه واسعه
-يلا ياخديجه تعالي شوفي عريسك ياحبيبتي
اخدت نفس عميق وقومت من مكاني وانا بقولها بسخريه:
-مالك ياماما فرحانه كده ليه
مسكت ايدي وهي بتبصلي بدموع :
-فرحانه عشان عريسك زي القمر يابنتي
-هه هعمل ايه بجماله؟
-مش يمكن يكون ده عوض من ربنا ليكي
-يلا ياماما يلا نخرج
خرجنا انا وهي وانا حاطه وشي في الأرض وبفرك في أيدي بتوتر وفي قلبي وجع العالم
بتمني لو الأرض تنشق وتبلعني ،بتمني لو كنت في حلم وهفوق منه فورا علي ماسدج من “مهند” بيقولي فيها
“صباح الخير وحشتيني ”
بتمني لو كنت فارقه ،بتمني لو ارفع راسي دلوقتي اشوف مهند قدامي واكتشف أنه كان مجرد مقلب
الف حلم ولف امنيه في بالي اتمني لو بس انول واحده منهم عشان قلبي يرتاح
-السلام عليكم
-وعليكم من السلام ورحمه الله وبركاته …تعالي ياخديجه تعالي ياحبيبتي سلمي علي عمك طارق ابو عريسك
قربت منه وانا باصه في الأرض وبسلم عليه ببرود :
-ازي حضرتك
-بسم الله ماشاء الله اللهم بارك زي القمر يابنتي
ابتسمت ابتسامه مزيفه :
-شكرا ياعمو
-اعرفك يابنتي “رائف ” ابني
رفعت راسي اشوف عريس الغفلة اللي كنت اتمني لو اطبق في زماره رقبته
-اهلاً و
….ايه ده انت !!!!
يُتبع
#مُنقذي
#إيمان_شلبي